ଅରୁଣାଚଳପ୍ରଦେଶରେ ଲଗାତାର ମୌସୁମୀ ବର୍ଷା ଯୋଗୁଁ ପରିସ୍ଥିତି ଗମ୍ଭୀର ରୂପ ନେଇଛି। ବିଶେଷକରି କେୟି ପନ୍ନୋର ଜିଲ୍ଲାରେ ହଠାତ୍ ଜଳସ୍ତର ବୃଦ୍ଧି ପାଇବାରୁ ଅନେକ ଅଞ୍ଚଳ ପାଣି ଘେରରେ ରହିଛି। ଅବିରତ ବର୍ଷାର ପ୍ରଭାବରେ ପାହାଡ଼ିଆ ଅଞ୍ଚଳଗୁଡ଼ିକରେ ମାଟି ଧସିବା ସହ ଅନେକ ସଡ଼କ ଓ ସରକାରୀ ସମ୍ପତ୍ତି କ୍ଷତିଗ୍ରସ୍ତ ହୋଇଛି।
ତଳିଆ ଅଞ୍ଚଳରେ ଥିବା ପ୍ରାୟ ୧୮ଟି ବାସଗୃହରେ ପାଣି ପଶିଯାଇଥିବା ବେଳେ ଅନେକ ପରିବାର ସମସ୍ୟାର ସମ୍ମୁଖୀନ ହୋଇଛନ୍ତି। ଜାତୀୟ ରାଜପଥର ବିଭିନ୍ନ ସ୍ଥାନରେ ମାଟି ଧସିବା ଫଳରେ ଯାତାୟାତ ବ୍ୟବସ୍ଥା ବାଧାପ୍ରାପ୍ତ ହୋଇଛି ଏବଂ ଅନେକ ଯାତ୍ରୀ ମଝି ରାସ୍ତାରେ ଅଟକି ରହିଛନ୍ତି।
ପୁସା ନିକଟ ୟଜାଲି ସର୍କଲ ଅନ୍ତର୍ଗତ ନିପ୍କୋ ପ୍ରୋଜେକ୍ଟ କଲୋନୀରେ ଆକସ୍ମିକ ବନ୍ୟା ଯୋଗୁଁ ୩ ଜଣଙ୍କର କୌଣସି ସନ୍ଧାନ ମିଳିନାହିଁ । ଏକ ନିର୍ମାଣାଧୀନ ପ୍ରତିରକ୍ଷା ପ୍ରାଚୀର ଭାଙ୍ଗିଯିବାରୁ ବହୁ ପରିମାଣର ଜଳ ଆବାସିକ ଅଞ୍ଚଳକୁ ପ୍ରବେଶ କରିଥିବା କୁହାଯାଇଛି।
ଏପଟେ ପୋଟିନ୍ ଓ ହୋଜ୍ ଅଞ୍ଚଳ ନିକଟରେ ରାଜପଥର ତିନୋଟି ସ୍ଥାନ ଅବରୋଧ ହୋଇଥିବାରୁ ଯାନ ଚଳାଚଳ ସମ୍ପୂର୍ଣ୍ଣ ଠପ୍ ହୋଇପଡ଼ିଛି। ପ୍ରଶାସନ ପକ୍ଷରୁ ଉଦ୍ଧାରକାରୀ ଦଳ ଏବଂ ଆବଶ୍ୟକ ଯନ୍ତ୍ରପାତି ମୁତୟନ କରାଯାଇଥିବା ବେଳେ ଯଥାଶୀଘ୍ର ରାସ୍ତା ସଫା କରି ସଂଯୋଗ ପୁନରୁଦ୍ଧାର ପାଇଁ ନିର୍ଦ୍ଦେଶ ଜାରି କରାଯାଇଛି।
ବର୍ତ୍ତମାନ ପ୍ରଭାବିତ ଅଞ୍ଚଳଗୁଡ଼ିକରେ ନିଖୋଜ ବ୍ୟକ୍ତିଙ୍କ ଖୋଜାଖୋଜି ସହ କ୍ଷୟକ୍ଷତିର ଆକଳନ କାର୍ଯ୍ୟ ଚାଲିଥିବା ବେଳେ ପ୍ରଶାସନ ପରିସ୍ଥିତି ଉପରେ ନଜର ରଖିଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |