ଭୁବନେଶ୍ୱର : ହ୍ଵାଟ୍ସଆପରେ ଆସିଲା ନୂଆ ଫିଚର । ଏଣିକି ୟୁଜର ପଠାଇପାରିବେ ସିକ୍ରେଟ୍ ମେସେଜ୍ । ମେଟା ମାଲିକାନାଧୀନ ଲୋକପ୍ରିୟ ମେସେଜିଂ ଆପ୍ ହ୍ୱାଟ୍ସଆପ୍ ନିଜ ୟୁଜରଙ୍କ ପାଇଁ ଆଉ ଏକ ନୂଆ ଫିଚର ଆଣିବାକୁ ପ୍ରସ୍ତୁତ ହେଉଛି। ବ୍ୟକ୍ତିଗତ ଚାଟ୍କୁ ଅଧିକ ସୁରକ୍ଷିତ ଓ ଗୋପନୀୟ କରିବା ଉଦ୍ଦେଶ୍ୟରେ କମ୍ପାନୀ ଏବେ ‘ଭ୍ୟୁ ୱାନ୍ସ’ ଫିଚରକୁ ଟେକ୍ସଟ୍ ମେସେଜ୍ ପାଇଁ ମଧ୍ୟ ଆଣିବାକୁ ଯାଉଛି। ଏହି ଫିଚରକୁ ନେଇ ଦୀର୍ଘଦିନ ଧରି ୟୁଜରମାନେ ଅପେକ୍ଷା କରୁଥିଲେ।
ଟେକ୍ସଟ୍ ମେସେଜ୍ ପାଇଁ ଆସିବ ‘ଭ୍ୟୁ ୱାନ୍ସ’
ଏପର୍ଯ୍ୟନ୍ତ ହ୍ୱାଟ୍ସଆପ୍ରେ ଫଟୋ ଓ ଭିଡିଓକୁ ‘ଭ୍ୟୁ ୱାନ୍ସ’ ମୋଡ୍ରେ ପଠାଇବା ସୁବିଧା ଥିଲା। ଏବେ ସେହି ସୁବିଧା ଟେକ୍ସଟ୍ ମେସେଜ୍ ପାଇଁ ମଧ୍ୟ ଉପଲବ୍ଧ ହେବ। ହ୍ୱାଟ୍ସଆପ୍ର ଆଗାମୀ ଫିଚର ସମ୍ପର୍କରେ ସୂଚନା ଦେଉଥିବା WABetaInfo ଅନୁସାରେ, ଏହି ଫିଚର ବର୍ତ୍ତମାନ ଡେଭଲପମେଣ୍ଟ ପର୍ଯ୍ୟାୟରେ ରହିଛି ଏବଂ ଏହାର ବିଟା ପରୀକ୍ଷା ଆରମ୍ଭ ହୋଇଛି।
କିପରି କାମ କରିବ ଏହି ଫିଚର?
ୟୁଜର ଯେତେବେଳେ କୌଣସି ମେସେଜ୍ ପଠାଇବା ବେଳେ ‘ଭ୍ୟୁ ୱାନ୍ସ’ ବିକଳ୍ପ ଚୟନ କରିବେ, ସେହି ମେସେଜ୍ଟି ରିସିଭର କେବଳ ଥରେ ମାତ୍ର ପଢ଼ିପାରିବେ। ମେସେଜ୍ଟି ଖୋଲିବା ଓ ପଢ଼ିବା ପରେ ତାହା ସ୍ୱୟଂଚାଳିତ ଭାବେ ଚାଟ୍ରୁ ହଟିଯିବ। ଏହା ଦ୍ୱାରା ସମ୍ବେଦନଶୀଳ କିମ୍ବା ବ୍ୟକ୍ତିଗତ ସୂଚନା ସେୟାର କରିବା ଅଧିକ ସୁରକ୍ଷିତ ହେବ।
ସ୍କ୍ରିନସଟ୍ ନେବା ଉପରେ ମଧ୍ୟ ରହିବ କଟକଣା
ଏହି ଫିଚରର ଆଉ ଏକ ବିଶେଷତା ହେଉଛି, ‘ଭ୍ୟୁ ୱାନ୍ସ’ ମେସେଜ୍ର ସ୍କ୍ରିନସଟ୍ ନେବା ସୁବିଧା ରହିବ ନାହିଁ। ଫଳରେ ମେସେଜ୍ର ଗୋପନୀୟତା ଅଧିକ ସୁରକ୍ଷିତ ରହିବ। ଏହାସହିତ ଏକଥର ପଢ଼ିବା ପରେ ମେସେଜ୍କୁ ପୁଣିଥରେ ଖୋଲି ଦେଖିବା ମଧ୍ୟ ସମ୍ଭବ ହେବ ନାହିଁ।
ୟୁଜରଙ୍କ ଚାଟିଂ ଅନୁଭବକୁ ଆହୁରି ଉନ୍ନତ ଓ ସୁରକ୍ଷିତ କରିବା ପାଇଁ ହ୍ୱାଟ୍ସଆପ୍ ଲଗାତାର ନୂଆ ନୂଆ ଫିଚର ଆଣୁଛି। ତେବେ ଏହି ନୂଆ ଫିଚର ସମସ୍ତ ୟୁଜରଙ୍କ ପାଇଁ କେବେ ଉପଲବ୍ଧ ହେବ, ସେନେଇ କମ୍ପାନୀ ପକ୍ଷରୁ ଏଯାବତ୍ କୌଣସି ସ୍ପଷ୍ଟ ଘୋଷଣା କରାଯାଇନାହିଁ। ହେଲେ ଖୁବଶୀଘ୍ର ଏହା ଲଞ୍ଚ ହେବାର ସମ୍ଭାବନା ରହିଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |