ସୋସିଆଲ ମିଡିଆରେ କଣ୍ଟେଣ୍ଟ ତିଆରି କରି କ୍ୟାରିୟର ଗଢ଼ିବାକୁ ଚାହୁଁଥିବା ଯୁବପିଢ଼ିଙ୍କ ପାଇଁ ଆସିଛି ଏକ ନୂଆ ସୁଯୋଗ। ଏବେ କେବଳ ଇନଷ୍ଟାଗ୍ରାମ, ୟୁଟ୍ୟୁବ କିମ୍ବା ଟିକ୍ଟକ୍ରେ ଭିଡିଓ ପୋଷ୍ଟ କରିବା ନୁହେଁ, ବରଂ କଣ୍ଟେଣ୍ଟ କ୍ରିଏସନକୁ ପେସାଦାର ଭାବେ ଶିଖିବା ପାଇଁ ମିଳିବ ସ୍ନାତକ ଡିଗ୍ରୀ।
ଶୁଣିବାକୁ ଅଲଗା ଲାଗୁଥିଲେ ମଧ୍ୟ ଆମେରିକାର ଏକ ପ୍ରମୁଖ ବିଶ୍ୱବିଦ୍ୟାଳୟ ଏହି କ୍ଷେତ୍ରକୁ ନେଇ ଆରମ୍ଭ କରିଛି ନୂଆ ବ୍ୟାଚେଲର ଡିଗ୍ରୀ ପ୍ରୋଗ୍ରାମ । ଡିଜିଟାଲ ମିଡିଆରେ ନିଜର ପରିଚୟ ସୃଷ୍ଟି କରିବାକୁ ଚାହୁଁଥିବା କଣ୍ଟେଣ୍ଟ କ୍ରିଏଟର ଓ ଇନ୍ଫ୍ଲୁଏନ୍ସରଙ୍କୁ ଏହି କୋର୍ସରେ ପ୍ରଫେସନାଲ ଶିକ୍ଷା ଓ ଟ୍ରେନିଂ ଦିଆଯିବ।
ଆମେରିକାର ଆରିଜୋନା ଷ୍ଟେଟ୍ ୟୁନିଭର୍ସିଟି (ASU) ପକ୍ଷରୁ Bachelor of Arts in Content Creation ନାମରେ ଏକ ନୂଆ ସ୍ନାତକ ଡିଗ୍ରୀ କୋର୍ସ ଆରମ୍ଭ କରାଯାଇଛି। ଏହି ପ୍ରୋଗ୍ରାମ୍ଟି ବିଶ୍ୱବିଦ୍ୟାଳୟର Walter Cronkite School of Journalism and Mass Communication ଅଧୀନରେ ପରିଚାଳିତ ହେବ।
ଏହା କେବଳ ମୋବାଇଲ୍ରେ ଭିଡିଓ ରେକର୍ଡ କରିବା ଶିଖାଇବାର କୋର୍ସ ନୁହେଁ। ଏଥିରେ ଭଲ କଣ୍ଟେଣ୍ଟ କିପରି ପ୍ରସ୍ତୁତ କରାଯିବ, ତାହାକୁ ଠିକ୍ ଦର୍ଶକଙ୍କ ପାଖରେ କିପରି ପହଞ୍ଚାଇବେ ଏବଂ ଡିଜିଟାଲ ପ୍ଲାଟଫର୍ମରେ ନିଜର ବ୍ରାଣ୍ଡ କିପରି ଗଢ଼ିବେ, ସେ ସମ୍ପର୍କରେ ଶିକ୍ଷା ଦିଆଯିବ।
କୋର୍ସରେ ପଡ୍କାଷ୍ଟିଂ, ଷ୍ଟୁଡିଓ ପ୍ରଡକ୍ସନ୍, କ୍ୟାମେରା ସାମ୍ନାରେ ପ୍ରେଜେଣ୍ଟେସନ୍, ଫଟୋଗ୍ରାଫି, ଭିଡିଓଗ୍ରାଫି, ଭିଡିଓ ଏଡିଟିଂ ଏବଂ ସୋସିଆଲ ମିଡିଆ ଷ୍ଟ୍ରାଟେଜି ଭଳି ବିଭିନ୍ନ ବିଷୟ ସାମିଲ ରହିଛି।
ଏହି ଡିଗ୍ରୀ ପ୍ରୋଗ୍ରାମ୍ର ସବୁଠାରୁ ବିଶେଷ ଦିଗ ହେଉଛି ଏହାର ଫାଇନାଲ ପ୍ରୋଜେକ୍ଟ। ଛାତ୍ରଛାତ୍ରୀଙ୍କୁ ନିଜ ପସନ୍ଦର ଏକ ସୋସିଆଲ ମିଡିଆ ପ୍ଲାଟଫର୍ମ ବାଛି ସେଥିପାଇଁ କଣ୍ଟେଣ୍ଟ ପ୍ରସ୍ତୁତ କରିବାକୁ ପଡ଼ିବ। ଏହା ସହ ଅଧିକ ଦର୍ଶକଙ୍କ ପାଖରେ ପହଞ୍ଚିବା ଓ ଅଡିଏନ୍ସ ବଢ଼ାଇବା ପାଇଁ ଯୋଜନା ମଧ୍ୟ ପ୍ରସ୍ତୁତ କରିବାକୁ ହେବ। କଣ୍ଟେଣ୍ଟର ପ୍ରଦର୍ଶନ ଓ ଅଡିଏନ୍ସ ଗ୍ରୋଥ୍କୁ ମଧ୍ୟ ବିଶ୍ଳେଷଣ କରାଯିବ।
କାହିଁକି ଆରମ୍ଭ ହେଲା ଏଭଳି ଡିଗ୍ରୀ କୋର୍ସ ?
ଗତ କିଛି ବର୍ଷ ମଧ୍ୟରେ କଣ୍ଟେଣ୍ଟ କ୍ରିଏଟରଙ୍କ ସଂଖ୍ୟା ଓ କ୍ରିଏଟର ଇକୋନୋମି ଦ୍ରୁତ ଗତିରେ ବୃଦ୍ଧି ପାଇଛି। ଇନଷ୍ଟାଗ୍ରାମ, ୟୁଟ୍ୟୁବ ଓ ଟିକ୍ଟକ୍ ଭଳି ପ୍ଲାଟଫର୍ମରେ କଣ୍ଟେଣ୍ଟ ପ୍ରସ୍ତୁତ କରିବା ଏବେ ଅନେକ ଯୁବପିଢ଼ିଙ୍କ ପାଇଁ ଏକ ପୂର୍ଣ୍ଣକାଳୀନ ପେସାରେ ପରିଣତ ହୋଇଛି।
ଏହି ବଢ଼ୁଥିବା ସୁଯୋଗକୁ ଦୃଷ୍ଟିରେ ରଖି ଆମେରିକାର କିଛି ବିଶ୍ୱବିଦ୍ୟାଳୟ କଣ୍ଟେଣ୍ଟ କ୍ରିଏସନ୍ ସମ୍ପର୍କିତ ମାଇନର୍, ସ୍ୱତନ୍ତ୍ର କୋର୍ସ ଓ ଡିଗ୍ରୀ ପ୍ରୋଗ୍ରାମ୍ ଆରମ୍ଭ କରିଛନ୍ତି। ସିରକ୍ୟୁଜ ୟୁନିଭର୍ସିଟି, କ୍ୱିନିପିଆକ୍ ୟୁନିଭର୍ସିଟି ଓ କଲରାଡୋ ଷ୍ଟେଟ୍ ୟୁନିଭର୍ସିଟି ଭଳି ଶିକ୍ଷାନୁଷ୍ଠାନରେ ମଧ୍ୟ ଏହି କ୍ଷେତ୍ର ସହ ଜଡ଼ିତ ବିଭିନ୍ନ ପ୍ରୋଗ୍ରାମ୍ ରହିଛି।
ତେବେ ଗୋଟିଏ କଥା ସ୍ପଷ୍ଟ ଯେ, ସୋସିଆଲ ମିଡିଆ କଣ୍ଟେଣ୍ଟ କ୍ରିଏସନ୍ ଏବେ ଆଉ କେବଳ ସଉକ ହୋଇ ରହିନାହିଁ। ଏହା ଧୀରେଧୀରେ ଏକ ପ୍ରଫେସନାଲ କ୍ୟାରିୟର ଭାବେ ପରିଚିତ ହେଉଛି ଏବଂ ଶିକ୍ଷା କ୍ଷେତ୍ରରେ ମଧ୍ୟ ସ୍ୱୀକୃତି ପାଉଛି।
ତଥାପି ସଫଳତା ପାଇଁ କେବଳ ଡିଗ୍ରୀ ଯଥେଷ୍ଟ ନୁହେଁ। ସୃଜନଶୀଳତା, ନିୟମିତ ପରିଶ୍ରମ, ଦର୍ଶକଙ୍କ ପସନ୍ଦକୁ ବୁଝିବା ଏବଂ ସମୟ ସହ ବଦଳୁଥିବା ଡିଜିଟାଲ ଟ୍ରେଣ୍ଡ ସହ ନିଜକୁ ଖାପ ଖୁଆଇବା ହିଁ ଜଣେ ସଫଳ କଣ୍ଟେଣ୍ଟ କ୍ରିଏଟରଙ୍କ ପାଇଁ ସବୁଠାରୁ ଜରୁରୀ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |