ଭୁବନେଶ୍ୱର: ବିଶ୍ୱ ହାତୀ ଦିବସ ଅବସରରେ ରାଜ୍ୟରେ ହାତୀ ସଂରକ୍ଷଣ ଓ ମାନବ-ହାତୀ ସହାବସ୍ଥାନକୁ ଅଧିକ ସୁଦୃଢ଼ କରିବା ନେଇ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ଜନସାଧାରଣଙ୍କୁ ସଚେତନ ଓ ସକ୍ରିୟ ହେବାକୁ ଆହ୍ୱାନ ଜଣାଇଛନ୍ତି। ସୋସିଆଲ ମିଡିଆରେ ଦେଇଥିବା ଏକ ସନ୍ଦେଶରେ ସେ କହିଛନ୍ତି ଯେ, ହାତୀ କେବଳ ଏକ ବନ୍ୟପ୍ରାଣୀ ନୁହେଁ, ବରଂ ଓଡ଼ିଶାର ପ୍ରକୃତି, ପରମ୍ପରା ଓ ସଂସ୍କୃତିର ଅବିଚ୍ଛିନ୍ନ ଅଂଶ।
ମୁଖ୍ୟମନ୍ତ୍ରୀ ଉଲ୍ଲେଖ କରିଛନ୍ତି ଯେ, ରାଜ୍ୟର ଧାର୍ମିକ ଓ ସାଂସ୍କୃତିକ ଐତିହ୍ୟରେ ହାତୀର ସ୍ଥାନ ସ୍ୱତନ୍ତ୍ର। ଶ୍ରୀଜଗନ୍ନାଥଙ୍କ ହାତୀ ବେଶ, ପ୍ରାଚୀନ ମନ୍ଦିର ଗୁଡ଼ିକର ଶିଳ୍ପକଳା ଏବଂ ଇତିହାସର ବିଭିନ୍ନ ଅଧ୍ୟାୟରେ ଗଜରାଜର ଉପସ୍ଥିତି ଓଡ଼ିଶାର ସମୃଦ୍ଧ ପରମ୍ପରାକୁ ପ୍ରତିଫଳିତ କରିଥାଏ। ତେଣୁ ଏହି ଅମୂଲ୍ୟ ପ୍ରାକୃତିକ ସମ୍ପଦର ସୁରକ୍ଷା ଦିଗରେ ସମସ୍ତଙ୍କ ମିଳିତ ପ୍ରୟାସ ଆବଶ୍ୟକ ବୋଲି ସେ କହିଛନ୍ତି।
ସେ ଆହୁରି କହିଛନ୍ତି ଯେ, ହାତୀମାନଙ୍କ ପ୍ରାକୃତିକ ବାସସ୍ଥାନର ସୁରକ୍ଷା, ବନାଞ୍ଚଳର ସଂରକ୍ଷଣ ଓ ମଣିଷ-ହାତୀ ମଧ୍ୟରେ ସଂଘର୍ଷ କମାଇବା ଆଜିର ସମୟର ଏକ ବଡ଼ ଆବଶ୍ୟକତା। ପ୍ରକୃତିର ସନ୍ତୁଳନ ରକ୍ଷା ପାଇଁ ହାତୀମାନଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସେ ମତ ପ୍ରକାଶ କରିଛନ୍ତି।
ପ୍ରତିବର୍ଷ ଅଗଷ୍ଟ ୧୨ ତାରିଖରେ ବିଶ୍ୱ ହାତୀ ଦିବସ ପାଳନ କରାଯାଇଥାଏ। ହାତୀମାନେ ବାସସ୍ଥାନ ହ୍ରାସ, ବନ ନଷ୍ଟ, ମଣିଷ-ବନ୍ୟପ୍ରାଣୀ ସଂଘର୍ଷ ଓ ଅନ୍ୟାନ୍ୟ ବିପଦର ସମ୍ମୁଖୀନ ହେଉଥିବାରୁ ସେମାନଙ୍କ ସୁରକ୍ଷା ପ୍ରତି ଜନସାଧାରଣଙ୍କ ମଧ୍ୟରେ ସଚେତନତା ବଢ଼ାଇବା ଏହି ଦିବସର ମୂଳ ଉଦ୍ଦେଶ୍ୟ। ବିଶେଷଜ୍ଞମାନଙ୍କ ମତରେ, ବନ୍ୟଜନ୍ତୁ ଓ ମଣିଷ ମଧ୍ୟରେ ସମନ୍ୱୟ ରକ୍ଷା କରିବା ସହ ପ୍ରାକୃତିକ ବାସସ୍ଥଳୀକୁ ସୁରକ୍ଷିତ ରଖିଲେ ହିଁ ହାତୀମାନଙ୍କ ଭବିଷ୍ୟତ ସୁନିଶ୍ଚିତ ହୋଇପାରିବ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |