ସମ୍ବଲପୁର : ଓଡିଶା ମାଟିରେ ଫୁଟିଲା ଆମେରିକା ଫୁଲ । ସମ୍ବଲପୁରରେ ଉତ୍ତର ଆମେରିକୀୟ ଫୁଲ ୟୁଷ୍ଟୋମାର ସଫଳ ଚାଷ । ରାଜ୍ୟ ସହ ଅନେକ ଦେଶରେ ରହିଛି ଏହି ଫୁଲର ଅହେତୁକ ଚାହିଦା । ଏହା ଅଧିକ ଦିନ ଧରି ତାଜା ରହିବା ସହିତ ଆକର୍ଷଣୀୟ ଫୁଲ ମଧ୍ୟରେ ଅନ୍ୟତମ । ସମ୍ବଲପୁର ଜିଲ୍ଲା ଯୁଯୁମୁରା ବ୍ଲକ ସନାତନପାଲିରେ ଏହି ବିଦେଶୀ ଫୁଲ ଫୁଟିଛି । ଯାହାକି ସାରା ରାଜ୍ୟରେ ପ୍ରଥମ । ଯୁବ ଚାଷୀ ଇତିଶ ପ୍ରଧାନଙ୍କ ଉଦ୍ୟମରେ ଏହି ଚାଷ ସଫଳ ହୋଇଛି । ଅନ୍ୟପକ୍ଷରେ ଏହି ୟୁଷ୍ଟୋମା ଫୁଲ ଚାଷ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଖୁସି ବ୍ୟକ୍ତ କରିଛନ୍ତି । ନିଜ ସୋସିଆଲ ମିଡ଼ିଆ ଏକ୍ସରେ ଏହି ଫୁଲକୁ ନେଇ ପ୍ରଶଂସା କରିଛନ୍ତି । ଏହାସହ ଏହି ଫୁଲକୁ ବ୍ୟବସାୟିକ ଭିତ୍ତିରେ ଚାଷ କଲେ ଚାଷୀଙ୍କ ଆର୍ଥିକ ମେରୁଦଣ୍ଡ ସଳଖ ହେବ ବୋଲି ସୋସିଆଲ ମିଡିଆ ପ୍ଲାଟଫର୍ମ ‘X’ରେ ଲେଖିଛନ୍ତି । ନିକଟରେ ୟୁଷ୍ଟୋମା ଫୁଲର ପ୍ରାୟ ୨ ହଜାର ଚାରା ପ୍ରଦାନ କରାଯାଇଥିଲା । ତେବେ ପ୍ରଥମ ପର୍ଯ୍ୟାୟରେ ଏଠାରେ ଯୁବ ଚାଷୀ ୩୫ଟି ଫୁଲ ଫୁଟେଇବାରେ ସଫଳ ହୋଇଛନ୍ତି l ଆଗକୁ ଆହୁରି ଫୁଲ ଫୁଟିବ ବୋଲି ଆଶା ରଖିଛନ୍ତି ଯୁବ ଚାଷୀ ଇତିଶ l
ଏହି ଫୁଲ ଧଳା, ବାଇଗଣି, ହଳଦିଆ, ଗୋଲାପି ପରି ୪ ରୁ ୫ ପ୍ରକାରର ଫୁଟିଥାଏ l ଏହି ଫୁଲ ଦେଖିବାକୁ ଖୁବ ସୁନ୍ଦର ହୋଇଥିବା ବେଳେ ହଠାତ ଜଣେ ଏହାକୁ ଦେଖିଲେ ଗୋଲାପ ଫୁଲ ଭଳି ମନେ ହୁଏ । ତେଣୁ ବିଦେଶରେ ଏହାର ବହୁତ ଚାହିଦା ରହିଛି l ଏହି ଫୁଲ ତୋଡ଼ାର ଦର ୧୫ ଶହ ଟଙ୍କା ପର୍ଯ୍ୟନ୍ତ ରହିଛି l ସେହିପରି ଗୋଟିଏ ଲାଇଭ ପ୍ଲାଣ୍ଟର ମୂଲ୍ୟ ୨ ଶହ ରୁ ୩ ଶହ ଟଙ୍କା ରହିଛି । ଏହି ଫୁଲ ଫୁଟିବାକୁ ଦିନରେ ୨୧ ରୁ ୨୪ ଡିଗ୍ରୀ ଓ ରାତିରେ ୧୬ ରୁ ୨୮ ଡିଗ୍ରୀ ସେଲସିୟସ ତାପମାତ୍ରା ଆବଶ୍ୟକ କରୁଥିବା ବିଶେଷଜ୍ଞ କୁହନ୍ତି । ଉଦ୍ୟାନ କୃଷି କ୍ଷେତ୍ରରେ ବିଶ୍ୱସ୍ତରରେ ଏହି ଫୁଲର ବହୁତ ଚାହିଦା ରହିଛି l ଏହି ଫୁଲ ଚାଷ ଆମ ଅଞ୍ଚଳର ଚାଷୀଙ୍କ ଆର୍ଥିକ ଅଭିବୃଦ୍ଧିରେ ବିଶେଷ ସହାୟକ ହେବ । ଏହି ଫୁଲ ଚାଷ ଭଲ ଭାବେ ସଫଳ ହେଲେ, ଆଗକୁ ଜିଲ୍ଲା ପ୍ରଶାସନ ପକ୍ଷରୁ ଯୁଯୁମୁରା ବ୍ଲକରେ ଏମିତି ଆହୁରି ୭ଟି ଉଦ୍ୟାନ କୃଷି ପଲି ହାଉସ ଜରିଆରେ ଚାଷ ବ୍ୟବସ୍ଥା କରାଯିବ ବୋଲି ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |