ଫୁଟବଲର ସର୍ବବୃହତ ଆୟୋଜନ ଫିଫା ବିଶ୍ୱକପ୍ ୨୦୨୬ ଏଥର କେବଳ ରୋମାଞ୍ଚକର ମ୍ୟାଚ୍ ପାଇଁ ନୁହେଁ, ବରଂ ଏକ ନୂତନ ସମ୍ମାନ ପରମ୍ପରା ପାଇଁ ମଧ୍ୟ ଚର୍ଚ୍ଚାରେ ରହିଛି। ଫିଫା ପ୍ରଥମ ଥର ପାଇଁ ବିଶ୍ୱକପ ବିଜେତା ଦଳର ଖେଳାଳି ଓ ସହଯୋଗୀ କର୍ମଚାରୀଙ୍କୁ ଟ୍ରଫି ଏବଂ ସ୍ୱର୍ଣ୍ଣ ପଦକ ସହିତ ଏକ ବିଶେଷ ‘ଚ୍ୟାମ୍ପିଅନ୍ ରିଙ୍ଗ’ ପ୍ରଦାନ କରିବାକୁ ଘୋଷଣା କରିଛି।
ଆମେରିକୀୟ ପେଶାଦାର କ୍ରୀଡ଼ାରେ ବହୁ ପ୍ରଚଳିତ ଏହି ରିଙ୍ଗ ପରମ୍ପରାକୁ ଏବେ ବିଶ୍ୱ ଫୁଟବଲରେ ସାମିଲ କରାଯାଉଛି। ଏହା ମାଧ୍ୟମରେ ବିଜେତା ଖେଳାଳିମାନେ ନିଜ ଐତିହାସିକ ସଫଳତାକୁ ଦୀର୍ଘ ସମୟ ପର୍ଯ୍ୟନ୍ତ ସ୍ମରଣ କରିପାରିବେ।
ରିଙ୍ଗରେ ରହିବ ସ୍ୱତନ୍ତ୍ର ଡିଜାଇନ୍
ଏହି ବିଶେଷ ରିଙ୍ଗର ଏକ ପାର୍ଶ୍ୱରେ ବିଶ୍ୱକପ୍ ଟ୍ରଫିର ଚିତ୍ର ଖୋଦିତ ହେବ। ଅନ୍ୟ ପାର୍ଶ୍ୱରେ ବିଜେତା ଦଳର ପରିଚୟ ଓ ସଫଳତାକୁ ପ୍ରତିଫଳିତ କରୁଥିବା ଅଲଗା ଡିଜାଇନ୍ ରହିବ। ପ୍ରତ୍ୟେକ ରିଙ୍ଗକୁ ଏକ ୟୁନିକ ସିରିଆଲ ନମ୍ବର ଦିଆଯିବ ଏବଂ ଏହା ସହ ଅସଲି ହେବାର ପ୍ରମାଣପତ୍ର ମଧ୍ୟ ଯୋଡ଼ାଯିବ।
ଫାଇନାଲ ମୁକାବିଲା ଶେଷ ହେବା ପରେ ବିଜେତା ଦଳର ଅଧିନାୟକ ଓ ମୁଖ୍ୟ ପ୍ରଶିକ୍ଷକଙ୍କୁ ପ୍ରଥମେ ଏକ ପ୍ରତୀକାତ୍ମକ ରିଙ୍ଗ ପ୍ରଦାନ କରାଯିବ। ପରେ ସମ୍ପୂର୍ଣ୍ଣ ଦଳ ପାଇଁ ୩୦ଟି କଷ୍ଟମାଇଜ୍ ରିଙ୍ଗ ତିଆରି କରାଯାଇ ସେମାନଙ୍କୁ ଆନୁଷ୍ଠାନିକ ଭାବେ ହସ୍ତାନ୍ତର କରାଯିବ।
ସୀମିତ ସଂଖ୍ୟାରେ ଉପଲବ୍ଧ ହେବ ରିଙ୍ଗ
ଫିଫାର ସୂଚନା ଅନୁଯାୟୀ, ମୋଟ ୨୦୨୬ଟି ଲିମିଟେଡ୍ ଏଡିସନ୍ ରିଙ୍ଗ ନିର୍ମାଣ କରାଯିବ। ଏଥିରୁ ୩୦ଟି ରିଙ୍ଗ ବିଜେତା ଦଳ ପାଇଁ ସଂରକ୍ଷିତ ରହିବ। ବାକି ୧୯୯୬ଟି ରିଙ୍ଗ ଫୁଟବଲ ପ୍ରେମୀମାନଙ୍କ ପାଇଁ ଆଧିକାରିକ ଲାଇସେନ୍ସପ୍ରାପ୍ତ ସ୍ମାରକ ସାମଗ୍ରୀ ଭାବେ ବଜାରରେ ଉପଲବ୍ଧ ହେବ।
ସ୍ପେନ ଓ ଆର୍ଜେଣ୍ଟିନା ମଧ୍ୟରେ ହେବ ମହାମୁକାବିଲା
ଚଳିତ ବିଶ୍ୱକପର ଫାଇନାଲରେ ୟୁରୋପୀୟ ଚାମ୍ପିଅନ ସ୍ପେନ ଓ ବର୍ତ୍ତମାନର ବିଶ୍ୱ ଚାମ୍ପିଅନ ଆର୍ଜେଣ୍ଟିନା ଆମନା-ସାମନା ହେବେ। ସେମିଫାଇନାଲ୍ରେ ସ୍ପେନ୍ ଶକ୍ତିଶାଳୀ ଫ୍ରାନ୍ସକୁ ପରାସ୍ତ କରି ଫାଇନାଲ୍ ଟିକେଟ୍ ହାସଲ କରିଥିଲା।
ଅନ୍ୟପଟେ ଆର୍ଜେଣ୍ଟିନା ଇଂଲଣ୍ଡ ବିପକ୍ଷରେ ୨-୧ ଗୋଲ୍ର ରୋମାଞ୍ଚକର ବିଜୟ ସହ ଫାଇନାଲ୍ରେ ସ୍ଥାନ ସୁନିଶ୍ଚିତ କରିଛି। ଏହା ସହିତ ଦଳଟି କ୍ରମାଗତ ଦ୍ୱିତୀୟ ଥର ଏବଂ ସମୁଦାୟ ଭାବେ ସପ୍ତମ ଥର ପାଇଁ ବିଶ୍ୱକପ୍ ଫାଇନାଲ୍ରେ ପହଞ୍ଚିଛି।
ମେସିଙ୍କ ଉପରେ ରହିବ ସମସ୍ତଙ୍କ ନଜର
ଆର୍ଜେଣ୍ଟିନା ଗ୍ରୁପ ପର୍ଯ୍ୟାୟରୁ ହିଁ ଚମତ୍କାର ପ୍ରଦର୍ଶନ କରିଆସୁଛି। ଦଳଟି ଲଗାତାର ତିନୋଟି ବିଜୟ ସହ ନିଜ ଅଭିଯାନ ଆରମ୍ଭ କରିଥିଲା। ଅଧିନାୟକ ଲିଓନେଲ୍ ମେସି ମଧ୍ୟ ଅତ୍ୟନ୍ତ ଭଲ ଫର୍ମରେ ରହିଛନ୍ତି। ଟୁର୍ଣ୍ଣାମେଣ୍ଟରେ ସେ ଏପର୍ଯ୍ୟନ୍ତ ୮ଟି ଗୋଲ କରି ବିଶ୍ୱକପରେ ନିଜର ମୋଟ ଗୋଲ୍ ସଂଖ୍ୟାକୁ ୨୧ରେ ପହଞ୍ଚାଇଛନ୍ତି।
ଫାଇନାଲରେ ମଧ୍ୟ ଆର୍ଜେଣ୍ଟିନାର ସଫଳତା ପାଇଁ ମେସିଙ୍କ ଭୂମିକା ନିର୍ଣ୍ଣାୟକ ହୋଇପାରେ। ତାଙ୍କ ଅନୁଭବ ଓ ନେତୃତ୍ୱ ଦଳକୁ ଆଉ ଏକ ବିଶ୍ୱକପ ଟାଇଟଲ ଦିଗରେ ନେଇଯିବ ବୋଲି ସମର୍ଥକମାନେ ଆଶା ରଖିଛନ୍ତି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |