ଭୁବନେଶ୍ୱର : ନୂଆ ରୂପରେ ଝଲସିବ ପୁରୀ ଶ୍ରୀମନ୍ଦିର । ଐତିହ୍ୟରେ ଭରିଥିବା ପୁରୀ ସହର ଏବେ ନେବାକୁ ଯାଉଛି ଏକ ନୂଆ ଆକର୍ଷଣୀୟ ରୂପ। ପ୍ରବେଶ ଦ୍ୱାର ଅଠରନଳା ଠାରୁ ଆରମ୍ଭ କରି ବଡ଼ଦାଣ୍ଡ ପର୍ଯ୍ୟନ୍ତ ସମସ୍ତ କୋଠା ଗୁଡ଼ିକୁ ଏକ ସମାନ ରଙ୍ଗରେ ରଞ୍ଜିତ କରାଯିବ । ଏହି ପ୍ରକଳ୍ପ ପାଇଁ ପ୍ରାୟ ୨ କୋଟି ୩୫ ଲକ୍ଷ ଟଙ୍କା ବ୍ୟୟ ଅନୁମାନ କରାଯାଇଛି। ୟୁନିଭର୍ସାଲ କଲର କୋଡ୍ ମାଧ୍ୟମରେ ଭକ୍ତମାନଙ୍କୁ ଏକ ଆଧ୍ୟାତ୍ମିକ ଏବଂ ସୁନ୍ଦର ଅନୁଭବ ଦେବା ହେଉଛି ପ୍ରଶାସନର ମୁଖ୍ୟ ଲକ୍ଷ୍ୟ।
ମେଡିକାଲ ଛକ ସହିତ ମୁଖ୍ୟ ରାସ୍ତା ଏବଂ ଛକ ଗୁଡ଼ିକ ଏକ ନୂଆ ରୂପ ଦେଖାଯିବ। ପୁରୀ କୋଣାର୍କ ଉନ୍ନୟନ କର୍ତ୍ତୃପକ୍ଷ ପକ୍ଷରୁ ଏହି ବୃହତ୍ ପ୍ରକଳ୍ପ ପାଇଁ ଟେଣ୍ଡର ଆହ୍ୱାନ ହୋଇଛି। ସହରର ଐତିହ୍ୟ ଓ ସୌନ୍ଦର୍ଯ୍ୟକୁ ଆହୁରି ଉଜ୍ଜ୍ୱଳ କରିବା ପାଇଁ ଜିଲ୍ଲା ପ୍ରଶାସନ ୩ଟି ରଙ୍ଗ ଚୟନ କରି ସରକାରଙ୍କ ମଞ୍ଜୁରୀ ପାଇଁ ପଠାଇବ। ମଞ୍ଜୁରୀ ମିଳିଲେ, ରାସ୍ତାର ଉଭୟ ପାର୍ଶ୍ୱରେ ଥିବା ସମସ୍ତ କୋଠାର ରଙ୍ଗ ପରିବର୍ତ୍ତନ କରାଯିବ।
ପୂର୍ବରୁ ନବକଳେବର ୨୦୧୫ ସମୟରେ ଫିକା ହଳଦିଆ ଏବଂ ପରିକ୍ରମା ପ୍ରକଳ୍ପ ଅବସରରେ ଫିକା ଗୋଲାପୀ ରଙ୍ଗ ବ୍ୟବହୃତ ହୋଇଥିଲା, କିନ୍ତୁ ସେଥିରେ କାମ କେବଳ ବଡ଼ଦାଣ୍ଡ ମଧ୍ୟରେ ସୀମିତ ଥିଲା। ଏବେ ଏହି ପ୍ରୟାସ ପ୍ରବେଶ ପଥରୁ ଆରମ୍ଭ କରି ସମଗ୍ର ସହରକୁ ଆବରଣ କରିବ, ଯାହା ଭକ୍ତମାନଙ୍କୁ ଆଗମନ ସମୟରୁ ହିଁ ଏକ ହେରିଟେଜ୍ ଅନୁଭବ ଦେବ।
ପୁରୁଷୋତ୍ତମ ଭକ୍ତ ନିବାସ, ପୁରୁଣା ଜେଲ୍ ରୋଡ୍ ପାର୍କିଂ ଏବଂ କୁମ୍ଭାରପଡ଼ା ଥାନା ପରି ସରକାରୀ ଭବନ ସହିତ ବେସରକାରୀ କୋଠା ମାଲିକମାନଙ୍କୁ ମଧ୍ୟ ଏହି ୟୁନିଫର୍ମ କଲର କୋଡ୍ ଅନୁସରଣ କରିବାକୁ ନିର୍ଦ୍ଦେଶ ମିଳିବ। ଟେଣ୍ଡର ପ୍ରକ୍ରିୟା ଶେଷ ହେବା ପରେ ଦୁଇ ମାସ ମଧ୍ୟରେ ସମଗ୍ର କାମ ସମ୍ପୂର୍ଣ୍ଣ କରିବା ପାଇଁ ପ୍ରଶାସନ ଲକ୍ଷ୍ୟ ରଖିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |