କୋରାପୁଟ : ପରିବାରର ଅଭାବ ଅନାଟନକୁ ଦୂର କରିବା ପାଇଁ ଛାଡି ଦେଇଥିଲେ ପାଠପଢା । ବହି ବସ୍ତାନୀରେ ବାନ୍ଧି ଦେଇଥିଲେ ଡୋରି । ଆଉ କମ ବୟସରୁ ଆରମ୍ଭ କରିଥିଲେ ଚାଷ କାମ। ଯେଉଁ ବୟସରେ ହାତରେ ଖାତା କଲମ ଧରି ପଢିବା କଥା ସେହି ବୟସରେ ଚାଷ କାମ କରି ଆଜି ସେ ସବୁଠି ପ୍ରଶଂସା ପାଉଛନ୍ତି ଆଉ ମିଳିଛି ତାଙ୍କୁ ସ୍ବତନ୍ତ୍ର ପରିଚୟ । ପଞ୍ଚମ କିମ୍ବା ଷଷ୍ଠ ଶ୍ରେଣୀ ଯାଏଁ ପାଠ ପଢିଛନ୍ତି । ସମ୍ପୂର୍ଣ୍ଣ ପାଠ ନପଢି ମଧ୍ୟ ପାଇଛନ୍ତି ସମ୍ମାନଜନକ ଡ଼କ୍ଟରେଟ୍ ଉପାଧି । ପାଠ ପଢିଲେ ହିଁ ଜଣେ ଡକ୍ଟର ହୋଇପାରିବେ ବୋଲି ତାଙ୍କର ଧାରଣା ଥିଲା । ମାତ୍ର ନିଜେ ଯେବେ ଚାଷ କରି ନିଜର ସ୍ବତନ୍ତ୍ର ପରିଚୟ ସୃଷ୍ଚି କରି ଏହି ଉପାଧି ହାସଲ କରିଲେ ସେବେ ତାଙ୍କ ଖୁସି କହିଲେ ନସରେ । ଏପରି ଜଣେ ସ୍ବତନ୍ତ୍ର ବ୍ୟକ୍ତିତ୍ବ ହେଉଛନ୍ତି ମାଣ୍ଡିଆ ରାଣୀ ରାଇମତି ଘିଉରିଆ ।
ଛୋଟ ବେଳରୁ ବାପା ମା’ଙ୍କ ସହିତ ଚାଷ ଜମିକୁ ଯାଆନ୍ତି । ଆଉ ସେଇଠୁ ପରିବାର ପ୍ରତିପୋଷଣ କରିବା ପାଇଁ ଆରମ୍ଭ କରିଥିଲେ ଚାଷ କାମ । ଏହା ପରେ ଶ୍ରମିକ ଭାବେ ମଧ୍ୟ ଅନେକ ଯାଗାରେ କାମ କରିଛନ୍ତି ମାଣ୍ଡିଆ ରାଣୀ ରାଇମତି ଘିଉରିଆ । ମାଣ୍ଡିଆ ଚାଷ କାମ ପାଇଁ ରାଇମତିଙ୍କର ଖୁବ ଆଗ୍ରହ ଥିଲା । ଯେଉଁ ସମୟରେ ଚାଷୀମାନେ ମାଣ୍ଡିଆ ଚାଷ ଛାଡୁଥିଲେ ସେହି ସମୟରେ ସେ ମାଣ୍ଡିଆ ଚାଷ ଆରମ୍ଭ କରିଥିଲେ । ଚାଷ କାମ ପାଇଁ ନିଜ ଗାଁରେ ସେ ବିହନ ଘର କରି ବିହନ ସଂଗ୍ରହ କରିଲେ । ମାଣ୍ଡିଆ ରାଣୀ ତାଙ୍କର ଏହି ଦେଶୀ ଚାଷର ଯାତ୍ରାକୁ ପ୍ରଥମେ ଏକୁଟିଆ ଆରମ୍ଭ କରିଥିଲେ । ଆଉ ଏବେ ସେ ନାରୀ ସଶକ୍ତିକରଣର ଏକ ଉପଯୁକ୍ତ ଉଦାହରଣ ସୃଷ୍ଟି କରିଛନ୍ତି ।
ବର୍ତ୍ତମାନ ତାଙ୍କ ସହିତ ୨୦୦୦ରୁ ଊର୍ଦ୍ଧ୍ୱ ମହିଳା ଚାଷୀ ଓ ପୁରୁଷ ଚାଷୀ ଯୋଡ଼ି ହୋଇଛନ୍ତି । ଏହା ସହିତ ବିଭିନ୍ନ ବ୍ୟବସାୟୀ ମଧ୍ୟ ତାଙ୍କର ଏହି ଅଭିଯାନରେ ଯୋଡ଼ି ହୋଇଛନ୍ତି । ମାଣ୍ଡିଆରାଣୀ ଏବେ ମଣ୍ଡିରେ ଡ଼ାଇରେକ୍ଟର ଭାବେ ମଧ୍ୟ କାର୍ଯ୍ଯ କରୁଛନ୍ତି । ଓଡ଼ିଶାରେ ମିଲେଟ୍ ମିଶନ ଆରମ୍ଭ ହେବା ପରେ ତାଙ୍କୁ ସହାୟତା ମିଳିଥିଲା । ଏପରିକି ମାଣ୍ଡିଆ ବିକ୍ରି କରିବା ପାଇଁ ତାଙ୍କୁ ମଣ୍ଡି ମିଳିବା ପରେ ସେ ବହୁତ ଖୁସି ହୋଇଥିଲେ । ଯାହା ତାଙ୍କୁ ଖୁବ୍ ଖୁସି ଲାଗିଥିଲା । ଦେଶୀ ଧାନରୁ ଚାଷ ଆରମ୍ଭ କରିଥିବା ରାଇମତି ଘିଉରିଆ ଚାଷୀମାନଙ୍କ ମାଣ୍ଡିଆ ପ୍ରତି ନିରୁତ୍ସାହ ଦେଖି ମାଣ୍ଡିଆ ଚାଷ କରିବା ଆରମ୍ଭ କରିଥିଲେ । ଏହା ପରେ ବିଭିନ୍ନ ଅଧିକାରୀ ତାଙ୍କ ଚାଷ ଦେଖି ତାଙ୍କୁ ମାଣ୍ଡିଆ ଦିବସରେ ଭୁବନେଶ୍ବରକୁ ନିମନ୍ତ୍ରଣ କରିଥିଲେ । ସେଠାରେ ମାଣ୍ଡିଆ ରାଣୀ ଭାବେ ତାଙ୍କୁ ଉପାଧି ମଧ୍ୟ ମିଳିଥିଲା । ଏହା ପରେ ସେ ଆଉ ପଛକୁ ଫେରି ଦେଖି ନାହାଁନ୍ତି । ପରେ G20 ଓ ଅନେକ କାର୍ଯ୍ୟକ୍ରମରେ ଯୋଗ ଦେଇ ବହୁ ପ୍ରଶଂସା ସାଉଁଟିଛନ୍ତି ମାଣ୍ଡିଆ ରାଣୀ । G20ରେ ତାଙ୍କୁ ମାଣ୍ଡିଆ କୁଇନ୍ ଭାବେ ସମ୍ମାନିତ କରାଯାଇଥିଲା । ତାଙ୍କ ପରିଶ୍ରମ, ବିହନ ସଂଗ୍ରହ ଠାରୁ ମାଣ୍ଡିଆ ଚାଷରୁ ମୁହଁ ଫେରାଇ ନେଉଥିବା ଚାଷୀଙ୍କୁ ପୁଣି ଏକତ୍ରିତ କରିବା ଭଳି ପ୍ରୟାସ ତାଙ୍କୁ ସଫଳତା ଆଣିଦେଇଛି । ଏଥିପାଇଁ ତାଙ୍କୁ ଓୟୁଏଟି ଭୁବନେଶ୍ବର ପକ୍ଷରୁ ସମ୍ମାନଜନକ ଡକ୍ଟରେଟ୍ ଉପାଧି ପ୍ରଦାନ କରାଯାଇଛି । ଏହା ସହିତ ବହ୍ମପୁର ୟୁନିଭର୍ସିଟି ତରଫରୁ ମଧ୍ୟ ସେ ଡକ୍ଟରେଟ୍ ହାସଲ କରିଛନ୍ତି ।
ମାଣ୍ଡିଆ ରାଣୀ ତାଙ୍କ ଜମିରୁ ୨୦ କ୍ବିଣ୍ଟାଲ ମାଣ୍ଡିଆ ଉତ୍ପାଦନ କରନ୍ତି । ଯାହାକି ତାଙ୍କର ନିଜସ୍ବ ବ୍ୟବହାର ଏବଂ ମଣ୍ଡିରେ ବିକ୍ରି ପାଇଁ ପ୍ରଯୁଜ୍ୟ । ତେବେ କେବଳ ରାଜ୍ୟ କିମ୍ବା ଦେଶ ନୁହେଁ ବିଦେଶକୁ ମଧ୍ୟ ଯାଇଛି ମାଣ୍ଡିଆ ରାଣୀଙ୍କ ମାଣ୍ଡିଆ । ବାର୍ଷିକ ୨୦ ରୁ ୪୦ କ୍ବିଣ୍ଟାଲ ମାଣ୍ଡିଆ ବାହାରକୁ ପଠାନ୍ତି । ମାଣ୍ଡିଆ ଚାଷକୁ ନେଇ ସେ କହିଛନ୍ତି ଜଣେ ଚାଷୀ ମନୋବଳ ଦୃଢ ରଖିଲେ ମାଣ୍ଡିଆ ଚାଷ ମାଧ୍ୟମରେ ସେ ବି ଦିନେ ତା ଫସଲକୁ ଦେଶ ବିଦେଶରେ ପହଞ୍ଚାଇ ପାରିବ ।
ରାଇମତି ଘିଉରିଆ କୋରାପୁଟ ଜିଲ୍ଲା କୁନ୍ଦୁରା ବ୍ଳକ ତଥା ଲିମା ପଞ୍ଚାୟତ ଅନ୍ତର୍ଗତ ନୁଆଗୁଡା ଗ୍ରାମରେ ଏକ ଭୁମିଆ ସମ୍ପ୍ରଦାୟର ଜନ୍ମଗ୍ରହଣ କରିଥିଲେ । ଭାରତର ରାଷ୍ଟ୍ରପତିଙ୍କ ଦ୍ୱାରା ଡକ୍ଟରେଟ ଉପାଧିରେ ଜଣେ ସମ୍ମାନିତ ଚାଷୀ । ସେ ୭୨ ସ୍ୱଦେଶୀ ଧାନ ବିହନ କିସମ ସହିତ ୩୦ କିସମର ମାଣ୍ଡିଆ ନିଜ ଜମିରେ ଚାଷ କରି ସେଗୁଡିକର ସଂରକ୍ଷଣ କରିପାରିଛନ୍ତି । ଭିନ୍ନ ଭିନ୍ନ କିସମର ମାଣ୍ଡିଆ ଚାଷରେ ତାଙ୍କର ପାରଦର୍ଶିତା ଯୋଗୁଁ କୋରାପୁଟ ଜିଲ୍ଲାରେ ସେ “ମାଣ୍ଡିଆ ରାଣୀ” ନାମରେ ପରିଚିତ । ସେ ଜୟପୁରସ୍ଥିତ MS Swaminathan Research Foundationରେ ଜୈବିକ କୃଷି ପଦ୍ଧତି ସମ୍ପର୍କରେ ଉପଯୁକ୍ତ ତାଲିମ ପାଇଥିଲେ ।
ପରବର୍ତ୍ତୀ ସମୟରେ ଲୋପ ପାଇଯାଉଥିବା ପ୍ରାୟ ୭୨ ସ୍ୱଦେଶୀ ଧାନ ବିହନ କିସମ ସହିତ ୩୦ କିସମର ମାଣ୍ଡିଆ ସଂରକ୍ଷଣ ତଥା ଜୈବିକ ଚାଷ କରି ଲୋକ ଲୋଚନକୁ ଆସିଥିଲେ । ତାଙ୍କରି ପ୍ରେରଣାରେ ଅନେକ ମହିଳା ମାଣ୍ଡିଆ ଚାଷରେ ସଫଳତା ହାସଲ କରି ଉପାର୍ଜନକ୍ଷମ ହେବାରେ ସକ୍ଷମ ହୋଇଛନ୍ତି । ଉନ୍ନତ ପ୍ରଣାଳୀରେ ମାଣ୍ଡିଆ ଚାଷ କରିବା ସମ୍ପର୍କରେ ସେ ସେହି ଅଞ୍ଚଳର ଅନେକ ପୁରୁଷ ଓ ମହିଳାଙ୍କୁ ତାଲିମ ଦେଇଛନ୍ତି ମାଣ୍ଡିଆ ରାଣୀ ରାଇମତି ଘିଉରିଆ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |