ଖୋର୍ଦ୍ଧା : ସେ ଉଚ୍ଚଶିକ୍ଷିତା ସହିତ ସର୍ବଗୁଣ ସମ୍ପର୍ଣ୍ଣା। ହେଲେ ଚାଷ ନିଶା ବା ଚାଷ କାମ ଆଜି ତାଙ୍କୁ ଦେଇଛି ନୂଆ ପରିଚୟ । ଆଉ ଏହି ଚାଷ କରି ବାର୍ଷିକ ଆୟ କରୁଛନ୍ତି ୭ ଲକ୍ଷ ଟଙ୍କା । ତେବେ ଏହି ଚାଷ ଯେ କେବଳ ତାଙ୍କୁ ପରିଚୟ ଦେଇନି ବରଂ ସ୍ୱାବଲମ୍ବୀ ମଧ୍ୟ କରିଛି । ଖାଲି ସେତିକି ନୁହେଁ ନିଜେ ସ୍ୱାବଲମ୍ବୀ ହେବାସହ ଅନେକ ମହିଳାଙ୍କୁ ମଧ୍ୟ ରୋଜଗାରକ୍ଷମ କରିଛନ୍ତି । ତେବେ ଏବେ ତାଙ୍କ ଚାଷ ଜମିରେ ଖେଳୁଛି ଏକର ଏକର ସୁନାର ଫସଲ । ସୋରିଷ ଫୁଲରେ ଭର୍ତ୍ତି ହୋଇଯାଇଛି ପୁରା ଚାଷ କ୍ଷେତ। ଆଉ ଯାହାକୁ ଦେଖିଲେ ଯେକୌଣସି ଲୋକର ମନ ପୂରି ଉଠିବା ସହିତ ଆଖି ଖୋସି ହେଇଯାଉଛି ।
ଉଚ୍ଚ ଶିକ୍ଷା ଲାଭ କରିଥିବା ସତ୍ତ୍ୱେ ଚାକିରି ପଥକୁ ଛାଡ଼ି କୃଷିକୁ ଜୀବନର ଲକ୍ଷ୍ୟ କରିଥିବା ଜଣେ ମହିଳା ଆଜି ସଫଳତାର ନୂଆ ଦୃଷ୍ଟାନ୍ତ ସୃଷ୍ଟି କରିଛନ୍ତି । ସେହି ସଫଳ ଚାଷୀ ହେଲେ ବେଗୁନିଆ ଅଞ୍ଚଳର ରାଜଶ୍ରୀ ପଣ୍ଡା। ପ୍ରାୟ ପାଞ୍ଚ ଏକର ଜମିରେ ସମନ୍ୱିତ କୃଷି ପଦ୍ଧତି ଅନୁସରଣ କରି ସେ ବିଭିନ୍ନ ପ୍ରକାରର ଫସଲ ଚାଷ କରୁଛନ୍ତି । ତୈଳବୀଜ ଫସଲରୁ ଆରମ୍ଭ କରି ପନିପରିବା ଓ ଶାଗ-ସବୁଜି ପରିବା ପର୍ଯ୍ୟନ୍ତ ବିଭିନ୍ନ ଉତ୍ପାଦନ ତାଙ୍କ କ୍ଷେତରେ ଦେଖିବାକୁ ମିଳୁଛି। ବିଶେଷ କରି ସୋରିଷ ଫୁଲରେ ଭରିଥିବା କ୍ଷେତ ଦୃଶ୍ୟ ଏକ ଆକର୍ଷଣୀୟ ପରିବେଶ ସୃଷ୍ଟି କରୁଛି।
କେବଳ ପାରମ୍ପରିକ ଚାଷରେ ସୀମିତ ନ ରହି, ରାଜଶ୍ରୀ ଆଧୁନିକ ଓ ପ୍ରାକୃତିକ ପଦ୍ଧତିକୁ ମିଶାଇ ଚାଷ କରୁଛନ୍ତି । ଛତୁ ଚାଷ ସହିତ ଅନ୍ୟାନ୍ୟ ବିକଳ୍ପ ଚାଷ ମାଧ୍ୟମରେ ସେ ନିଜ ଆୟକୁ ବଢ଼ାଇ ପାରିଛନ୍ତି। ଏହି ପ୍ରୟାସ ଫଳରେ ସେ ବର୍ଷକୁ ପ୍ରାୟ ୬ରୁ ୭ ଲକ୍ଷ ଟଙ୍କା ପର୍ଯ୍ୟନ୍ତ ଅର୍ଜନ କରୁଛନ୍ତି।
କୃଷିକାର୍ଯ୍ୟ ପ୍ରତି ତାଙ୍କ ଅତୁଟ ପ୍ରତିବଦ୍ଧତା ଓ ପରିଶ୍ରମ ତାଙ୍କୁ ଏକ ସଫଳ ମହିଳା ଚାଷୀ ଭାବେ ପରିଚିତ କରାଇଛି । ଦିନରାତି କ୍ଷେତରେ କାମ କରି ସେ ନିଜ ସ୍ଵପ୍ନକୁ ସାକାର କରିଛନ୍ତି । ତାଙ୍କ ସଫଳତାକୁ ସ୍ୱୀକାର କରି ବିଭିନ୍ନ ସଂସ୍ଥା ପକ୍ଷରୁ ସମ୍ମାନ ମଧ୍ୟ ମିଳିଛି। ସ୍ମାର୍ଟ କୃଷି ପଦ୍ଧତି ଅନୁସରଣ କରିବା ପାଇଁ ସେ ପୁରସ୍କୃତ ହୋଇଥିବା ସୂଚନା ମିଳିଛି।
କେବଳ ନିଜେ ସ୍ଵାବଲମ୍ବୀ ହେବାରେ ସୀମିତ ନରହି, ରାଜଶ୍ରୀ ଗ୍ରାମର ଅନ୍ୟ ପରିବାରଙ୍କୁ ମଧ୍ୟ ରୋଜଗାର ସୁଯୋଗ ଯୋଗାଇ ଦେଉଛନ୍ତି । ତାଙ୍କର ଏହି ପଦକ୍ଷେପ ଗ୍ରାମୀଣ ଅର୍ଥନୀତିକୁ ମଜବୁତ କରିବାରେ ସହାୟକ ହୋଇଛି।
କୃଷି କ୍ଷେତ୍ରରେ ନୂତନ ପୀଢ଼ି ଆଗକୁ ଆସିବାକୁ ଆହ୍ୱାନ କରି ସେ କହିଛନ୍ତି ଯେ, ଆଧୁନିକ ଓ ସମନ୍ୱିତ ପଦ୍ଧତି ଅନୁସରଣ କଲେ କୃଷିରେ ଭଲ ଆୟ ସମ୍ଭବ । ଆଜିର ସମାଜରେ ଚାଷକାମ ପ୍ରତି ଅନେକଙ୍କ ଆଗ୍ରହ କମିଥିବା ବେଳେ, ଖାଦ୍ୟର ଗୁଣମାନ ନେଇ ଚିନ୍ତା ବଢ଼ିଛି । ବଜାରରେ ମିଳୁଥିବା ଅଧିକାଂଶ ପନିପରିବାରେ କୀଟନାଶକ ବ୍ୟବହାର ହେତୁ ସେଗୁଡ଼ିକ ଶରୀର ପାଇଁ କ୍ଷତିକାରକ ହେଉଥିବା ଅଭିଯୋଗ ଉଠୁଛି।
ଏହି ପରିସ୍ଥିତିକୁ ଦୃଷ୍ଟିରେ ରଖି ରାଜଶ୍ରୀ ନିଜେ ଚାଷ କରି ସୁସ୍ଥ ଓ ରସାୟନମୁକ୍ତ ଖାଦ୍ୟ ଉତ୍ପାଦନରେ ଆଗୁଆନ ହୋଇଛନ୍ତି । ନିଜ ପରିବାର ପାଇଁ ସୁରକ୍ଷିତ ଖାଦ୍ୟ ଯୋଗାଇବା ସହିତ ଅନ୍ୟମାନଙ୍କୁ ମଧ୍ୟ ସ୍ୱାସ୍ଥ୍ୟକର ପନିପରିବା ପ୍ରଦାନ କରିବାକୁ ସେ ଲକ୍ଷ୍ୟ ରଖିଛନ୍ତି।
ତାଙ୍କ କ୍ଷେତରେ ସୋରିଷ, ମୁଗ, କୋଳଥ, ରାଶି ପରି ତୈଳବୀଜ ଓ ଡାଲି ଫସଲ ସହିତ ଆଳୁ, ପିଆଜ, ରସୁଣ, ଧନିଆ ଓ ମୂଳା ପରି ବିଭିନ୍ନ ପନିପରିବା ଚାଷ କରାଯାଉଛି । ବିଭିନ୍ନ ପ୍ରକାର ଫସଲ ଚାଷ ମାଧ୍ୟମରେ ସେ ନିଜ ଆୟ ଓ ଉତ୍ପାଦନକୁ ବଢ଼ାଇ ପାରିଛନ୍ତି।
ଆରମ୍ଭରେ ସେ କେବଳ ଧାନ ଉତ୍ପାଦନ ଉପରେ ଭରସା କରୁଥିଲେ ଏବଂ ଉଷୁନା ଚାଉଳ ତିଆରି କରି ବଜାରରେ ବିକ୍ରି କରୁଥିଲେ। କିନ୍ତୁ ସେଥିରୁ ଆଶାନୁରୂପ ଲାଭ ମିଳିନଥିଲା।
ପରବର୍ତ୍ତୀ ସମୟରେ କୃଷି ବିଭାଗର ପରାମର୍ଶ ଓ ସହଯୋଗରେ ସେ ବିଭିନ୍ନ ଫସଲର ସମନ୍ୱିତ ଚାଷ ଆରମ୍ଭ କରିଥିଲେ। ଧାନ ପରେ ମୁଗ, ସୂର୍ଯ୍ୟମୁଖୀ ଓ ସୋରିଷ ଚାଷ କରି ସେ ଅଧିକ ଲାଭ ଅର୍ଜନ କରିପାରିଛନ୍ତି।
ସରକାରୀ ସହଯୋଗ ମଧ୍ୟ ଏହି ସଫଳତାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଛି। କୃଷି ବିଭାଗ ପକ୍ଷରୁ ମଞ୍ଜି, ବିହନ ଓ ସାର ଯୋଗାଇ ଦିଆଯାଉଥିବାରୁ ଚାଷୀମାନେ ଉତ୍ସାହିତ ହେଉଛନ୍ତି।
ଏପରି ନୂତନ ଧାରଣା ଓ ପ୍ରୟାସ ମାଧ୍ୟମରେ ରାଜଶ୍ରୀ ପ୍ରମାଣ କରିଛନ୍ତି ଯେ, ଆଧୁନିକ ପଦ୍ଧତି ଓ ସଠିକ୍ ପରିକଳ୍ପନା ସହିତ କୃଷି ମାଧ୍ୟମରେ ସୁସ୍ଥ ଜୀବନ ଓ ଭଲ ଆୟ ଦୁହେଁ ସମ୍ଭବ।
ଖୋର୍ଦ୍ଧାର ଏହି ମହିଳା ଚାଷୀ ଆଜି ଅନେକଙ୍କ ପାଇଁ ପ୍ରେରଣାର ସ୍ରୋତ ହୋଇପାରିଛନ୍ତି । ଯାହା ପ୍ରମାଣ କରୁଛି ଯେ ଇଚ୍ଛା ଓ ପରିଶ୍ରମ ଥିଲେ କୌଣସି କ୍ଷେତ୍ରରେ ସଫଳତା ଅସମ୍ଭବ ନୁହେଁ।*
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |