ଶେଷରେ ସମସ୍ତ ବିବାଦକୁ ପଛକୁ ପକାଇ ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦିଙ୍କୁ ଅଭିନନ୍ଦନ ଜଣାଇଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ପଶ୍ଚିମବଙ୍ଗରେ ଭାରତୀୟ ଜନତା ପାର୍ଟିର ଐତିହାସିକ ସଫଳତା ପରେ ସାରା ବିଶ୍ୱରେ ଏହାକୁ ନେଇ ଚର୍ଚ୍ଚା ଜୋର ଧରିଛି । ଚାରିଆଡୁ ଶୁଭେଚ୍ଛାର ବନ୍ୟା ଛୁଟୁଥିବା ବେଳେ ଏହି ବିଜୟକୁ ଦେଶର ରାଜନୀତିରେ ଏକ ବଡ଼ ପରିବର୍ତ୍ତନ ବୋଲି କୁହାଯାଉଛି । ଦୀର୍ଘ ବର୍ଷ ଧରି ଶାସନ କରୁଥିବା ତୃଣମୂଳ କଂଗ୍ରେସକୁ ପଛକୁ ଫିଙ୍ଗି ପ୍ରଥମ ଥର ପାଇଁ ରାଜ୍ୟରେ ସରକାର ଗଠନ ଦିଗରେ ଆଗେଇଛି ଭାରତୀୟ ଜନତା ପାର୍ଟି। ଏହାସହ ମମତା ବାନାର୍ଜୀଙ୍କ ଦୀର୍ଘ ଦିନର ଦୁର୍ଗ ଧସିପଡ଼ିଥିବା ଚର୍ଚ୍ଚା ହେଉଛି।
ଏହି ବିଜୟକୁ ନେଇ ଆମେରିକା ପକ୍ଷରୁ ମଧ୍ୟ ବଡ଼ ପ୍ରତିକ୍ରିୟା ଆସିଛି। ଡୋନାଲ୍ଡ ଟ୍ରମ୍ପ ନରେନ୍ଦ୍ର ମୋଦିଙ୍କ ନେତୃତ୍ୱକୁ ପ୍ରଶଂସା କରି ତାଙ୍କୁ ଶୁଭେଚ୍ଛା ଜଣାଇଛନ୍ତି। ଆମେରିକୀୟ ରାଷ୍ଟ୍ରପତି ଭବନ ପକ୍ଷରୁ ଏହି ଫଳାଫଳକୁ ଐତିହାସିକ ଓ ନିର୍ଣ୍ଣାୟକ ବୋଲି କୁହାଯାଇଛି। ଭାରତୀୟ ଜନତା ପାର୍ଟି ନେତା ଶୁଭେନ୍ଦୁ ଅଧିକାରୀ ଭବାନୀପୁର ଓ ନନ୍ଦୀଗ୍ରାମ ଉଭୟ ଆସନରେ ବିଜୟ ହାସଲ କରିଥିବା ବେଳେ ଭବାନୀପୁରରେ ସେ ମମତା ବାନାର୍ଜୀଙ୍କୁ ବଡ଼ ଭୋଟ୍ ବ୍ୟବଧାନରେ ପରାସ୍ତ କରିଛନ୍ତି। ଏହି ନିର୍ବାଚନରେ ରେକର୍ଡ ସଂଖ୍ୟକ ମତଦାନ ମଧ୍ୟ ହୋଇଥିବା କୁହାଯାଉଛି।
ଆମେରିକୀୟ ପ୍ରଶାସନର ମୁଖପାତ୍ରଙ୍କ କହିବା ଅନୁସାରେ, ପୂର୍ବରୁ ଦୁଇ ନେତାଙ୍କ ମଧ୍ୟରେ ହୋଇଥିବା ଆଲୋଚନା ସମୟରେ ଟ୍ରମ୍ପ, ମୋଦିଙ୍କ ନେତୃତ୍ୱକୁ ଉଚ୍ଚ ପ୍ରଶଂସା କରିଥିଲେ। ସେ କହିଥିଲେ, “ଭାରତ ପାଇଁ ଏହା ଗର୍ବର କଥା ଯେ ଦେଶକୁ ମୋଦିଙ୍କ ଭଳି ନେତା ମିଳିଛନ୍ତି।” ଏହି ବିଜୟ ସହ ପଶ୍ଚିମବଙ୍ଗରେ ତୃଣମୂଳ କଂଗ୍ରେସର ଦୀର୍ଘ ୧୫ ବର୍ଷର ଶାସନର ଅନ୍ତ ଘଟିଥିବା କୁହାଯାଉଛି। ୨୯୪ ଆସନ ବିଶିଷ୍ଟ ବିଧାନସଭାରେ ଭାରତୀୟ ଜନତା ପାର୍ଟି ବହୁମତ ସହ ବିଜୟୀ ହୋଇଥିବା ବେଳେ ତୃଣମୂଳ କଂଗ୍ରେସ ପଛରେ ପଡ଼ିଯାଇଛି।
ଅନ୍ୟପଟେ ଆମେରିକା ଓ ଇରାନ ମଧ୍ୟରେ ଚାଲିଥିବା ସଂଘର୍ଷକୁ ଦୁଇ ମାସ ପୂରଣ ହୋଇଛି। ଆମେରିକାର ପୁରୁଣା ଆଇନ ଅନୁସାରେ ଦେଶର ସେନା ୬୦ ଦିନରୁ ଅଧିକ ସମୟ ଯୁଦ୍ଧରେ ରହିପାରିବ ନାହିଁ। ଏହି ପରିସ୍ଥିତିରେ ମଧ୍ୟପ୍ରାଚ୍ୟରେ ଯୁଦ୍ଧ ଜାରି ଥିବାରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଆମେରିକୀୟ ସଂସଦ ମଧ୍ୟରେ ଏହି ଆଇନକୁ ନେଇ ମତଭେଦ ତୀବ୍ର ହେଉଥିବା ଜଣାପଡ଼ିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |