କୋରାପୁଟ: ଉନ୍ନତମାନର ଚାଷ କାମ କରି ଆଜି କେବଳ ଜିଲ୍ଲାରେ ନୁହେଁ ବରଂ ବଡ ବଡ କମ୍ପାନୀରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି କାମୋମାଇଲ ଫୁଲ ଚାଷୀ । ନିଜ ପେଟ ପାଇଁ ୨ ପଇସା ରୋଜଗାର କରିବା ସହ ସ୍ୱାବଲମ୍ବୀ ଓ ଆତ୍ମନିର୍ଭରଶୀଳ ହୋଇପାରିଛନ୍ତି ଏହି ଚାଷୀମାନେ । ଯାହା କେବେ ଭାବି ନଥିଲେ ଯାହା କେବେ ସ୍ୱପ୍ନ ଦେଖି ନଥିଲେ ତାହା ଆଜି ତାଙ୍କ ହାତ ମୁଠାରେ । ଖାଲି ସେତିକି ନୁହେଁ ଏହି ଚାଷ ଉପରେ ରହିଛି ରାଜ୍ୟଠୁ ନେଇ ଦେଶର ସମସ୍ତ ବଡ ବଡ କମ୍ପୀନୀର ନଜର । କିଏ ଟଙ୍କା ନେଇ କିଣୁଛି ତ କିଏ ମଞ୍ଜି ନେଇ ବ୍ୟବସାୟ କରୁଛି । କେବଳ କମ୍ପୀନୀ ନୁହେଁ ବଡ ବଡ ମେଳାରେ ବି ଏହି କାମୋମାଇଲ ଫୁଲର ରହିଛି ଅନେକ ଚାହିଦା ।
ସତେଜ ସବୁଜ ଉପତ୍ୟକାର ପୃଷ୍ଠ ଭୂମି ଉପରେ ଅବସ୍ଥିତ କୋରାପୁଟ ଜିଲ୍ଲା । କୋରାପୁଟ କେବଳ ଗୋଟିଏ ଜିଲ୍ଲା ନୁହେଁ ବରଂ ଉର୍ବର ମାଟି, ମାଳଭୂମିର ଜଳବାୟୁ ଓ ଜଳସେଚନର ସୁବ୍ୟବସ୍ଥା ଯୋଗୁଁ ବହୁ ସଂସ୍ଥାର ନଜର ଏବେ ଏହି ଯାଗା ଉପରେ । ଭଳିକି ଭଳି ଫୁଲ ସହିତ କଫି ଓ ମସଲା ଚାଷ ପାଇଁ ସ୍ୱାବଲମ୍ବୀ ହୋଇପାରିଛି କୋରାପୁଟ ଜିଲ୍ଲା । ଗତ ୨୦୨୪ରେ କାମୋମାଇଲ ଫୁଲ ଚାଷ କରି ବେଶ ୨ ପଇସା ଭଲ ରୋଜଗାର କରିପାରିଛନ୍ତି କୋରାପୁଟ ଜିଲ୍ଲାର ଫୁଲ ଚାଷୀ । ଏଥିପାଇଁ ଜିଲ୍ଲାର ଏହି ଚାଷୀଙ୍କୁ ମିଳିଛି ବଡ ସଫଳତା । ବୈଜ୍ଞାନିକ ସଂସ୍ଥା ‘ସିମ୍ୟାପ’ର ସହାୟତାରେ ପଟାଙ୍ଗି ଆଗ୍ରୋ ପ୍ରଡକ୍ସ ପ୍ରଡ୍ୟୁସର କମ୍ପାନୀ ମହିଳାଙ୍କୁ ନେଇ ଆରମ୍ଭ କରିଛି କାମୋମାଇଲ ଚାଷ । ଯାହା ସେମାନଙ୍କୁ ସ୍ୱାବଲମ୍ବୀ କରିବା ସହ ଆତ୍ମନିର୍ଭରଶୀଳ କରିପାରିଛି । ଡିସେମ୍ବରରୁ ଫେବୃଆରୀ ମାଧ୍ୟମରେ କାମୋମାଇଲ ଚାଷରୁ ଫୁଲ ଅମଳ ହୋଇଥାଏ । ଗତବର୍ଷ କୋଟିଆରେ ୧ ଏକର ଜମିରେ ୬ଜଣ ମହିଳା କାମୋମାଇଲ ଚାଷ କରିଥିଲେ । ଏମାନଙ୍କ ମାଧ୍ୟମରେ ପାଖାପାଖି ୩୦ କେଜି ଫୁଲ ଅମଳ ହୋଇଥିଲା । ଏହାପରେ ଏହି କାମୋମାଇଲ ଫୁଲକୁ କେଜି ପ୍ରତି ୧୨ଶହ ଟଙ୍କାରେ ଓରମାସର ପଟାଙ୍ଗୀ ଆଗ୍ରୋ ପ୍ରଡକ୍ଟ କମ୍ପାନୀ କିଣି ନେଇଥିଲା । ଆଉ ବାକି ଫୁଲକୁ କେମୋ ଗ୍ରୀନ ଚା ପ୍ୟାକେଜିଂ କରି ରାଜ୍ୟର ବିଭିନ୍ନ ମେଳାରେ ବିକ୍ରି କରାଯାଇଥିଲା । ଏବେ ଏହି ଚାଷକୁ ଆହୁରି ଉନ୍ନତ କରିବା ସହ ଭଲ ଫୁଲ କେମିତି ହେବ ସେଥିପାଇଁ ‘ସିମ୍ୟାପ’ ଏହି ଚାଷ ଲାଗି ୨ କ୍ୱିଣ୍ଟାଲ ବିହନ ଯୋଗାଇବ । ଯାହା କୋଟିଆ, ମାଥଲାମ୍ବା, ଗୁମେଲପଦର, ତୁରିଆ, ଫୁଲପଦର, ଫଗୁଣସୁନେରୀ, ଉପରସେମ୍ବି ଅଞ୍ଚଳର ୫୦ ଏକ ଜମିରେ ଚାଷ କରାଯିବ । ଏହାସହ ଆଗାମୀ ଦିନରେ ଏହା କିଭଳି ଭଲ ଚାଷ ହୋଇପାରିବ ଓ ଭଲ ରୋଜଗାର ହୋଇପାରିବ ଚାଷୀଙ୍କ ପାଇଁ ସେଥିପାଇଁ ଏହାର ବଜାର ବ୍ୟବସ୍ଥା ଉପରେ ମଧ୍ୟ ଗୁରୁତ୍ୱ ଦିଆଯିବ । ଏହି କାମୋମାଇଲ ଗ୍ରୀନ ଟିର ବହୁ ଔଷଧୀୟ ଗୁଣ ରହିଛି । ମଧୁମେହ(ଡାଇବେଟିସ) ଠାରୁ ଆରମ୍ଭ କରି ଚର୍ମକୁ ସତେଜ ରଖିବାରେ ବେଶ ସହାୟକ ହୋଇଥାଏ । ସେହିପରି ଥକ୍କାପଣକୁ ଦୂର କରିବାରେ ଏହି ଟି ଖୁବ ଲାଭଦାୟକ ।
ଯୁଗ ବଦଳିବା ସହ ସମୟ ମଧ୍ୟ ବଦଳୁଛି । ଏବେ ବଜାରରେ ସିଆସିଡର ଚାହିଦା ଅଧିକ ମାତ୍ରାରେ ରହିଛି । ତେଣୁ ୨୦୨୬ରେ ଏଠାରେ ସିଆସିଡ ଚାଷ କରିବାକୁ ଲକ୍ଷ ରଖିଛନ୍ତି କୋରାପୁଟ ଅଞ୍ଚଳର ଚାଷୀମାନେ ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |