ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନିଙ୍କ ନାମରେ ନୂଆ ରେକର୍ଡ। ମେଲୋନିଙ୍କ ନେତୃତ୍ୱରେ ଗଠିତ ମେଣ୍ଟ ସରକାର ୧୪୧୩ ଦିନ ପୂରଣ କରିଛି। ଏହା ୨୦୦୦ ଦଶକରେ ସିଲଭିଓ ବର୍ଲୁସ୍କୋନିଙ୍କ ଦ୍ୱିତୀୟ କାର୍ଯ୍ୟକାଳଠାରୁ ଗୋଟିଏ ଦିନ ଅଧିକ।
ମେଲୋନିଙ୍କ ସରକାରର ଚାରି ବର୍ଷର କାର୍ଯ୍ୟକାଳ ପୂରଣ ହେବାକୁ ଆହୁରି ପ୍ରାୟ ସାତ ସପ୍ତାହ ବାକି ରହିଛି। ତେବେ ଇଟାଲୀର ରାଜନୀତିରେ ବାରମ୍ବାର ସରକାର ପରିବର୍ତ୍ତନ ହେବା ସାଧାରଣ ଘଟଣା। ଏଭଳି ପରିସ୍ଥିତିରେ ଦୀର୍ଘ ସମୟ ଧରି ସରକାରର ନେତୃତ୍ୱ ନେବା ମେଲୋନିଙ୍କ ପାଇଁ ଏକ ବଡ଼ ସଫଳତା ଭାବେ ଦେଖାଯାଉଛି।
ମେଲୋନିଙ୍କ ଏହି ସଫଳତା ପାଇଁ ଭାରତର ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦି ତାଙ୍କୁ ଶୁଭେଚ୍ଛା ଜଣାଇଛନ୍ତି। ସୋସିଆଲ ମିଡିଆରେ ପୋଷ୍ଟ କରି ମୋଦି କହିଛନ୍ତି ଯେ, ଇଟାଲୀର ଯୁଦ୍ଧ ପରବର୍ତ୍ତୀ ଇତିହାସରେ ମେଲୋନି ଦୀର୍ଘ ସମୟ ଧରି ପ୍ରଧାନମନ୍ତ୍ରୀ ଭାବେ କାର୍ଯ୍ୟ କରି ଏକ ନୂଆ ମାଇଲଖୁଣ୍ଟ ସ୍ଥାପନ କରିଛନ୍ତି।
ମୋଦି କହିଛନ୍ତି ଯେ, ଏହି ସଫଳତା ମେଲୋନିଙ୍କ ନେତୃତ୍ୱ ପ୍ରତି ଇଟାଲୀର ଜନସାଧାରଣଙ୍କ ବିଶ୍ୱାସକୁ ପ୍ରତିଫଳିତ କରୁଛି । ଏହି ଉପଲବ୍ଧି ପାଇଁ ସେ ମେଲୋନିଙ୍କୁ ଅଭିନନ୍ଦନ ଜଣାଇବା ସହ ଆଗାମୀ ବର୍ଷଗୁଡ଼ିକ ମଧ୍ୟ ତାଙ୍କ ପାଇଁ ସଫଳତାରେ ଭରି ରହୁ ବୋଲି କାମନା କରିଛନ୍ତି।
ପ୍ରଧାନମନ୍ତ୍ରୀ ମୋଦି ଆହୁରି କହିଛନ୍ତି ଯେ, ମେଲୋନିଙ୍କ ସହଯୋଗ ଓ ବନ୍ଧୁତା ଭାରତ ଏବଂ ଇଟାଲୀ ମଧ୍ୟରେ ରଣନୈତିକ ସମ୍ପର୍କକୁ ଆହୁରି ମଜବୁତ କରିଛି। ଦୁଇ ଦେଶର ଉଜ୍ଜ୍ୱଳ ଏବଂ ସମୃଦ୍ଧ ଭବିଷ୍ୟତ ପାଇଁ ଆଗାମୀ ଦିନରେ ମେଲୋନିଙ୍କ ସହ ମିଶି କାମ କରିବାକୁ ସେ ଆଗ୍ରହୀ ବୋଲି କହିଛନ୍ତି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |