ରୋମରେ ଭାରତର ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦିଙ୍କୁ ଇଟାଲୀର ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି ଭବ୍ୟ ସ୍ୱାଗତ ଜଣାଇଛନ୍ତି । ପାଞ୍ଚ ଦେଶୀୟ ବିଦେଶ ଗସ୍ତର ଶେଷ ପର୍ଯ୍ୟାୟରେ ମଙ୍ଗଳବାର ରାତିରେ ରୋମରେ ପହଞ୍ଚିଥିବା ମୋଦିଙ୍କୁ ପ୍ରବାସୀ ଭାରତୀୟମାନେ ମଧ୍ୟ ଉତ୍ସାହର ସହ ସ୍ୱାଗତ କରିଥିଲେ । ବିମାନବନ୍ଦରରୁ ଆରମ୍ଭ କରି ରୋମର ବିଭିନ୍ନ ସ୍ଥାନ ପର୍ଯ୍ୟନ୍ତ ଭାରତୀୟ ସମୁଦାୟର ଉପସ୍ଥିତି ଦେଖିବାକୁ ମିଳିଥିଲା ।
ଦୁଇ ଦେଶର ନେତାଙ୍କ ମଧ୍ୟରେ ହୋଇଥିବା ସାକ୍ଷାତକାରରେ ଭାରତ-ଇଟାଲୀ ସମ୍ପର୍କକୁ ଆହୁରି ସୁଦୃଢ କରିବା ଉପରେ ଗୁରୁତ୍ୱ ଦିଆଯାଇଥିଲା । ବାଣିଜ୍ୟ, ନୂଆ ପ୍ରଯୁକ୍ତି, ସବୁଜ ଶକ୍ତି, ନବସୃଜନ ଏବଂ ରଣନୈତିକ ସହଯୋଗ ଭଳି ମୁଖ୍ୟ ବିଷୟରେ ଉଭୟ ପକ୍ଷ ଆଲୋଚନା କରିଥିଲେ । ଦୁଇ ନେତାଙ୍କ ଘନିଷ୍ଠ ସମ୍ପର୍କ ଏହି ବୈଠକରେ ସ୍ପଷ୍ଟ ଭାବେ ପ୍ରତିଫଳିତ ହୋଇଥିଲା ।
ଜିଓର୍ଜିଆ ମେଲୋନି ସାମାଜିକ ଗଣମାଧ୍ୟମରେ “ରୋମକୁ ସ୍ୱାଗତ, ମୋର ବନ୍ଧୁ” ବୋଲି ଲେଖି ପ୍ରଧାନମନ୍ତ୍ରୀ ମୋଦିଙ୍କୁ ଶୁଭେଚ୍ଛା ଜଣାଇଥିଲେ । ଏହି ସନ୍ଦେଶ ଦୁଇ ନେତାଙ୍କ ମଧ୍ୟରେ ଥିବା ବନ୍ଧୁତ୍ଵକୁ ପ୍ରକାଶ କରିଥିବା ବେଳେ ଗଣମାଧ୍ୟମରେ ମଧ୍ୟ ବେଶ୍ ଚର୍ଚ୍ଚାର ବିଷୟ ହୋଇଥିଲା ।
ପ୍ରବାସୀ ଭାରତୀୟମାନଙ୍କ ଭବ୍ୟ ସ୍ୱାଗତ ପରେ ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ଇଟାଲୀରେ ଥିବା ଭାରତୀୟ ସମୁଦାୟର ଦେଶପ୍ରେମ ଏବଂ ଭାରତ-ଇଟାଲୀ ସମ୍ପର୍କକୁ ମଜବୁତ କରିବା ପ୍ରତି ସେମାନଙ୍କ ଅବଦାନ ଅତ୍ୟନ୍ତ ପ୍ରଶଂସନୀୟ । ବିଦେଶରେ ରହୁଥିବା ଭାରତୀୟମାନେ ସମଗ୍ର ବିଶ୍ୱରେ ଦେଶର ସମ୍ମାନ ବଢ଼ାଇ ଚାଲିଛନ୍ତି ।
ପଶ୍ଚିମ ଏସିଆର ତିବ୍ର ଭୂ-ରାଜନୈତିକ ପରିସ୍ଥିତି ମଧ୍ୟରେ ମୋଦିଙ୍କ ଏହି ବିଦେଶ ଗସ୍ତକୁ ବିଶେଷ ଗୁରୁତ୍ୱ ଦିଆଯାଉଛି । ସଂଯୁକ୍ତ ଆରବ ଏମିରେଟ୍ସ, ନେଦରଲ୍ୟାଣ୍ଡ, ସ୍ୱିଡେନ୍, ନରୱେ ଏବଂ ଇଟାଲୀ ସହ ଭାରତର ଅର୍ଥନୈତିକ ଓ ରଣନୈତିକ ସମ୍ପର୍କକୁ ଆହୁରି ଗଭୀର କରିବା ହେଉଛି ଏହି ଗସ୍ତର ମୁଖ୍ୟ ଲକ୍ଷ୍ୟ ।
ଏହି ଅବସରରେ ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡର ଉପରେ ମଧ୍ୟ ଗଭୀର ଆଲୋଚନା ହେବାର ସମ୍ଭାବନା ରହିଛି । ସହଯୋଗର ନୂଆ ଦିଗ ଖୋଜିବା ସହିତ ୨୦୨୫ ରୁ ୨୦୨୯ ପର୍ଯ୍ୟନ୍ତର ମିଳିତ ରଣନୈତିକ କାର୍ଯ୍ୟଯୋଜନାକୁ ମଧ୍ୟ ସମୀକ୍ଷା କରାଯିବ । ପ୍ରଧାନମନ୍ତ୍ରୀ ମୋଦି ରୋମରେ ଥିବା ଖାଦ୍ୟ ଓ କୃଷି ସଂଗଠନର ମୁଖ୍ୟାଳୟ ପରିଦର୍ଶନ କରିବାର କାର୍ଯ୍ୟକ୍ରମ ମଧ୍ୟ ରହିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |