ନୂଆଦିଲ୍ଲୀ: ଅନ୍ତର୍ଜାତୀୟ ଶିଖର ସମ୍ମିଳନୀରେ ସାଧାରଣତଃ କୂଟନୈତିକ ଆଲୋଚନା, ଚୁକ୍ତି ସ୍ୱାକ୍ଷର ଓ ଔପଚାରିକ ସାକ୍ଷାତକୁ ଗୁରୁତ୍ୱ ଦିଆଯାଏ। କିନ୍ତୁ ନୂଆଦିଲ୍ଲୀରେ ଆୟୋଜିତ ଭାରତ-ଜାପାନ ଶିଖର ସମ୍ମିଳନୀରେ ଏକ ଆତ୍ମୀୟ ମୁହୂର୍ତ୍ତ ସମସ୍ତଙ୍କ ନଜର ଆକର୍ଷଣ କରିଛି। ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦି ଜାପାନର ପ୍ରଧାନମନ୍ତ୍ରୀ ତକାଇଚିଙ୍କୁ ‘ମୋ ସାନ ଭଉଣୀ’ ବୋଲି ସମ୍ବୋଧନ କରିବା ପରେ ଦୁଇ ଦେଶର ସମ୍ପର୍କକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି।
ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଦାୟିତ୍ୱ ନେବା ପରେ ତକାଇଚିଙ୍କର ଏହା ପ୍ରଥମ ଭାରତ ଗସ୍ତ। ଦ୍ୱିପାକ୍ଷିକ ଆଲୋଚନା ସମୟରେ ସେ କହିଥିଲେ ଯେ, ଜାପାନର ଦିବଙ୍ଗତ ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେ ତାଙ୍କ ପାଇଁ ଜଣେ ବଡ଼ ଭାଇ ସଦୃଶ ଥିଲେ। ସିଞ୍ଜୋ ଆବେ ଓ ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦିଙ୍କ ଘନିଷ୍ଠ ବନ୍ଧୁତ୍ୱକୁ ସ୍ମରଣ କରି ସେ କହିଥିଲେ, ସେହି ସମ୍ପର୍କର ଧାରାକୁ ସେ ଆଗକୁ ନେବାକୁ ଚାହୁଁଛନ୍ତି।
ଏହାର ଜବାବରେ ପ୍ରଧାନମନ୍ତ୍ରୀ ମୋଦି ତକାଇଚିଙ୍କୁ ନିଜର ‘ସାନ ଭଉଣୀ’ ବୋଲି ସମ୍ବୋଧନ କରିଥିଲେ। ଏହି ଆତ୍ମୀୟ ସମ୍ବୋଧନକୁ ତକାଇଚି ହସିମୁଖରେ ସ୍ୱାଗତ କରି କହିଥିଲେ ଯେ, ଏହା ତାଙ୍କ ପାଇଁ ସମ୍ମାନର ବିଷୟ। ସେ ଆଶା ପ୍ରକାଶ କରିଥିଲେ ଯେ, ଭାଇ-ଭଉଣୀ ପରି ପାରସ୍ପରିକ ବିଶ୍ୱାସ ଓ ସହଯୋଗରେ ଭାରତ-ଜାପାନ ସମ୍ପର୍କ ଆଗାମୀ ଦିନରେ ଆହୁରି ମଜବୁତ ହେବ।
ଏହି ଶିଖର ସମ୍ମିଳନୀ କେବଳ ଭାବପ୍ରବଣ ମୁହୂର୍ତ୍ତରେ ସୀମିତ ରହିନଥିଲା। ଉଭୟ ଦେଶ ମଧ୍ୟରେ ପ୍ରଥମ ଥର ପାଇଁ ଏକ ଐତିହାସିକ ପ୍ରତିରକ୍ଷା ସହ-ବିକାଶ ଚୁକ୍ତି ସ୍ୱାକ୍ଷରିତ ହୋଇଥିବାବେଳେ, ଅର୍ଥନୈତିକ ସୁରକ୍ଷା, କୃତ୍ରିମ ବୁଦ୍ଧିମତ୍ତା (AI), ସେମିକଣ୍ଡକ୍ଟର, ସ୍ୱଚ୍ଛ ଶକ୍ତି ଓ ଉନ୍ନତ ପ୍ରଯୁକ୍ତି କ୍ଷେତ୍ରରେ ସହଯୋଗ ବୃଦ୍ଧି କରିବାକୁ ମଧ୍ୟ ସହମତି ପ୍ରକାଶ ପାଇଛି।
ପ୍ରଧାନମନ୍ତ୍ରୀ ମୋଦି ତକାଇଚିଙ୍କ ନେତୃତ୍ୱର ପ୍ରଶଂସା କରି କହିଥିଲେ ଯେ, ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ସେ ଦେଶକୁ ନୂଆ ଦିଗ ଦେଉଛନ୍ତି।
ଅନ୍ୟପଟେ ତକାଇଚି ମଧ୍ୟ ଭାରତ ସହ ରଣନୈତିକ ସହଯୋଗକୁ ଅଧିକ ଗଭୀର କରିବା ଉପରେ ଗୁରୁତ୍ୱ ଦେଇଥିଲେ।
ବିଶ୍ୱର ଦୁଇ ପ୍ରମୁଖ ଅର୍ଥନୈତିକ ଶକ୍ତି ଭାବେ ଭାରତ ଓ ଜାପାନ ମଧ୍ୟରେ ବଢ଼ୁଥିବା ବିଶ୍ୱାସ, ଆତ୍ମୀୟତା ଓ ରଣନୈତିକ ସହଯୋଗ ଇଣ୍ଡୋ-ପାସିଫିକ୍ ଅଞ୍ଚଳରେ ସ୍ଥିରତା ଓ ବିକାଶକୁ ନୂଆ ଗତି ଦେବ ବୋଲି ବୈଦେଶିକ ନୀତି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |