ଭୁବନେଶ୍ୱର : ଜନଜାତି ସମାଜର ସାମଗ୍ରିକ ବିକାଶ, ଆର୍ଥିକ ସଶକ୍ତିକରଣ ଓ ସେମାନଙ୍କ ଜୀବନମାନରେ ସ୍ଥାୟୀ ପରିବର୍ତ୍ତନ ଆଣିବା ରାଜ୍ୟ ସରକାରଙ୍କ ପ୍ରମୁଖ ଲକ୍ଷ୍ୟ ରହିଛି । ଜନଜାତି ସମୁଦାୟ ରାଜ୍ୟର ସାମାଜିକ ଓ ସାଂସ୍କୃତିକ ପରିଚୟର ଏକ ଅବିଚ୍ଛିନ୍ନ ଅଂଶ । ସେମାନଙ୍କ ପାରମ୍ପରିକ ଜ୍ଞାନ, ପ୍ରାକୃତିକ ସମ୍ପଦ ସହ ଜଡ଼ିତ ଜୀବନଶୈଳୀ ଓ କୌଶଳକୁ ସମ୍ମାନ ଦେଇ ସେମାନଙ୍କୁ ବିକାଶର ମୁଖ୍ୟଧାରାରେ ସାମିଲ କରିବା ପାଇଁ ସରକାର ବିଭିନ୍ନ ଯୋଜନା ଓ ପଦକ୍ଷେପ ଗ୍ରହଣ କରୁଛନ୍ତି ।
ଏହି କ୍ରମରେ ଜନଜାତି ପରିବାରମାନଙ୍କୁ ସ୍ଥାୟୀ ଜୀବିକା, ଆର୍ଥିକ ସୁରକ୍ଷା ଓ ସ୍ୱାବଲମ୍ବନର ସୁଯୋଗ ଦେବା ଉଦ୍ଦେଶ୍ୟରେ ଆରମ୍ଭ ହୋଇଛି ‘ମୁଖ୍ୟମନ୍ତ୍ରୀ ଜନଜାତି ଜୀବିକା ମିଶନ ୨.୦’ । ଏହି ମିଶନ ଜନଜାତି ପରିବାରଙ୍କ ଆର୍ଥିକ ସ୍ଥିତିକୁ ମଜବୁତ କରିବା ସହ ସେମାନଙ୍କ ଜୀବନରେ ନୂଆ ଆଶା ସୃଷ୍ଟି କରିବାରେ ସହାୟକ ହେବ ।
ଏହି ଯୋଜନା ମାଧ୍ୟମରେ ରାଜ୍ୟର ୮ ଲକ୍ଷ ଜନଜାତି ଓ ପିଭିଟିଜି ପରିବାରଙ୍କୁ ଆତ୍ମନିର୍ଭର କରିବା ପାଇଁ ଏକ ଐତିହାସିକ ପଦକ୍ଷେପ ନିଆଯାଇଛି ।
ଆର୍ଥିକ ସହାୟତା ମାଧ୍ୟମରେ ଜୀବିକାକୁ ମିଳିବ ନୂଆ ଶକ୍ତି
‘ଜନଜାତି ଜୀବିକା ମିଶନ ୨.୦’ ଅଧୀନରେ ପ୍ରତ୍ୟେକ ଯୋଗ୍ୟ ଜନଜାତି ପରିବାରକୁ ୩୦,୦୦୦ ଟଙ୍କାର ଡିବିଟି (Direct Benefit Transfer) ସହାୟତା ଯୋଗାଇ ଦିଆଯିବ । ଏହି ଆର୍ଥିକ ସହାୟତା ଜନଜାତି ପରିବାରମାନଙ୍କୁ ନିଜର ଆବଶ୍ୟକତା ଓ ସ୍ଥାନୀୟ ସୁଯୋଗ ଅନୁଯାୟୀ ଜୀବିକା କାର୍ଯ୍ୟ ଚୟନ କରିବାରେ ସହାୟତା କରିବ ।
ଏହି ଅର୍ଥରାଶିକୁ ବ୍ୟବହାର କରି ପରିବାରମାନେ କୃଷି କାର୍ଯ୍ୟରେ ଉନ୍ନତି, ପଶୁପାଳନ, ମତ୍ସ୍ୟଚାଷ, ଛୋଟ ଉଦ୍ୟୋଗ, ହସ୍ତଶିଳ୍ପ ଓ ଅନ୍ୟାନ୍ୟ ଆୟମୂଳକ କାର୍ଯ୍ୟ ଆରମ୍ଭ କରିପାରିବେ । ଏହା ଫଳରେ ସେମାନଙ୍କ ଆୟ ବୃଦ୍ଧି ପାଇବା ସହ ଅନ୍ୟମାନଙ୍କ ଉପରେ ନିର୍ଭରଶୀଳତା କମିବ ।
ପାରମ୍ପରିକ ଜୀବିକା ସହ ଆଧୁନିକ ସୁଯୋଗର ସମନ୍ୱୟ
ଓଡ଼ିଶାର ଜନଜାତି ସମୁଦାୟ ପ୍ରାଚୀନ କାଳରୁ କୃଷି, ବନଜାତ ଦ୍ରବ୍ୟ ସଂଗ୍ରହ, ପଶୁପାଳନ, ହସ୍ତଶିଳ୍ପ ଓ ଅନ୍ୟାନ୍ୟ ପାରମ୍ପରିକ କାର୍ଯ୍ୟ ସହ ଜଡ଼ିତ ରହିଆସିଛନ୍ତି । ସେମାନଙ୍କର ଏହି ପାରମ୍ପରିକ କୌଶଳକୁ ଆଧୁନିକ ପ୍ରଯୁକ୍ତି, ପ୍ରଶିକ୍ଷଣ ଓ ବଜାର ସହ ଯୋଡ଼ିବା ଏହି ମିଶନର ଏକ ମୁଖ୍ୟ ଲକ୍ଷ୍ୟ ।
କୃଷି କ୍ଷେତ୍ରରେ ଉନ୍ନତ ପ୍ରଣାଳୀର ବ୍ୟବହାର, ଉନ୍ନତ ମାନର ବିହନ, ଜୈବିକ ଚାଷକୁ ପ୍ରୋତ୍ସାହନ, ପଶୁପାଳନ ଓ ମତ୍ସ୍ୟଚାଷରେ ନୂଆ ସୁଯୋଗ ସୃଷ୍ଟି କରି ଜନଜାତି ପରିବାରଙ୍କ ଆୟ ବୃଦ୍ଧି ଉପରେ ଗୁରୁତ୍ୱ ଦିଆଯିବ । ଏହାସହ ହସ୍ତଶିଳ୍ପ ଓ ଗ୍ରାମୀଣ ଉତ୍ପାଦକୁ ବଜାର ସହ ଯୋଡ଼ିବା ଦ୍ୱାରା ସ୍ଥାନୀୟ କଳା ଓ କାରିଗରୀକୁ ନୂଆ ପରିଚୟ ମିଳିବ ।
ଏହି ସମସ୍ତ ଜୀବିକା ଭିତ୍ତିକ କାର୍ଯ୍ୟକ୍ରମ ପାଇଁ ସରକାର ୨,୯୯୫ କୋଟି ଟଙ୍କାର ବ୍ୟୟବରାଦ କରିଛନ୍ତି । ଏହି ବିନିଯୋଗ ଜନଜାତି ଅଞ୍ଚଳରେ ଆର୍ଥିକ କାର୍ଯ୍ୟକଳାପକୁ ବଢ଼ାଇବା ସହ ଗ୍ରାମୀଣ ଅର୍ଥନୀତିକୁ ଆହୁରି ମଜବୁତ କରିବ ।
ଯୁବକ-ଯୁବତୀ ଓ ମହିଳାଙ୍କ ପାଇଁ ନୂଆ ସୁଯୋଗ
ଜନଜାତି ସମାଜର ବିକାଶରେ ଯୁବକ-ଯୁବତୀ ଓ ମହିଳାମାନଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହି ମିଶନ ମାଧ୍ୟମରେ ସେମାନଙ୍କୁ ଜୀବିକା ଭିତ୍ତିକ ପ୍ରଶିକ୍ଷଣ, କୌଶଳ ବିକାଶ, ସ୍ୱୟଂସହାୟକ ଗୋଷ୍ଠୀ ମାଧ୍ୟମରେ ଉଦ୍ୟୋଗ ସୃଷ୍ଟି ଓ ରୋଜଗାରର ସୁଯୋଗ ମିଳିବ ।
ବିଶେଷକରି ଜନଜାତି ମହିଳାମାନଙ୍କୁ ଆର୍ଥିକ ଭାବେ ସଶକ୍ତ କରିବା ପାଇଁ ଛୋଟ ବ୍ୟବସାୟ, ହସ୍ତଶିଳ୍ପ, ଖାଦ୍ୟ ପ୍ରକ୍ରିୟାକରଣ ଓ ଅନ୍ୟାନ୍ୟ କ୍ଷେତ୍ରରେ ସୁଯୋଗ ଦିଆଯିବ । ଏହା ମହିଳାଙ୍କ ଆତ୍ମବିଶ୍ୱାସ ବଢ଼ାଇବା ସହ ପରିବାରର ଆର୍ଥିକ ସ୍ଥିତିକୁ ସୁଦୃଢ଼ କରିବ ।
ସଂସ୍କୃତି ଓ ପରମ୍ପରାର ସୁରକ୍ଷା ସହ ବିକାଶ
ଜନଜାତି ସମାଜର ବିକାଶ କେବଳ ଆର୍ଥିକ ଉନ୍ନତିରେ ସୀମିତ ନୁହେଁ । ସେମାନଙ୍କର ଐତିହ୍ୟ, ଭାଷା, କଳା, ସଂସ୍କୃତି ଓ ପ୍ରାକୃତିକ ସମ୍ପଦର ସୁରକ୍ଷା ମଧ୍ୟ ସମାନ ଭାବେ ଆବଶ୍ୟକ । ସରକାରଙ୍କ ଏହି ମିଶନ ଜନଜାତି ସମୁଦାୟର ପାରମ୍ପରିକ ମୂଲ୍ୟବୋଧକୁ ସମ୍ମାନ ଦେଇ ସେମାନଙ୍କ ସାମାଜିକ ଓ ଆର୍ଥିକ ବିକାଶକୁ ଆଗକୁ ନେବ ।
ଜନଜାତି ସମାଜର ସମଗ୍ର ବିକାଶ ଦ୍ୱାରା ରାଜ୍ୟର ସମାବେଶୀ ବିକାଶ ଆହୁରି ଶକ୍ତିଶାଳୀ ହେବ । ସେମାନଙ୍କୁ ସମାନ ସୁଯୋଗ, ସ୍ଥାୟୀ ଜୀବିକା ଓ ଆତ୍ମନିର୍ଭରତା ପ୍ରଦାନ କରିବା ଏହି ମିଶନର ମୂଳ ଉଦ୍ଦେଶ୍ୟ ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |