ଭୁବନେଶ୍ୱର : ବଡ ଦାଣ୍ଡରେ ରହିବନି ମଦ ଦୋକାନ । ରାଜ୍ୟ ସରକାର ପକ୍ଷରୁ ନୂଆ ଅବକାରୀ ନୀତିକୁ ବିଧାନସଭାରେ ଉପସ୍ଥାପନା କରାଯାଇଛି। ଅବକାରୀ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଏହି ନୀତିକୁ ପ୍ରସ୍ତୁତ କରିଥିବାବେଳେ, ୨୦୨୬ ରୁ ୨୦୨୯ ପର୍ଯ୍ୟନ୍ତ ତିନି ବର୍ଷ ଅବଧି ପାଇଁ ଏହାକୁ ଲାଗୁ କରାଯିବ ବୋଲି ଘୋଷଣା ହୋଇଛି । ତେବେ ୧ ଏପ୍ରିଲ ୨୦୨୬ ଠାରୁ ୩୧ ମାର୍ଚ୍ଚ ୨୦୨୯ ପର୍ଯ୍ୟନ୍ତ ଏହି ତ୍ରୈବାର୍ଷିକ ନୀତି ପ୍ରଭାବୀ ରହିବ।
ପୂର୍ବରୁ ପ୍ରଚଳିତ ବାର୍ଷିକ ଅବକାରୀ ନୀତିକୁ ବଦଳାଇ ଏଥର ସରକାର ତ୍ରୈବାର୍ଷିକ ନୀତି ଆଣିଛନ୍ତି। ଏହା ମାଧ୍ୟମରେ ନୀତିରେ ସ୍ଥିରତା, ସ୍ୱଚ୍ଛତା ଓ ଦୀର୍ଘମିୟାଦୀ ପରିକଳ୍ପନାକୁ ବଳ ମିଳିବ ବୋଲି ସରକାର ଆଶା ବ୍ୟକ୍ତ କରିଛନ୍ତି। ଆବଶ୍ୟକତା ଅନୁଯାୟୀ ଏହି ନୀତିରେ ପରିବର୍ତ୍ତନ କରିବା ପାଇଁ ସୁବିଧା ମଧ୍ୟ ରଖାଯାଇଛି।
ନୂଆ ନୀତିରେ ଗୁରୁତ୍ୱପୂର୍ଣ୍ଣ ଭାବେ ଅବକାରୀ ଶୁଳ୍କ ଉପରେ ୦.୫ ଶତଂଶ ଡି-ଆଡିକ୍ସନ ସେସ୍ ଲାଗୁ କରାଯାଇଛି। ଏହା ମାଧ୍ୟମରେ ମଦପାନର କ୍ଷତିକାରକ ପ୍ରଭାବକୁ ସ୍ୱୀକାର କରି ସଚେତନତା ଓ ନିରାସକ୍ତି କାର୍ଯ୍ୟକ୍ରମକୁ ଜୋର ଦେବା ଲକ୍ଷ୍ୟ ରହିଛି । ଏହି ସେସରୁ ଆସୁଥିବା ରାଶିକୁ ଡି-ଆଡିକ୍ସନ କେନ୍ଦ୍ର ସ୍ଥାପନ ଓ ସୁଦୃଢ଼କରଣରେ ବ୍ୟୟ କରାଯିବ।
ଏହାସହିତ ଅବକାରୀ ଲାଇସେନ୍ସ ପାଇଁ ଆବେଦନ ଶୁଳ୍କରେ ୧୦ ଶତଂଶ ବୃଦ୍ଧି କରାଯାଇଥିବାବେଳେ, ପ୍ରତିବର୍ଷ ଲାଇସେନ୍ସ ଶୁଳ୍କ ୧୦ ରୁ ୨୦ ଶତଂଶ ପର୍ଯ୍ୟନ୍ତ ବଢ଼ିବ। IMFL ଓ ଦେଶୀ ମଦ ଉପରେ ମଧ୍ୟ ଅବକାରୀ ଶୁଳ୍କ ବୃଦ୍ଧି ହୋଇଛି।
ନୂତନ ନୀତି ଅନୁଯାୟୀ OFF, CL ଓ OS ଶ୍ରେଣୀର ନୂତନ ମଦ ଦୋକାନ ଖୋଲିବାକୁ ଅନୁମତି ମିଳିବ ନାହିଁ। ବିଶେଷକରି ଗ୍ରାମୀଣ ଅଞ୍ଚଳରେ ଏହିପରି ଦୋକାନ ଖୋଲିବା ଉପରେ ସରକାର କଡା ନିୟନ୍ତ୍ରଣ ଲାଗୁ କରିଛନ୍ତି। ତଥାପି ଶିଳ୍ପାଞ୍ଚଳର ୩-ତାରକା ଓ ତାଠାରୁ ଉଚ୍ଚ ହୋଟେଲ ଓ କ୍ଲବ ମାନଙ୍କୁ କିଛି ଛାଡ଼ ଦିଆଯାଇଛି।
ଧାର୍ମିକ ଓ ସାମ୍ପ୍ରଦାୟିକ ଭାବନାକୁ ମନେ ରଖି ପୁରୀର ଶ୍ରୀଜଗନ୍ନାଥ ମନ୍ଦିର ଓ ବଡଦାଣ୍ଡ ଚାରିପାଖରେ କୌଣସି ଅବକାରୀ ଦୋକାନ ଚାଲିବ ନାହିଁ ବୋଲି ସ୍ପଷ୍ଟ କରାଯାଇଛି। ସେଥିପାଇଁ ଘରକୁ ମଦ ଡେଲିଭରି ବ୍ୟବସ୍ଥାକୁ ମଧ୍ୟ ସରକାର ଅନୁମତି ଦେଇ ନାହାଁନ୍ତି।
ସମଗ୍ର ଭାବେ ଦେଖିଲେ, ନୂଆ ଅବକାରୀ ନୀତି ରାଜ୍ୟରେ ନିୟମିତିକରଣ, ଆୟ ବୃଦ୍ଧି ସହ ସାମାଜିକ ଦାୟିତ୍ୱକୁ ଗୁରୁତ୍ୱ ଦେଇ ତିଆରି ହୋଇଥିବା ଦେଖାଯାଉଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |