ଭୁବନେଶ୍ୱର : ରାତି ପାହିଲେ ବାହୁଡା ଯାତ୍ରା । ଶ୍ରୀଗୁଣ୍ଡିଚା ମନ୍ଦିରରେ ନଅ ଦିନର ଅବସ୍ଥାନ ପରେ ମାଉସୀ ଘରୁ କାଲି ପୁଣିଥରେ ରଥରେ ଝୁଲି ଝୁଲି ରତ୍ନସିଂହାସନକୁ ଆସିବେ ମହାପ୍ରଭୁ ଜଗନ୍ନାଥ, ବଡ଼ଭାଇ ବଳଭଦ୍ର ଓ ଭଉଣୀ ସୁଭଦ୍ରା। ଏହାକୁ ନେଇ ବଡଦାଣ୍ଡରେ ଭକ୍ତଙ୍କ ମଧ୍ୟରେ ଦେଖାଦେଇଛି ଅପାର ଉତ୍ସାହ ଓ ଆଧ୍ୟାତ୍ମିକ ପରିବେଶ।
ତେବେ ରତ୍ନସିଂହାସନକୁ ଫେରିବା ଆଗରୁ ବାଟରେ ମାଉସୀ ମା’ମନ୍ଦିର ନିକଟରେ ଅଟକିବ ତିନି ଠାକୁରଙ୍କ ରଥ। ସେଠାରେ ମାଉସୀ ମା’ଙ୍କ ଠାରୁ ସୁସ୍ବାଦୁ ପୋଡ଼ ପିଠା ଖାଇବେ ତିନି ଠାକୁର। ଏଥିପାଇଁ ଆରମ୍ଭ ହେଲାଣି ସବୁ ପ୍ରସ୍ତୁତି। ମହମହ ମହକିଲାଣି ବଡ଼ ଦାଣ୍ଡ।
ବାହୁଡ଼ା ଯାତ୍ରା ସମୟରେ ମହାପ୍ରଭୁଙ୍କ ରଥ ମାଉସୀ ମା’ ମନ୍ଦିର ନିକଟରେ ଅଟକିବ। ପୁରାତନ ପରମ୍ପରା ଅନୁଯାୟୀ ସେଠାରେ ତିନି ଠାକୁର ମାଉସୀ ମା’ଙ୍କ ହାତର ପ୍ରସିଦ୍ଧ ପୋଡ଼ପିଠା ଭୋଗ ଗ୍ରହଣ କରିବେ। ବର୍ଷ ବର୍ଷ ଧରି ଚାଲିଆସୁଥିବା ଏହି ନୀତି ଶ୍ରୀଜଗନ୍ନାଥ ସଂସ୍କୃତିର ଏକ ସ୍ୱତନ୍ତ୍ର ଆକର୍ଷଣ।
ଏହି ଅବସର ପାଇଁ ମାଉସୀ ମା’ ମନ୍ଦିରରେ ଜୋରସୋରରେ ପୋଡ଼ପିଠା ପ୍ରସ୍ତୁତି ଚାଲିଛି। ମନ୍ଦିରର ପୂଜକ ଓ ସେବକମାନେ ଭକ୍ତିଭାବରେ ମହାପ୍ରଭୁଙ୍କ ପାଇଁ ଏହି ବିଶେଷ ଭୋଗ ପ୍ରସ୍ତୁତ କରୁଛନ୍ତି । ପୋଡ଼ପିଠା ଲାଗି ହେବାପରେ ଏହା ମହାପ୍ରସାଦର ମର୍ଯ୍ୟାଦା ପାଇବ।
ପୋଡ଼ପିଠା ପ୍ରସ୍ତୁତିର ପଦ୍ଧତି ମଧ୍ୟ ବେଶ୍ ନିଆରା। ଅଟା, ଛେନା, ଚିନି, ପିସ୍ତା ବାଦାମ, ଗୁଜୁରାତି ଗୁଣ୍ଡ, ଲବଙ୍ଗ ଓ ଶୁଦ୍ଧ ଦେଶୀ ଘିଅ ମିଶାଇ ଏକ ସ୍ୱତନ୍ତ୍ର ମିଶ୍ରଣ ତିଆରି କରାଯାଏ। ପରେ ଏହାକୁ ପିଠା ଆକାର ଦେଇ ଦୀର୍ଘ ସମୟ ଧରି ବାମ୍ଫରେ ସିଝାଯାଏ। ଥଣ୍ଡା ହେବା ପରେ ଏହାକୁ ଖଣ୍ଡ ଖଣ୍ଡ କରି ଶୁଦ୍ଧ ଘିଅରେ ପ୍ରସ୍ତୁତ କରାଯାଏ।
ବିଶେଷ କଥା ହେଲା, ନାମ ପୋଡ଼ପିଠା ହେଲେ ମଧ୍ୟ ଏହାକୁ ସାଧାରଣ ଅର୍ଥରେ ପୋଡ଼ାଯାଏ ନାହିଁ। ପାରମ୍ପରିକ ପଦ୍ଧତିରେ ବାମ୍ଫରେ ସିଝାଇ ଓ ଘିଅରେ ପ୍ରସ୍ତୁତ କରାଯାଇ ମହାପ୍ରଭୁଙ୍କ ଭୋଗ ପାଇଁ ସମର୍ପଣ କରାଯାଏ।
ଏବେ ମହାପ୍ରଭୁଙ୍କ ବାହୁଡ଼ା ଯାତ୍ରାକୁ ଅପେକ୍ଷା କରିଛି ସାରା ଶ୍ରୀକ୍ଷେତ୍ର। ଭକ୍ତମାନଙ୍କ ଆଖି ରହିଛି ସେହି ପବିତ୍ର ମୁହୂର୍ତ୍ତ ଉପରେ, ଯେତେବେଳେ ମାଉସୀ ମା’ଙ୍କ ସ୍ନେହଭରା ପୋଡ଼ପିଠା ଭୋଗ ଗ୍ରହଣ କରି ମହାପ୍ରଭୁ ଶ୍ରୀମନ୍ଦିର ଅଭିମୁଖେ ଯାତ୍ରା ଆରମ୍ଭ କରିବେ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |