ଭୁବନେଶ୍ୱର: ରାଜ୍ୟ ସରକାରୀ କର୍ମଚାରୀଙ୍କୁ ବଡ଼ ଉପହାର। ଓଡ଼ିଶା ସରକାର ପ୍ରାକ୍-ସଂଶୋଧିତ ବେତନ ସ୍କେଲ (ORSP-2008) ଅନୁଯାୟୀ ବେତନ ପାଉଥିବା କର୍ମଚାରୀଙ୍କ ମହଙ୍ଗା ଭତ୍ତା (ଡିଏ)ରେ ୫ ପ୍ରତିଶତ ବୃଦ୍ଧି ଘୋଷଣା କରିଛନ୍ତି। ଏହାଫଳରେ ଡିଏ ୨୫୭ ପ୍ରତିଶତରୁ ବଢ଼ି ୨୬୨ ପ୍ରତିଶତରେ ପହଞ୍ଚିଛି।
ଅର୍ଥ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ, ଏହି ବୃଦ୍ଧି ୧ ଜାନୁଆରୀ ୨୦୨୬ରୁ କାର୍ଯ୍ୟକାରୀ ହେବ। ଜାନୁଆରୀରୁ ଜୁନ୍ ପର୍ଯ୍ୟନ୍ତ ବକେୟା ଡିଏ ରାଶି ଜୁଲାଇ ମାସର ଦରମା ସହ କର୍ମଚାରୀଙ୍କୁ ପ୍ରଦାନ କରାଯିବ।
୨୫୭%ରୁ ବଢ଼ି ୨୬୨% ହେଲା ଡିଏ
ଏହା ପୂର୍ବରୁ ୨୦୨୫ ଡିସେମ୍ବରରେ ରାଜ୍ୟ ସରକାର ORSP-୨୦୦୮ ଅଧୀନରେ ଥିବା କର୍ମଚାରୀଙ୍କ ଡିଏକୁ ୨୫୨ ପ୍ରତିଶତରୁ ୨୫୭ ପ୍ରତିଶତକୁ ବୃଦ୍ଧି କରିଥିଲେ। ବର୍ତ୍ତମାନ ପୁଣି ୫ ପ୍ରତିଶତ ବୃଦ୍ଧି ସହ ଏହା ୨୬୨ ପ୍ରତିଶତରେ ପହଞ୍ଚିଛି। ଫଳରେ ସମ୍ପୃକ୍ତ କର୍ମଚାରୀମାନଙ୍କ ମାସିକ ଆୟରେ ବୃଦ୍ଧି ଘଟିବ।
ଜୁଲାଇ ଦରମା ସହ ମିଳିବ ବକେୟା
ନୂତନ ହାର ଜାନୁଆରୀ ୧, ୨୦୨୬ରୁ ଲାଗୁ ହେଉଥିବାରୁ ଗତ ଛଅ ମାସର ବକେୟା ରାଶି ଜୁଲାଇ ମାସର ବେତନ ସହ ପ୍ରଦାନ କରାଯିବ। ଏହା ଦ୍ୱାରା ଏକକାଳୀନ ଅତିରିକ୍ତ ରାଶି ପାଇ ହଜାର ହଜାର କର୍ମଚାରୀ ଆର୍ଥିକ ଭାବେ ଲାଭାନ୍ୱିତ ହେବେ ।
କେଉଁମାନେ ପାଇବେ ଏହି ସୁବିଧା?
ସରକାରୀ ବିଜ୍ଞପ୍ତି ଅନୁସାରେ ନିମ୍ନଲିଖିତ ବର୍ଗର କର୍ମଚାରୀମାନେ ଏହି ଡିଏ ବୃଦ୍ଧିର ସୁବିଧା ପାଇବେ । ସେହିପରି ସରକାରୀ ଅନୁଦାନରେ ଚାଲୁଥିବା ବିଶ୍ୱବିଦ୍ୟାଳୟର ଶିକ୍ଷକ ଓ ଅଣଶିକ୍ଷକ କର୍ମଚାରୀ, UGC ଓ AICTE ବେତନ ସ୍କେଲ ଅଧୀନରେ ଥିବା କଲେଜ ଶିକ୍ଷକ, ସରକାରୀ ମେଡିକାଲ କଲେଜର ଶିକ୍ଷକ, ନିୟମିତ ବେତନ ସ୍କେଲରେ ଥିବା କିଛି ଚୁକ୍ତିଭିତ୍ତିକ କର୍ମଚାରୀମାନେ ପାଇବେ ଏହି ସୁବିଧା ।
କର୍ମଚାରୀଙ୍କ ମଧ୍ୟରେ ଖୁସି
ମହଙ୍ଗା ଭତ୍ତା ବୃଦ୍ଧି ଘୋଷଣା ପରେ ବିଭିନ୍ନ ବର୍ଗର କର୍ମଚାରୀଙ୍କ ମଧ୍ୟରେ ଖୁସିର ଲହର ଦେଖାଦେଇଛି। ବଢ଼ୁଥିବା ଦରଦାମ ମଧ୍ୟରେ ଏହି ଅତିରିକ୍ତ ଭତ୍ତା ଘରୋଇ ଖର୍ଚ୍ଚ ପରିଚାଳନାରେ ସହାୟକ ହେବ ବୋଲି ଅନେକ କର୍ମଚାରୀ ମତ ପ୍ରକାଶ କରିଛନ୍ତି।
ରାଜ୍ୟ ସରକାରଙ୍କ ଏହି ନିଷ୍ପତ୍ତି ପ୍ରାକ୍-ସଂଶୋଧିତ ବେତନ ସ୍କେଲରେ ଥିବା କର୍ମଚାରୀଙ୍କ ପାଇଁ ବଡ଼ ଆର୍ଥିକ ଆଶ୍ୱସ୍ତି ଆଣିଛି। ଡିଏ ୨୬୨ ପ୍ରତିଶତକୁ ବୃଦ୍ଧି ପାଇବା ସହ ବକେୟା ରାଶି ପ୍ରଦାନ ହେବା ଫଳରେ ହଜାର ହଜାର କର୍ମଚାରୀ ସିଧାସଳଖ ଭାବେ ଉପକୃତ ହେବେ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |