ପ୍ରତିବର୍ଷ ସ୍ୱାଧୀନତା ଦିବସ ଅବସରରେ ରାଷ୍ଟ୍ରପତି ଭବନରେ ଆୟୋଜିତ ହେଉଥିବା ‘ଆଟ୍ ହୋମ୍’ ରିସେପସନ୍ ଦେଶର ଏକ ଗୌରବମୟ ପରମ୍ପରା। ଚଳିତବର୍ଷ ଏହି ବିଶେଷ ଅବସର ପାଇଁ ପ୍ରସ୍ତୁତ ନିମନ୍ତ୍ରଣ କିଟ୍ ନିଜର ଅନନ୍ୟ କଳାତ୍ମକତା ଓ ସାଂସ୍କୃତିକ ବୈଭବ ଯୋଗୁଁ ଚର୍ଚ୍ଚାରେ ରହିଛି।
ପ୍ରାୟ ୧୩୦ ଜଣ କାରିଗରଙ୍କ ତିନି ମାସର ନିଷ୍ଠାପୂର୍ଣ୍ଣ ପରିଶ୍ରମରେ ଏହି ନିମନ୍ତ୍ରଣ କିଟ୍ ପ୍ରସ୍ତୁତ ହୋଇଛି। ଏଥିରେ ଛତିଶଗଡ଼, ଗୋଆ, ମହାରାଷ୍ଟ୍ର ଓ ମଧ୍ୟପ୍ରଦେଶର ଲୋକକଳା, ହସ୍ତଶିଳ୍ପ ଓ ସାଂସ୍କୃତିକ ପରମ୍ପରାକୁ ସୁନ୍ଦର ଭାବେ ସ୍ଥାନ ଦିଆଯାଇଛି। ରାଷ୍ଟ୍ରପତି ଭବନର ଅଧିକାରୀମାନଙ୍କ ସହ ଅହମ୍ମଦାବାଦସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ ଅଫ ଡିଜାଇନ (ଏନ୍ଆଇଡି)ର ବିଶେଷଜ୍ଞ ଦଳ ଏହାର ରୂପରେଖା ପ୍ରସ୍ତୁତ କରିଥିଲେ।
ଏହି ପ୍ରକଳ୍ପରେ ଛତିଶଗଡ଼ର ବସ୍ତର ଅଞ୍ଚଳର ପ୍ରାୟ ୫୦ ଜଣ କାରିଗର ଅଂଶଗ୍ରହଣ କରିଥିଲେ। ଏହି ଅଞ୍ଚଳ ଏକ ସମୟରେ ବାମପନ୍ଥୀ ଉଗ୍ରବାଦ ପ୍ରଭାବିତ ଥିବାବେଳେ, ଏବେ ସେଠାର କାରିଗରମାନେ ନିଜ କଳା ଦ୍ୱାରା ଜାତୀୟ ସ୍ତରରେ ପରିଚୟ ସୃଷ୍ଟି କରୁଛନ୍ତି।
ନିମନ୍ତ୍ରଣ କିଟରେ ଛତିଶଗଡ଼ର ପ୍ରସିଦ୍ଧ ଢୋକରା ଧାତୁ ଶିଳ୍ପ ଓ ପିଟୱା କଳାକୁ ସ୍ଥାନ ମିଳିଛି। ଢୋକରା ଶିଳ୍ପ ଭାରତର ପ୍ରାଚୀନତମ ଧାତୁ ଢଳେଇ କଳା ମଧ୍ୟରୁ ଗୋଟିଏ ହୋଇଥିବାବେଳେ, ପିଟୱା କଳା ଲୋହାର ସୂକ୍ଷ୍ମ କାରୁକାର୍ଯ୍ୟ ପାଇଁ ପରିଚିତ।
ଗୋଆର ପାରମ୍ପରିକ ଆଜୁଲେଜୋ ଟାଇଲ ଚିତ୍ରକଳା ମାଧ୍ୟମରେ ‘ଖାଜାନ’ ଭୂମିର ଚିତ୍ର ଅଙ୍କିତ ହୋଇଛି। ଏହି ଉପକୂଳବର୍ତ୍ତୀ ଆର୍ଦ୍ରଭୂମି ସ୍ଥାନୀୟ ଜୀବିକା, ଧାନଚାଷ, ମତ୍ସ୍ୟଚାଷ ଓ ଲୁଣ ଉତ୍ପାଦନର ଏକ ମୁଖ୍ୟ ଆଧାର ଭାବେ ପରିଚିତ।
ସେହିପରି ମହାରାଷ୍ଟ୍ରର ପ୍ରସିଦ୍ଧ ୱର୍ଲି ଚିତ୍ରକଳା ମାଧ୍ୟମରେ ଛତ୍ରପତି ସମ୍ଭାଜୀନଗରର ଖାମ ନଦୀ ପୁନରୁଦ୍ଧାରର କାହାଣୀକୁ ଉପସ୍ଥାପିତ କରାଯାଇଛି। ମଧ୍ୟପ୍ରଦେଶର ଭୀଲ୍ ଚିତ୍ରକଳାରେ ପାରମ୍ପରିକ ବିହନ ସଂରକ୍ଷଣ ପ୍ରଥାକୁ ଦର୍ଶାଯାଇଛି। ବିନ୍ଦୁ ଓ ଜଟିଳ ଆକୃତିର ବ୍ୟବହାର ଦ୍ୱାରା ପ୍ରକୃତି, ଲୋକକଥା ଓ ଦୈନନ୍ଦିନ ଜୀବନକୁ ଭୀଲ କଳାରେ ଜୀବନ୍ତ କରାଯାଇଥାଏ।
ଏଥିସହ ଅତିଥିମାନଙ୍କ ସ୍ୱାଗତ ପାଇଁ ବିଶେଷ ଭାବେ ପ୍ରସ୍ତୁତ ମାହେଶ୍ୱରୀ ଷ୍ଟୋଲ୍ ବ୍ୟବହାର କରାଯିବ। ଏହି ଷ୍ଟୋଲ୍ରେ ଚାରିଟି ରାଜ୍ୟର ପାରମ୍ପରିକ ପୋଷାକ ଓ ବୁଣାକଳାର ବୈଶିଷ୍ଟ୍ୟକୁ ନୂତନ ଡିଜାଇନ ମାଧ୍ୟମରେ ଉପସ୍ଥାପନ କରାଯାଇଛି।
ଚଳିତବର୍ଷର ‘ଆଟ୍ ହୋମ୍’ କାର୍ଯ୍ୟକ୍ରମ ଅଗଷ୍ଟ ୧୫ ତାରିଖ ସନ୍ଧ୍ୟା ୬ଟାରେ ରାଷ୍ଟ୍ରପତି ଭବନରେ ଆୟୋଜିତ ହେବ। ଏହି ଅବସରରେ ଭାରତର ବିବିଧ କଳା, ସଂସ୍କୃତି ଓ ହସ୍ତଶିଳ୍ପର ଏକ ଅନନ୍ୟ ଝଲକ ଦେଖିବାକୁ ମିଳିବ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |