ଭୁବନେଶ୍ୱର : ଓଡ଼ିଶାକୁ ପୂର୍ବ ଭାରତର ସର୍ବାଧିକ ଶିଳ୍ପ ଓ ନିବେଶ ଆକର୍ଷଣକାରୀ ରାଜ୍ୟରେ ପରିଣତ କରିବା ଲକ୍ଷ୍ୟରେ ରାଜ୍ୟ ସରକାର ଏକ ନୂତନ ରଣନୀତି ଘୋଷଣା କରିଛନ୍ତି । ଏହି ଦିଗରେ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ‘ଗୋ ଇଷ୍ଟ’ ଅଭିଯାନର ଶୁଭାରମ୍ଭ କରି ଶିଳ୍ପାୟନ ଓ ନିବେଶ ବୃଦ୍ଧି ପାଇଁ ଏକ ସୁଦୂରପ୍ରସାରୀ ରୋଡ ମ୍ୟାପ ଉପସ୍ଥାପନ କରିଛନ୍ତି ।
ଭୁବନେଶ୍ୱରରେ ଆୟୋଜିତ ସିଆଇଆଇ ଇଷ୍ଟର୍ଣ୍ଣ ରିଜିଓନାଲ କାଉନସିଲ ସମ୍ମିଳନୀରେ ଯୋଗଦେଇ ମୁଖ୍ୟମନ୍ତ୍ରୀ କହିଥିଲେ ଯେ, ରାଜ୍ୟରେ ଶିଳ୍ପ ସ୍ଥାପନ ଓ ପୁଞ୍ଜିନିବେଶକୁ ଆହୁରି ସହଜ ଏବଂ ଦ୍ରୁତ କରିବା ପାଇଁ ଏକ ଉଚ୍ଚସ୍ତରୀୟ ଟାସ୍କଫୋର୍ସ ଗଠନ କରାଯିବ। ଏହି ଟାସ୍କଫୋର୍ସ ବଡ଼ ବଡ଼ ନିବେଶ ପ୍ରକଳ୍ପର ଅଗ୍ରଗତି ଉପରେ ନଜର ରଖିବା ସହ ପ୍ରଶାସନିକ ବାଧା ଦୂର କରିବ।
ସେହିପରି, ନିବେଶ ପ୍ରସ୍ତାବ ଓ ମଞ୍ଜୁରୀ ପ୍ରକ୍ରିୟାକୁ ରିଅଲ୍ ଟାଇମ୍ରେ ଟ୍ରାକ୍ କରିବା ପାଇଁ ‘ଗୋ ସ୍ୱିଫ୍ଟ’ ନାମକ ଏକ ଡିଜିଟାଲ୍ ମଡ୍ୟୁଲ୍ ଆରମ୍ଭ କରାଯିବ। ଏହା ମାଧ୍ୟମରେ ନିବେଶକମାନେ ନିଜ ପ୍ରକଳ୍ପର ସ୍ଥିତି ସମ୍ପର୍କରେ ତତ୍କ୍ଷଣାତ୍ ସୂଚନା ପାଇପାରିବେ।
ମୁଖ୍ୟମନ୍ତ୍ରୀ କହିଥିଲେ ଯେ, ରାଜ୍ୟର ପଛୁଆ ଓ ଆର୍ଥିକ ଦୃଷ୍ଟିରୁ ଅନୁନ୍ନତ ଅଞ୍ଚଳଗୁଡ଼ିକୁ ଶିଳ୍ପ ବିକାଶର ମୁଖ୍ୟ ଧାରାରେ ସାମିଲ କରିବାକୁ ସରକାର ଗୁରୁତ୍ୱ ଦେଉଛନ୍ତି । ଏହି ଉଦ୍ଦେଶ୍ୟରେ ଶିଳ୍ପ ନୀତି ରିଜୋଲ୍ୟୁସନ୍-୨୦୨୨ରେ ସଂଶୋଧନ କରାଯାଇଛି । ଏହା ଦ୍ୱାରା ବଲାଙ୍ଗୀର, କଳାହାଣ୍ଡି, ନୂଆପଡ଼ା, କନ୍ଧମାଳ, ବୌଦ୍ଧ, ଗଜପତି ସମେତ ୧୫ଟି ଜିଲ୍ଲାରେ ଅଣ-ଖଣିଜ ଭିତ୍ତିକ ଶିଳ୍ପ ପ୍ରତିଷ୍ଠା ପାଇଁ ବ୍ୟାପକ ସୁଯୋଗ ସୃଷ୍ଟି ହେବ।
ସେ କହିଥିଲେ ଯେ, ଦୀର୍ଘଦିନ ଧରି ଦେଶର ଶିଳ୍ପ ଓ ଅର୍ଥନୈତିକ ବିକାଶ ପଶ୍ଚିମ ଓ ଦକ୍ଷିଣ ଭାରତକୁ କେନ୍ଦ୍ର କରି ଆଗେଇଥିଲା । କିନ୍ତୁ ବର୍ତ୍ତମାନ ପୂର୍ବ ଭାରତ ଦେଶର ନୂତନ ବିକାଶ କେନ୍ଦ୍ର ଭାବେ ଉଭା ହେଉଛି ଏବଂ ଏହି ପରିବର୍ତ୍ତନର ନେତୃତ୍ୱ ଓଡ଼ିଶା ନେବାକୁ ପ୍ରସ୍ତୁତ।
‘ସମୃଦ୍ଧ ଓଡ଼ିଶା-୨୦୩୬’ ଓ ‘ବିକଶିତ ଭାରତ-୨୦୪୭’ ଲକ୍ଷ୍ୟକୁ ସାମ୍ନାରେ ରଖି ରାଜ୍ୟକୁ ଦେଶର ସବୁଠାରୁ ନିବେଶକ-ଅନୁକୂଳ ଗନ୍ତବ୍ୟସ୍ଥଳୀରେ ପରିଣତ କରିବା ପାଇଁ ସରକାର କାର୍ଯ୍ୟ କରୁଥିବା ସେ କହିଥିଲେ।
ମୁଖ୍ୟମନ୍ତ୍ରୀଙ୍କ ସୂଚନା ଅନୁସାରେ, ଜୁନ୍ ୨୦୨୪ ପରଠାରୁ ରାଜ୍ୟ ସରକାର ପ୍ରାୟ ୯.୫ ଲକ୍ଷ କୋଟି ଟଙ୍କାର ୪୭୭ଟି ନିବେଶ ପ୍ରକଳ୍ପକୁ ଅନୁମୋଦନ ଦେଇଛନ୍ତି। ଏହି ପ୍ରକଳ୍ପ ଗୁଡ଼ିକ କାର୍ଯ୍ୟକାରୀ ହେଲେ ପ୍ରାୟ ୬ ଲକ୍ଷ ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ।
କାର୍ଯ୍ୟକ୍ରମରେ ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ ଯୁବପିଢ଼ିଙ୍କ ଦକ୍ଷତା ବିକାଶ ଓ ଶିଳ୍ପ ଆବଶ୍ୟକତା ଅନୁଯାୟୀ ମାନବ ସମ୍ପଦ ପ୍ରସ୍ତୁତି ଉପରେ ଜୋର ଦେଇଥିଲେ। ଏହା ସହିତ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ ଶର୍ମା ରାଜ୍ୟର ଶିଳ୍ପ ଅଗ୍ରଗତି, ନିବେଶ ସଫଳତା ଓ ଭବିଷ୍ୟତ ସମ୍ଭାବନା ସମ୍ପର୍କରେ ବିସ୍ତୃତ ଉପସ୍ଥାପନା ଦେଇଥିଲେ।
ସମ୍ମିଳନୀ ଶେଷରେ ମୁଖ୍ୟମନ୍ତ୍ରୀ ଦେଶର ବିଭିନ୍ନ ଶିଳ୍ପ ଗୋଷ୍ଠୀ ଓ ନିବେଶକଙ୍କୁ ଓଡ଼ିଶାର ବିକାଶ ଯାତ୍ରାରେ ସହଭାଗୀ ହେବାକୁ ଆହ୍ୱାନ ଜଣାଇଥିଲେ। ସେ କହିଥିଲେ, ସରକାର ଓ ଶିଳ୍ପ କ୍ଷେତ୍ରର ମିଳିତ ପ୍ରୟାସ ଦ୍ୱାରା ଓଡ଼ିଶାକୁ ଏକ ସଶକ୍ତ ଶିଳ୍ପ ରାଜ୍ୟ ଭାବେ ଗଢ଼ି ତୋଳାଯିବ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |