ଭୁବନେଶ୍ୱର : ନାଗରିକଙ୍କୁ ଶୀଘ୍ର ଓ ସହଜରେ ପୋଲିସ ସେବା ଯୋଗାଇଦେବା ଦିଗରେ ଓଡ଼ିଶା ପୋଲିସ ଆଉ ଏକ ପଦକ୍ଷେପ ନେଇଛି। ଏଣିକି ଘରେ ବସି ହ୍ୱାଟ୍ସଆପ୍ ମାଧ୍ୟମରେ ବିଭିନ୍ନ ପୋଲିସ ସେବା ପାଇପାରିବେ ସାଧାରଣ ଲୋକ। ଏଥିପାଇଁ ପ୍ରତ୍ୟେକ କାମ ନିମନ୍ତେ ଥାନା କିମ୍ବା ସମ୍ପୃକ୍ତ ପୋଲିସ କାର୍ଯ୍ୟାଳୟକୁ ଯିବାର ଆବଶ୍ୟକତା ରହିବ ନାହିଁ।
ଡିଜିଟାଲ୍ ମାଧ୍ୟମରେ ପୋଲିସ ସେବାକୁ ଅଧିକ ସରଳ ଓ ଲୋକାଭିମୁଖୀ କରିବା ଲକ୍ଷ୍ୟରେ ଏହି ବ୍ୟବସ୍ଥା କରାଯାଇଛି। ଏହାଦ୍ୱାରା ସେବା ପାଇବାର ପ୍ରକ୍ରିୟା ସହଜ ହେବା ସହ ଲୋକଙ୍କ ସମୟ ମଧ୍ୟ ବଞ୍ଚିବ। ସେହିପରି ସେବା ପ୍ରଦାନରେ ସ୍ୱଚ୍ଛତା, ଦ୍ରୁତତା ଓ ଦାୟିତ୍ୱବୋଧ ବଢ଼ାଇବାକୁ ମଧ୍ୟ ଗୁରୁତ୍ୱ ଦିଆଯାଇଛି।
ସୂଚନା ଅନୁସାରେ, ୨୦୨୫ ଡିସେମ୍ବର ୨୫ରେ ସୁଶାସନ ଦିବସ ଅବସରରେ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ‘ଆମ ସାଥୀ’ ହ୍ୱାଟ୍ସଆପ୍ ବଟ୍ର ଶୁଭାରମ୍ଭ କରିଥିଲେ। ସରକାରୀ ସେବାକୁ ଡିଜିଟାଲ୍ ମାଧ୍ୟମରେ ସିଧାସଳଖ ଲୋକଙ୍କ ନିକଟରେ ପହଞ୍ଚାଇବା ଏହାର ମୁଖ୍ୟ ଉଦ୍ଦେଶ୍ୟ।
ଏହି ବ୍ୟବସ୍ଥାକୁ ବିକଶିତ କରିବାରେ ଓଡ଼ିଶା ସରକାରଙ୍କ ଆଧୁନିକୀକରଣ ସରକାରୀ ପଦକ୍ଷେପ ପାଇଁ କେନ୍ଦ୍ର (CMGI), ରାଜ୍ୟ ଅପରାଧ ରେକର୍ଡ ବ୍ୟୁରୋ (SCRB), ଓଡ଼ିଶା ପୋଲିସ ଏବଂ Meta India (WhatsApp) ମିଳିତ ଭାବେ କାର୍ଯ୍ୟ କରିଛନ୍ତି। ଏହି ସହଭାଗିତାରେ ‘ଆମ ସାଥୀ ୟୁନିଫାଏଡ୍ ହ୍ୱାଟ୍ସଆପ୍ ବଟ୍’ ପ୍ରସ୍ତୁତ କରାଯାଇଛି।
ନାଗରିକଙ୍କ ଆବଶ୍ୟକତାକୁ ଆଗରେ ରଖି ବିଭିନ୍ନ ସେବାକୁ ଏହି ହ୍ୱାଟ୍ସଆପ୍ ବଟ୍ରେ ସାମିଲ କରାଯାଇଛି। ଫଳରେ ଲୋକେ ନିଜ ମୋବାଇଲ୍ ଫୋନ୍ରୁ ଆବଶ୍ୟକ ସେବା ସମ୍ପର୍କରେ ଜାଣିବା ସହ ଉପଲବ୍ଧ ସୁବିଧାର ଲାଭ ନେଇପାରିବେ।
ନାଗରିକ-କେନ୍ଦ୍ରିକ ଡିଜିଟାଲ୍ ସୁଶାସନକୁ ଆହୁରି ମଜବୁତ କରିବା ଦିଗରେ ‘ଆମ ସାଥୀ’ ହ୍ୱାଟ୍ସଆପ୍ ବଟ୍କୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି। ଟେକ୍ନୋଲୋଜିର ସହାୟତାରେ ପୋଲିସ ଓ ନାଗରିକଙ୍କ ମଧ୍ୟରେ ସେବା ପ୍ରଦାନକୁ ଅଧିକ ସହଜ, ଦ୍ରୁତ ଓ ସୁବିଧାଜନକ କରିବା ଏହାର ମୁଖ୍ୟ ଲକ୍ଷ୍ୟ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |