ଭୁବନେଶ୍ୱର : ଓଡ଼ିଶାରେ ଶିଳ୍ପାୟନକୁ ବଡ଼ ବଳ । ଓଡ଼ିଶାରେ ଶିଳ୍ପ ବିକାଶ ଓ ରୋଜଗାର ସୃଷ୍ଟି କ୍ଷେତ୍ରରେ ଆଉ ଏକ ମାଇଲଖୁଣ୍ଟ ସ୍ଥାପିତ ହୋଇଛି । ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟରାନ୍ସ ଅଥରିଟି (SLSWCA) ବୈଠକରେ ୩,୭୯୩.୩୩ କୋଟି ଟଙ୍କାର ୨୪ଟି ଶିଳ୍ପ ପ୍ରକଳ୍ପକୁ ସବୁଜ ସଙ୍କେତ ମିଳିଛି । ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ଆୟୋଜିତ ୧୪୭ତମ ବୈଠକରେ ଏହି ପ୍ରସ୍ତାବଗୁଡ଼ିକ ଅନୁମୋଦନ ପାଇଛି। ଯାହା ଓଡିଶାବାସୀଙ୍କ ପାଇଁ ବଡ ଖବର ।
ଏହି ପ୍ରକଳ୍ପ ଗୁଡ଼ିକ ମାଧ୍ୟମରେ ରାଜ୍ୟରେ ପ୍ରାୟ ୨୦ ହଜାର ନୂଆ ନିଯୁକ୍ତି ସୁଯୋଗ ସୃଷ୍ଟି ହେବା ସହ ଅର୍ଥନୀତିକ କାର୍ଯ୍ୟକଳାପକୁ ଅଧିକ ଗତି ମିଳିବ। ଶିଳ୍ପ, ପର୍ଯ୍ୟଟନ, ଗ୍ରୀନ୍ ଏନର୍ଜି, ବସ୍ତ୍ର ଉତ୍ପାଦନ, ଖାଦ୍ୟ ପ୍ରକ୍ରିୟାକରଣ ଏବଂ ଇଭି ଉତ୍ପାଦନ ଭଳି ବିଭିନ୍ନ କ୍ଷେତ୍ରରେ ଏହି ନିବେଶ ହେବାକୁ ଯାଉଛି।
୧୪ ଜିଲ୍ଲାରେ ବ୍ୟାପିବ ଶିଳ୍ପ ବିକାଶ
ନୂଆ ଅନୁମୋଦିତ ପ୍ରକଳ୍ପ ଗୁଡ଼ିକ ଖୋର୍ଦ୍ଧା, ଢେଙ୍କାନାଳ, ଯାଜପୁର, ଝାରସୁଗୁଡ଼ା, କୋରାପୁଟ, ସମ୍ବଲପୁର, କେନ୍ଦୁଝର, ବଲାଙ୍ଗୀର, କଟକ, ପୁରୀ, ଗଞ୍ଜାମ, ସୁନ୍ଦରଗଡ଼, ଜଗତସିଂହପୁର ଓ ମୟୂରଭଞ୍ଜ ସମେତ ୧୪ଟି ଜିଲ୍ଲାରେ ସ୍ଥାପିତ ହେବ। ଏହା ମାଧ୍ୟମରେ ରାଜ୍ୟର ବିଭିନ୍ନ ଅଞ୍ଚଳରେ ସନ୍ତୁଳିତ ଶିଳ୍ପ ବିକାଶ ସମ୍ଭବ ହେବ।
ବସ୍ତ୍ର ଶିଳ୍ପରେ ସର୍ବାଧିକ ନିଯୁକ୍ତି
ଖୋର୍ଦ୍ଧାରେ ନନ୍ଦରାଜ ଟେକ୍ସଟାଇଲ୍ସ ୧୬୮.୬୪ କୋଟି ଟଙ୍କାରେ ନୂଆ ଉତ୍ପାଦନ ୟୁନିଟ୍ ସ୍ଥାପନ କରିବ, ଯେଉଁଥିରେ ୧୦ ହଜାରରୁ ଅଧିକ ଲୋକଙ୍କୁ ନିଯୁକ୍ତି ମିଳିବ। ସେହିପରି ସମ୍ବଲପୁରରେ ସାହି ଏକ୍ସପୋର୍ଟସ୍ ଗାର୍ମେଣ୍ଟ ୟୁନିଟ୍ ସ୍ଥାପନ କରି ୧,୮୪୦ ଜଣଙ୍କୁ ଚାକିରି ସୁଯୋଗ ଦେବ। ଗଞ୍ଜାମରେ ମା’ ତାରାତାରିଣୀ ଟେକ୍ସଟାଇଲ୍ ପାର୍କ ମଧ୍ୟ ନୂଆ ନିବେଶ ଆକର୍ଷଣ କରିବ।
ଗ୍ରୀନ୍ ଏନର୍ଜି ଓ ଆଧୁନିକ ପ୍ରଯୁକ୍ତିରେ ବଡ଼ ନିବେଶ
ଢେଙ୍କାନାଳରେ ସିଇଏସସି ଗ୍ରୀନ୍ ପାୱାର ୬୮୩.୮୩ କୋଟି ଟଙ୍କାର ବ୍ୟାଟେରୀ ଏନର୍ଜି ଷ୍ଟୋରେଜ୍ ସିଷ୍ଟମ୍ ସ୍ଥାପନ କରିବ। ଅନ୍ୟପକ୍ଷରେ ଖୋର୍ଦ୍ଧାରେ ୫୦୦ କୋଟି ଟଙ୍କା ବିନିଯୋଗରେ ଲ୍ୟାବ୍ ଗ୍ରୋନ୍ ଡାଇମଣ୍ଡ ଉତ୍ପାଦନ କାରଖାନା ଗଢ଼ି ଉଠିବ, ଯାହା ରାଜ୍ୟର ଆଧୁନିକ ଶିଳ୍ପ କ୍ଷେତ୍ରକୁ ନୂଆ ଦିଗ ଦେବ।
ପର୍ଯ୍ୟଟନ କ୍ଷେତ୍ରରେ ନୂଆ ସମ୍ଭାବନା
କୋରାପୁଟରେ ୫-ଷ୍ଟାର ରିସୋର୍ଟ ସମେତ ଏକାଧିକ ପର୍ଯ୍ୟଟନ ପ୍ରକଳ୍ପକୁ ମଞ୍ଜୁରୀ ମିଳିଛି। ଏହାଛଡ଼ା କେନ୍ଦୁଝର, ପୁରୀ, ଜଗତସିଂହପୁର, ସୁନ୍ଦରଗଡ଼ ଓ ମୟୂରଭଞ୍ଜରେ ନୂଆ ହୋଟେଲ୍ ଓ ରିସୋର୍ଟ ନିର୍ମାଣ ହେବ। ଏହି ପ୍ରକଳ୍ପ ଗୁଡ଼ିକ ପର୍ଯ୍ୟଟନ ଭିତ୍ତିଭୂମିକୁ ସୁଦୃଢ଼ କରିବା ସହ ସ୍ଥାନୀୟ ରୋଜଗାର ବୃଦ୍ଧିରେ ସହାୟକ ହେବ।
ଇସ୍ପାତ, ମ୍ୟାନୁଫ୍ୟାକ୍ଚରିଂ ଓ ଇଭି କ୍ଷେତ୍ରରେ ମଧ୍ୟ ଜୋର
ଯାଜପୁରରେ ଜେଏସଡବ୍ଲ୍ୟୁ ସେଭରଫିଲ୍ଡସ ଷ୍ଟିଲ୍ ଫ୍ୟାବ୍ରିକେସନ ୟୁନିଟ୍ ସ୍ଥାପନ କରିବାକୁ ଥିବାବେଳେ, ଝାରସୁଗୁଡ଼ାରେ କୋଶଲ ସେରାମିକ୍ସ ନିଜର ଉତ୍ପାଦନ କ୍ଷମତା ବୃଦ୍ଧି କରିବ। ଖୋର୍ଦ୍ଧାରେ ହିନ୍ଦୁସ୍ତାନ କୋକାକୋଲା ବେଭରେଜେସ୍ ଓ ଲିଥ୍ରୋସ୍ ବ୍ୟାଟେରିଜ୍ ନୂଆ ନିବେଶ କରିବାକୁ ଯାଉଛନ୍ତି, ଯାହା ଇଭି ଓ ଉତ୍ପାଦନ କ୍ଷେତ୍ରକୁ ଅଧିକ ଶକ୍ତିଶାଳୀ କରିବ।
‘ସମୃଦ୍ଧ ଓଡ଼ିଶା ୨୦୩୬’ ଲକ୍ଷ୍ୟ ଦିଗରେ ଆଉ ଏକ ପଦକ୍ଷେପ
ସରକାରଙ୍କ ସିଙ୍ଗଲ ୱିଣ୍ଡୋ ବ୍ୟବସ୍ଥା ନିବେଶକମାନଙ୍କ ପାଇଁ ଅନୁମୋଦନ ପ୍ରକ୍ରିୟାକୁ ସହଜ ଓ ଦ୍ରୁତ କରିଛି। ନୂଆ ଶିଳ୍ପ ପ୍ରକଳ୍ପ ଗୁଡ଼ିକ କେବଳ ରୋଜଗାର ସୃଷ୍ଟି କରିବ ନାହିଁ, ବରଂ ‘ସମୃଦ୍ଧ ଓଡ଼ିଶା ୨୦୩୬’ ଲକ୍ଷ୍ୟ ହାସଲରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନେବ। ଏହା ଓଡ଼ିଶାକୁ ପୂର୍ବ ଭାରତର ଏକ ପ୍ରମୁଖ ଶିଳ୍ପ ଓ ନିବେଶ କେନ୍ଦ୍ର ଭାବେ ପ୍ରତିଷ୍ଠିତ କରିବାରେ ସହାୟକ ହେବ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |