ଭୁବନେଶ୍ୱର : ଆସନ୍ତା ଜୁନ୍ ୧୨ରେ ବଡ଼ ପରଦାକୁ ଆସୁଛି ବଲିଉଡ୍ ଚଳଚ୍ଚିତ୍ର ‘ଭାରତ ଭାଗ୍ୟ ବିଧାତା’। ଫିଲ୍ମ ମୁକ୍ତି ପୂର୍ବରୁ ଏହାର ଟିମ୍ ଦେଶର ବିଭିନ୍ନ ସ୍ଥାନରେ ପହଞ୍ଚି ପ୍ରକୃତ ଜନନାୟକ ଓ ନିରବ ସେବାଦାତାଙ୍କୁ ସମ୍ମାନିତ କରୁଛନ୍ତି। ଏହି ଅଭିଯାନର ଅଂଶ ଭାବେ ଭୁବନେଶ୍ୱରରେ ସ୍ୱାସ୍ଥ୍ୟସେବା କର୍ମଚାରୀଙ୍କ ପାଇଁ ଏକ ବିଶେଷ ସ୍କ୍ରିନିଂର ଆୟୋଜନ କରାଯାଇଥିଲା।
ଏହି କାର୍ଯ୍ୟକ୍ରମରେ ନର୍ସ, ୱାର୍ଡ ବୟ, ସୁରକ୍ଷାକର୍ମୀ, ସଫେଇ କର୍ମଚାରୀ, ମେଡିକାଲ୍ ୱାଚମ୍ୟାନ୍ ଓ ଅନ୍ୟାନ୍ୟ ସହଯୋଗୀ କର୍ମଚାରୀଙ୍କୁ ଆମନ୍ତ୍ରଣ କରାଯାଇଥିଲା। ଦେଶ ଓ ସମାଜ ପାଇଁ ସେମାନଙ୍କ ନିଷ୍ଠାପୂର୍ଣ୍ଣ ସେବାକୁ ସ୍ୱୀକୃତି ଦେବା ଉଦ୍ଦେଶ୍ୟରେ ସେମାନଙ୍କୁ ‘ଭାରତ ଭାଗ୍ୟ ବିଧାତା’ ବ୍ୟାଚ୍ ପ୍ରଦାନ କରାଯାଇଥିଲା।
କାର୍ଯ୍ୟକ୍ରମରେ ଅଭିନେତ୍ରୀ କଙ୍ଗନା ରାଣାୱତ ଏବଂ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ଉପସ୍ଥିତ ରହି ମନୋନୀତ ସ୍ୱାସ୍ଥ୍ୟକର୍ମୀଙ୍କୁ ସମ୍ମାନିତ କରିଥିଲେ। ଉଭୟେ ସେମାନଙ୍କୁ ଦେଶର ପ୍ରକୃତ ‘ଭାଗ୍ୟ ନିର୍ମାତା’ ବୋଲି ବର୍ଣ୍ଣନା କରିଥିଲେ।
ଏହି ଅବସରରେ କଙ୍ଗନା କହିଥିଲେ ଯେ, ‘ଭାରତ ଭାଗ୍ୟ ବିଧାତା’ କେବଳ ଏକ ଚଳଚ୍ଚିତ୍ର ନୁହେଁ, ବରଂ ଦେଶର ଅନାମିକା ନାୟକମାନଙ୍କ ପ୍ରତି ଏକ ଶ୍ରଦ୍ଧାଞ୍ଜଳି। ଏହି ଫିଲ୍ମ ନିସ୍ୱାର୍ଥ ସେବା, ଦେଶପ୍ରେମ ଓ କର୍ତ୍ତବ୍ୟନିଷ୍ଠାର କାହାଣୀ କହିଥାଏ। ଭୁବନେଶ୍ୱରରେ ସ୍ଥାନୀୟ ନିରବ ହିରୋମାନଙ୍କୁ ସମ୍ମାନିତ କରିବା ଆମ ପାଇଁ ଗର୍ବର ବିଷୟ।’
ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ମଧ୍ୟ ଫିଲ୍ମ ଓ ଏହାର ବାର୍ତ୍ତାକୁ ପ୍ରଶଂସା କରି କହିଥିଲେ ଯେ, ‘ଭାରତ ଭାଗ୍ୟ ବିଧାତା’ ଶବ୍ଦଟି ପ୍ରତ୍ୟେକ ଭାରତୀୟଙ୍କ ମନରେ ଜାତୀୟ ଗର୍ବର ଭାବନା ସୃଷ୍ଟି କରେ। ଏଭଳି ଅପରିଚିତ ଓ ଅଣଦେଖା ସେବାଦାତାଙ୍କୁ ସମ୍ମାନିତ କରିବାର ଏହା ଏକ ସୁନ୍ଦର ପ୍ରୟାସ।’
ସ୍କ୍ରିନିଂ ପରେ କଙ୍ଗନା ରାଣାୱତ ଓ ମୁଖ୍ୟମନ୍ତ୍ରୀ ଏକାଠି ଫିଲ୍ମ ଦେଖିଥିଲେ। ଚଳଚ୍ଚିତ୍ରରେ କଙ୍ଗନା ଜଣେ ଷ୍ଟାଫ୍ ନର୍ସର ଭୂମିକାରେ ନଜର ଆସିବେ। କାହାଣୀଟି ଜଣେ ସାଧାରଣ ମହିଳାଙ୍କ ସଂଘର୍ଷ, ନିଷ୍ଠା ଓ ସାହସକୁ କେନ୍ଦ୍ର କରି ଗଢ଼ାଯାଇଛି, ଯିଏ କଠିନ ପରିସ୍ଥିତିରେ ଶତାଧିକ ଲୋକଙ୍କ ପାଇଁ ଆଶା ଓ ସହାୟତାର ପ୍ରତୀକ ପାଲଟିଯାଏ।
ଭୁବନେଶ୍ୱର ପରେ ଏହି ସମ୍ମାନ ଯାତ୍ରା ରାୟପୁର, ଯୋଧପୁର, ଦିଲ୍ଲୀ ଓ ଜୟପୁରରେ ଆୟୋଜିତ ହେବ ବୋଲି ଫିଲ୍ମ ଟିମ୍ ପକ୍ଷରୁ ସୂଚନା ମିଳିଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |