ଭୁବନେଶ୍ୱର : ଗ୍ରାମାଞ୍ଚଳରେ ପାନୀୟ ଜଳ ସୁବିଧାକୁ ଆହୁରି ସୁଦୃଢ଼ ଓ ଲୋକାଭିମୁଖୀ କରିବା ପାଇଁ ରାଜ୍ୟ ସରକାର ଏକ ନୂତନ ପଦକ୍ଷେପ ନେଇଛନ୍ତି । ଏବେ ଗାଁର ଜଳ ପ୍ରକଳ୍ପର ଦାୟିତ୍ୱ ସିଧାସଳଖ ଭାବେ ଲୋକମାନଙ୍କ ହାତକୁ ଯିବ। ଏହି ଉଦ୍ଦେଶ୍ୟରେ ‘ଗ୍ରାମୀଣ ପାନୀୟ ଜଳ ଯୋଗାଣ ପରିଚାଳନା ଓ ରକ୍ଷଣାବେକ୍ଷଣ ନୀତି-୨୦୨୬’କୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଛି।
ଏନେଇ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଆୟୋଜିତ କ୍ୟାବିନେଟ ବୈଠକରେ ଏହି ନୀତି ସହିତ ସମୁଦାୟ ୧୧ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମଞ୍ଜୁରି ମିଳିଛି। ନୂଆ ନୀତି ଅନୁଯାୟୀ, ଗ୍ରାମ୍ୟସ୍ତରରେ ଗଠିତ କମିଟିମାନେ ଜଳ ପ୍ରକଳ୍ପର ଦୈନିକ ପରିଚାଳନା କାମ କରିବେ, ଯାହାଦ୍ୱାରା ସ୍ଥାନୀୟ ଲୋକଙ୍କ ଭୂମିକା ଓ ଦାୟିତ୍ୱ ବଢ଼ିବ।
ଅନ୍ୟପଟେ, ଜଳ ପ୍ରକଳ୍ପର କାମରେ ଅବହେଳା ଓ ବିଳମ୍ବ କରୁଥିବା ଠିକାଦାରମାନଙ୍କ ବିରୋଧରେ ସରକାର କଠୋର ମନୋଭାବ ନେଇଛନ୍ତି । ବିଭିନ୍ନ ପ୍ରକଳ୍ପରେ ବିଳମ୍ବ ହେବା ଦେଖି ୧୧୨୦ କୋଟି ଟଙ୍କା ଅର୍ଥଦଣ୍ଡ ଆଦାୟ ସହିତ ଏଫଆଇଆର୍ ମଧ୍ୟ ରୁଜୁ କରାଯାଇଛି।
ଏହାସହିତ ରାଜ୍ୟର ପରିବହନ ବ୍ୟବସ୍ଥାକୁ ଆଧୁନିକ ଓ ସୁବିଧାଜନକ କରିବା ଉଦ୍ଦେଶ୍ୟରେ ୩୪୦୦ କୋଟି ଟଙ୍କା ବ୍ୟୟର ‘ଅଟଳ ବସ୍ ଷ୍ଟାଣ୍ଡ’ ଯୋଜନାକୁ ମଧ୍ୟ କ୍ୟାବିନେଟ ହରିଆଁ ଝଣ୍ଡା ଦେଇଛି । ଏହି ପଦକ୍ଷେପ ଦ୍ୱାରା ରାଜ୍ୟର ବିଭିନ୍ନ ସ୍ଥାନରେ ଉନ୍ନତ ଓ ସୁବିଧାସମ୍ପନ୍ନ ବସ ଟର୍ମିନାଲ ନିର୍ମାଣ ହେବ ବୋଲି ଆଶା କରାଯାଉଛି ।
ସରକାରଙ୍କ ଏହି ନୂତନ ନୀତି ଓ ପଦକ୍ଷେପ ଗ୍ରାମ ଉନ୍ନୟନ ସହିତ ସହରୀୟ ସୁବିଧା ବିକାଶରେ ଏକ ନୂଆ ଦିଗ ଦେଖାଇବ ବୋଲି ମନ୍ତବ୍ୟ ମିଳୁଛି ।
ରାଜ୍ୟର ବିକାଶ ଓ ମୂଳଭୂତ ସୁବିଧା ବିସ୍ତାରକୁ ଗତି ଦେବା ପାଇଁ ରାଜ୍ୟ କ୍ୟାବିନେଟ ଗୁରୁତ୍ୱପୂର୍ଣ୍ଣ ୧୧ଟି ପ୍ରସ୍ତାବକୁ ଅନୁମୋଦନ ଦେଇଛି । ଏଥିରେ ଗ୍ରାମ ଅଞ୍ଚଳରେ ପାନୀୟ ଜଳ ବ୍ୟବସ୍ଥାକୁ ଦୀର୍ଘକାଳୀନ ଓ ସୁସଂଗଠିତ କରିବା ଲକ୍ଷ୍ୟରେ ‘ଗ୍ରାମୀଣ ପାନୀୟ ଜଳ ଯୋଗାଣ ପରିଚାଳନା ଓ ରକ୍ଷଣାବେକ୍ଷଣ ନୀତି-୨୦୨୬’କୁ ବିଶେଷ ଗୁରୁତ୍ୱ ଦିଆଯାଇଛି ।
ନୂତନ ନୀତି ଅନୁଯାୟୀ, ରାଜ୍ୟରେ ପୂର୍ବରୁ ସମାପ୍ତ ହୋଇଥିବା ବିଭିନ୍ନ ପାନୀୟ ଜଳ ପ୍ରକଳ୍ପ ଗୁଡ଼ିକୁ ଏବେ ଆହୁରି ଦକ୍ଷ ଭାବରେ ଚାଳନା କରାଯିବ। ସରକାରୀ ତଥ୍ୟ ଅନୁସାରେ, ୨୭ଟି ବଡ଼ ପାନୀୟ ଜଳ ପ୍ରକଳ୍ପ ଓ ୮୨ଟି ଜଳ ଶୋଧନ କେନ୍ଦ୍ର କାମ ସମ୍ପୂର୍ଣ୍ଣ ହୋଇଛି । ଏହାସହିତ ୩ ହଜାରରୁ ଅଧିକ ଏକକ ଗ୍ରାମ ଜଳ ପ୍ରକଳ୍ପ ଓ ୨,୭୦୦ରୁ ଅଧିକ ସୌର ଶକ୍ତି ଭିତ୍ତିକ ଜଳ ଯୋଗାଣ ବ୍ୟବସ୍ଥା ଚାଲୁ ହୋଇଛି ।
ଗ୍ରାମାଞ୍ଚଳରେ ଅତିରିକ୍ତ ଜଳ ସୁବିଧା ପାଇଁ ହଜାର ହଜାର ନଳକୂପ ସ୍ଥାପନ କରାଯାଇଛି, ଯାହା ଲୋକଙ୍କ ଦୈନିକ ଜୀବନକୁ ସହଜ କରିଛି । ଏହି ସମସ୍ତ ପ୍ରଣାଳୀକୁ ଦୀର୍ଘ ସମୟ ପର୍ଯ୍ୟନ୍ତ ସକ୍ରିୟ, ସୁରକ୍ଷିତ ଓ ଆର୍ଥିକ ଭାବେ ସ୍ଥିର ରଖିବା ପାଇଁ ନୂଆ ନୀତିରେ ବିଭିନ୍ନ ବ୍ୟବସ୍ଥା ସ୍ଥାନ ପାଇଛି ।
ଅନ୍ୟପଟେ, ରାଜ୍ୟର ପରିବହନ ଢାଞ୍ଚାକୁ ଆଧୁନିକ ରୂପ ଦେବା ପାଇଁ ୩୪୦୦ କୋଟି ଟଙ୍କାର ‘ଅଟଳ ବସ୍ ଷ୍ଟାଣ୍ଡ’ ଯୋଜନାକୁ ମଧ୍ୟ ମଞ୍ଜୁରି ମିଳିଛି । ଏହି ଯୋଜନା ଅଧୀନରେ ଆଗାମୀ କିଛି ବର୍ଷ ମଧ୍ୟରେ ରାଜ୍ୟର ଶତାଧିକ ବସ୍ ଷ୍ଟାଣ୍ଡକୁ ଉନ୍ନତ କରାଯିବ, ଯାହା ଯାତ୍ରୀମାନଙ୍କୁ ଆଧୁନିକ ସୁବିଧା ଯୋଗାଇବ।
ଏହାସହିତ ଜଳସମ୍ପଦ ବିଭାଗର କିଛି ମୁଖ୍ୟ ପ୍ରକଳ୍ପକୁ ମଧ୍ୟ ଅନୁମୋଦନ ମିଳିଛି । ଶକ୍ତି ଢାଞ୍ଚାକୁ ସୁଦୃଢ଼ କରିବା ପାଇଁ କେନ୍ଦୁଝର ଜିଲ୍ଲାରେ ବଡ଼ ମାପର ସବଷ୍ଟେସନ ନିର୍ମାଣ ପ୍ରସ୍ତାବକୁ ସ୍ୱୀକୃତି ଦିଆଯାଇଛି । ସେହିପରି, ରାଜ୍ୟର ଶ୍ରମ ସେବା ସମ୍ବନ୍ଧୀୟ ନିୟମାବଳୀରେ କିଛି ସଂଶୋଧନକୁ ମଧ୍ୟ କ୍ୟାବିନେଟ ହରିଆଁ ଝଣ୍ଡା ଦେଇଛି ।
ଏହି ସମସ୍ତ ନିଷ୍ପତ୍ତି ରାଜ୍ୟର ଗ୍ରାମ ଓ ସହର ଉଭୟ ଅଞ୍ଚଳରେ ଅବସ୍ଥାପନା ବିକାଶକୁ ଆହୁରି ତ୍ୱରାନ୍ୱିତ କରିବ ବୋଲି ଆଶା କରାଯାଉଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |