ଭାରତର ଅଲିମ୍ପିକ୍ ସ୍ୱର୍ଣ୍ଣପଦକ ବିଜେତା ଜାଭେଲିନ୍ ତାରକା ନୀରଜ ଚୋପ୍ରା ଦେଶର ତୃଣମୂଳ ସ୍ତରର କ୍ରୀଡ଼ା ବିକାଶ ପ୍ରତି ନିଜର ପ୍ରତିବଦ୍ଧତାକୁ ଆହୁରି ସୁଦୃଢ଼ କରିଛନ୍ତି । ଗତ ଦୁଇ ବର୍ଷ ଧରି ଏହି କାର୍ଯ୍ୟକ୍ରମ ସହ ଜଡ଼ିତ ଥିବା ନୀରଜ ଚୋପ୍ରା ଏବେ ଏହାର ସହ-ମାଲିକ ଭାବେ ନୂଆ ଦାୟିତ୍ୱ ନେଇଛନ୍ତି। ଶିଶୁମାନଙ୍କ ମଧ୍ୟରେ କ୍ରୀଡ଼ାକୁ ଲୋକପ୍ରିୟ କରିବା ଏହି ପ୍ରୟାସର ମୁଖ୍ୟ ଲକ୍ଷ୍ୟ।
ଏହି ନୂଆ ଦାୟିତ୍ୱ ମାଧ୍ୟମରେ ନୀରଜଙ୍କ ଲକ୍ଷ୍ୟ ହେଉଛି ଦେଶର ଅଧିକ ସଂଖ୍ୟକ ଶିଶୁଙ୍କୁ କ୍ରୀଡ଼ା ସହ ଯୋଡ଼ିବା ଏବଂ ସକ୍ରିୟ ଜୀବନଶୈଳୀ ପ୍ରତି ପ୍ରେରିତ କରିବା। ଦେଶର ବିଭିନ୍ନ ସହରରେ ଚାଲୁଥିବା ଏହି କାର୍ଯ୍ୟକ୍ରମ ମାଧ୍ୟମରେ ଏପର୍ଯ୍ୟନ୍ତ ୨.୫ ଲକ୍ଷରୁ ଅଧିକ ଶିଶୁ ଓ ୨,୫୦୦ରୁ ଅଧିକ ବିଦ୍ୟାଳୟ ଯୋଗଦେଇ ସାରିଛନ୍ତି।
ନୀରଜ ଚୋପ୍ରା କହିଛନ୍ତି ଯେ, ଗତ ଦୁଇ ବର୍ଷ ମଧ୍ୟରେ ସେ ଦେଖିଛନ୍ତି ଏହି ପ୍ରୟାସ ଶିଶୁମାନଙ୍କ ମଧ୍ୟରେ କେତେ ସକାରାତ୍ମକ ପ୍ରଭାବ ପକାଇଛି । ପ୍ରତ୍ୟେକ ଶିଶୁଙ୍କର ନିଜ ପ୍ରତିଭାକୁ ଚିହ୍ନଟ ଓ ପ୍ରଦର୍ଶନ କରିବାର ସୁଯୋଗ ମିଳିବା ଉଚିତ୍ ବୋଲି ସେ କହିଛନ୍ତି। ଏହି ଉଦ୍ଦେଶ୍ୟକୁ ଆହୁରି ଆଗକୁ ନେବା ପାଇଁ ସହ-ମାଲିକ ଭୂମିକା ଗ୍ରହଣ କରିବା ସ୍ୱାଭାବିକ ପଦକ୍ଷେପ ଥିଲା ବୋଲି ମଧ୍ୟ ସେ ମତ ପ୍ରକାଶ କରିଛନ୍ତି।
ତାଙ୍କ ଅନୁସାରେ, ଆଗାମୀ ଦିନରେ ଏହି ପ୍ରୟାସ ମାଧ୍ୟମରେ ଦେଶର ୧୦ ଲକ୍ଷ ଶିଶୁଙ୍କ ପାଖରେ ପହଞ୍ଚିବାର ଲକ୍ଷ୍ୟ ରଖାଯାଇଛି । ଶିଶୁ, ଶିକ୍ଷକ ଓ ବିଦ୍ୟାଳୟମାନଙ୍କ ସହ ନିଜ ଅଭିଜ୍ଞତା ବାଣ୍ଟି ସେମାନଙ୍କୁ କ୍ରୀଡ଼ା ପ୍ରତି ଆକର୍ଷିତ କରିବାକୁ ସେ ଆଗ୍ରହ ପ୍ରକାଶ କରିଛନ୍ତି।
ନୀରଜ ଚୋପ୍ରାଙ୍କ ଏହି ନୂଆ ଭୂମିକା ସହ କାର୍ଯ୍ୟକ୍ରମଟି ଏବେ ବିସ୍ତାରର ନୂଆ ପର୍ଯ୍ୟାୟକୁ ପ୍ରବେଶ କରିଛି । କେବଳ କ୍ରୀଡ଼ା ସହ ପରିଚୟ କରାଇବା ନୁହେଁ, ବରଂ ଶିଶୁମାନଙ୍କ ମଧ୍ୟରେ ଆତ୍ମବିଶ୍ୱାସ, ଶୃଙ୍ଖଳା ଓ ଦୀର୍ଘକାଳୀନ କ୍ରୀଡ଼ା ସଂସ୍କୃତି ଗଢ଼ି ତୋଳିବା ମଧ୍ୟ ଏହାର ପ୍ରମୁଖ ଲକ୍ଷ୍ୟ ରହିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |