ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ଏବେ ଧ୍ବଂସମୁଖୀ ରୂପ ନେଇଛି। ଇରାନକୁ କେନ୍ଦ୍ର କରି ସଂଘର୍ଷ ତୀବ୍ର ହେଉଥିବାବେଳେ ତୈଳ ବଜାରରେ ଅସ୍ଥିରତା ଚୂଡ଼ାନ୍ତସ୍ତରକୁ ପହଞ୍ଚିଛି । ହେଲେ ଏହାରି ମଧ୍ୟରେ ଅର୍ଥାତ ଯୁଦ୍ଧ ମଧ୍ୟରେ ଇରାନ ହୋଇଛି ମାଲାମାଲ । ଇରାନ ତୈଳ ବିକ୍ରି କରି ଆର୍ଥିକ ଭାବେ ବଡ଼ ଲାଭ କରୁଥିବା ଖବର ଆସୁଛି ।
ଏକ ପକ୍ଷରେ ଆକାଶ ଓ ସ୍ଥଳ ଆକ୍ରମଣ ବଢ଼ୁଥିବାବେଳେ ଅନ୍ୟ ପକ୍ଷରେ ରାଜନୈତିକ ଅସନ୍ତୋଷ ମଧ୍ୟ ତୀବ୍ର ହୋଇଛି। ଆମେରିକା ପକ୍ଷରୁ ଇରାନକୁ କଡ଼ା ସତର୍କତା ଦିଆଯାଇଛି ଯେ ପରମାଣୁ କାର୍ଯ୍ୟକ୍ରମ ଉପରେ ନିୟନ୍ତ୍ରଣ ନହେଲେ ଗୁରୁତର ପରିଣାମ ହୋଇପାରେ। ତଥାପି ଦୁଇ ଦେଶ ମଧ୍ୟରେ ଆଲୋଚନା ଚାଲିଥିବା ଇଙ୍ଗିତ ମଧ୍ୟ ମିଳୁଛି।
ଏହି ସମୟରେ ବାଗଦାଦରେ ଆମେରିକୀୟ ସେନା ଘାଟି ଉପରେ ଆକ୍ରମଣ ଓ ଲେବାନନରେ ଇସ୍ରାଏଲ-ହିଜବୋଲା ମଧ୍ୟରେ ଘଟୁଥିବା ସଂଘର୍ଷ ପରିସ୍ଥିତିକୁ ଆହୁରି ଜଟିଳ କରିଛି । ଏହାର ପ୍ରଭାବରେ ଲକ୍ଷାଧିକ ଲୋକ ଜନଜୀବନରୁ ବଞ୍ଚିତ ହେବାସହ ବିସ୍ଥାପିତ ହୋଇଛନ୍ତି।
ତୈଳ ବଜାରରେ ଏହି ସଂଘର୍ଷର ପ୍ରଭାବ ଦେଖିବାକୁ ମିଳୁଛି। ହର୍ମୁଜ ପ୍ରଣାଳୀରେ ଉତ୍ତେଜନା ବଢ଼ିବାରୁ ଯୋଗାଣ ବାଧାପ୍ରାପ୍ତ ହୋଇଛି ଓ ବ୍ରେଣ୍ଟ କ୍ରୁଡ୍ ତୈଳ ମୂଲ୍ୟ ୧୦୦ ଡଲାର ଉପରେ ଚାଲିଯାଇଛି। ଏହାର ପରିଣାମରେ ବିଭିନ୍ନ ଦେଶରେ ଇନ୍ଧନ ଦର ବଢିବା ସହ ଆର୍ଥିକ ଚାପ ସୃଷ୍ଟି ହୋଇଛି।
ଏପରି ପରିସ୍ଥିତିରେ ଇରାନ ତୈଳ ରପ୍ତାନି ବଢ଼ାଇ ଆର୍ଥିକ ଭାବେ ଲାଭ ଉଠାଉଛି। ଅନ୍ତର୍ଜାତୀୟ ରିପୋର୍ଟ ଅନୁଯାୟୀ, ସମ୍ପ୍ରତି କିଛି ସପ୍ତାହ ମଧ୍ୟରେ ଇରାନର ଦୈନିକ ତୈଳ ଆୟ ଦ୍ୱିଗୁଣ ହୋଇଥିବା କୁହାଯାଉଛି । ବିଶ୍ୱ ବଜାରରେ ମୂଲ୍ୟ ବୃଦ୍ଧି ଓ ଯୋଗାଣ ସଙ୍କଟକୁ ଲାଭକାରୀ ଭାବରେ ବ୍ୟବହାର କରି ତେହେରାନ ନିଜ ଅର୍ଥନୀତିକୁ ମଜବୁତ କରୁଛି।
ସମଗ୍ର ଭାବେ ଦେଖିଲେ, ଏକ ପକ୍ଷରେ ଯୁଦ୍ଧ ବିଶ୍ୱ ପାଇଁ ଚିନ୍ତାର କାରଣ ହୋଇଥିବା ବେଳେ ଅନ୍ୟପକ୍ଷରେ କିଛି ଦେଶ ପାଇଁ ଆର୍ଥିକ ସୁଯୋଗ ମଧ୍ୟ ସୃଷ୍ଟି କରୁଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |