ନୂଆଦିଲ୍ଲୀ / ଭୁବନେଶ୍ୱର : ପଶ୍ଚିମ ଏସିଆରେ ବଢୁଥିବା ଯୁଦ୍ଧ ପରିସ୍ଥିତିର ପ୍ରଭାବ ବିଶ୍ୱ ତୈଳ ବଜାର ଉପରେ ପଡ଼ୁଛି । ଏହାର ପରିଣାମରେ ଭାରତକୁ ହେଉଥିବା ତୈଳ ଓ ଗ୍ୟାସ ଆମଦାନୀରେ ବାଧା ସୃଷ୍ଟି ହେବା ଆଶଙ୍କା ବଢ଼ିଛି । ଏହି ପରିସ୍ଥିତିକୁ ଦୃଷ୍ଟିରେ ରଖି ଦେଶରେ ରୋଷେଇ ଗ୍ୟାସ ସେବା ନିରବିଘ୍ନ ରଖିବା ପାଇଁ କେନ୍ଦ୍ରସରକାର ଅତ୍ୟାବଶ୍ୟକୀୟ ସେବା ରକ୍ଷଣାବେକ୍ଷଣ ଆଇନ (ESMA) ପ୍ରୟୋଗ କରିଛନ୍ତି ।
ସୂଚନା ଅନୁସାରେ , ଘରୋଇ LPG ସିଲିଣ୍ଡର ଯୋଗାଣ ଏପର୍ଯ୍ୟନ୍ତ ସାଧାରଣ ରହିଥିବା ବେଳେ କେତେକ ସ୍ଥାନରେ ବାଣିଜ୍ୟିକ ସିଲିଣ୍ଡର ଅଭାବ ଦେଖାଯାଇଛି । ସରକାର ତୈଳ ରିଫାଇନାରୀ ଓ ପେଟ୍ରୋଲିୟମ ସଂସ୍ଥାମାନଙ୍କୁ LPG ଉତ୍ପାଦନ ବଢ଼ାଇବା ସହ ଅନ୍ୟାନ୍ୟ ହାଇଡ୍ରୋକାର୍ବନ ଉତ୍ସରୁ ଆବଶ୍ୟକ ଗ୍ୟାସ ପୁଲ ବଦଳ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାଦ୍ୱାରା ଦେଶରେ ଘର ମାନଙ୍କରେ ରୋଷେଇ ଓ ହୋଟେଲ-ରେଷ୍ଟୁରାଣ୍ଟ ସହ ଅନ୍ୟାନ୍ୟ ଆବଶ୍ୟକ ସେବାରେ କୌଣସି ବାଧା ନଆସିବାକୁ ଚେଷ୍ଟା କରାଯାଉଛି।
ଜାଣନ୍ତୁ କ’ଣ ଏହି ESMA ?
ଅତ୍ୟାବଶ୍ୟକୀୟ ସେବା ରକ୍ଷଣାବେକ୍ଷଣ ଆଇନକୁ ESMA ବୋଲି କୁହାଯାଏ। ଏହି ଆଇନ ମାଧ୍ୟମରେ ସରକାର ଜନଜୀବନ ସହ ସମ୍ପୃକ୍ତ ଆବଶ୍ୟକ ସେବା ଗୁଡ଼ିକ ନିରବିଘ୍ନ ଚାଲିଥିବାକୁ ସୁନିଶ୍ଚିତ କରନ୍ତି । ସାର୍ବଜନୀନ ପରିବହନ, ସ୍ୱାସ୍ଥ୍ୟ ସେବା, ତୈଳ-ଗ୍ୟାସ ଯୋଗାଣ ଭଳି ସେବା ଗୁଡ଼ିକ ଏହାର ଅଧୀନରେ ଆସିଥାଏ।
ତଥ୍ୟ ଅନୁସାରେ, ୨୦୨୪-୨୫ ଆର୍ଥିକ ବର୍ଷରେ ଭାରତରେ ପ୍ରାୟ ୪.୧୩ କୋଟି ଟନ LPG ବ୍ୟବହାର ହୋଇଥିଲା। ଏଥିରୁ କେବଳ ୧.୨୮ କୋଟି ଟନ ଦେଶୀୟ ଭାବେ ଉତ୍ପାଦନ ହୋଇଥିବା ବେଳେ ଅନ୍ୟାନ୍ୟ ଅଂଶ ବିଦେଶରୁ ଆମଦାନୀ କରାଯାଇଥାଏ ।
ଭାରତର ଗ୍ୟାସ ଆମଦାନୀର ବଡ଼ ଅଂଶ ପଶ୍ଚିମ ଏସିଆରୁ, ବିଶେଷକରି ସାଉଦି ଆରବ ଭଳି ଦେଶରୁ ଆସେ। ଏହି ଯୋଗାଣ ପାଇଁ ହର୍ମୁଜ ସମୁଦ୍ର ସଙ୍କୁଳ ଉପରେ ନିର୍ଭର କରିବାକୁ ପଡ଼େ। କିନ୍ତୁ ଅଞ୍ଚଳରେ ଚାଲୁଥିବା ସଂଘର୍ଷ ଯୋଗୁଁ ସମୁଦ୍ର ମାର୍ଗରେ ଜାହାଜ ଚଳାଚଳ ପ୍ରଭାବିତ ହେବା ଆଶଙ୍କା ଦେଖାଦେଇଛି ।
ଏହି ପରିସ୍ଥିତିରେ ଦେଶରେ ପର୍ଯ୍ୟାପ୍ତ ରିଫାଇନିଂ କ୍ଷମତାକୁ ଲାଭକାରୀ କରି LPG ଉତ୍ପାଦନ ବଢ଼ାଇବାକୁ ସରକାର ପଦକ୍ଷେପ ନେଇଥିବା ସୂଚନା ମିଳିଛି । ଯାହାଦ୍ୱାରା ସମ୍ଭାବ୍ୟ ଗ୍ୟାସ ସଙ୍କଟକୁ ଦୂର କରିବାକୁ ଚେଷ୍ଟା କରାଯାଉଛି ।
ତେବେ ଏଇ ସବୁ ଭିତରେ ରାଜଧାନୀ ଭୁବନେଶ୍ୱରରେ ଗ୍ୟାସ ସଙ୍କଟ ଦେଖା ଦେଇଛି । ଖଣ୍ଡଗିରି ଅଞ୍ଚଳର ଲିଙ୍ଗରାଜ HP ଗ୍ୟାସ ଏଜେନ୍ସି ସାମ୍ନାରେ ଗ୍ୟାସ ସିଲିଣ୍ଡର ପାଇଁ ଗ୍ରାହକମାନଙ୍କ ଲମ୍ବା ଲାଇନ ଲାଗିଥିବା ଦେଖାଯାଇଛି । ଅନେକ ଗ୍ରାହକଙ୍କ କହିବା ଅନୁସାରେ, ସେମାନେ ୨୦ରୁ ୨୫ ଦିନ ପୂର୍ବରୁ ଗ୍ୟାସ ବୁକିଂ କରିଥିଲେ ମଧ୍ୟ ଏପର୍ଯ୍ୟନ୍ତ ସିଲିଣ୍ଡର ହୋମ୍ ଡେଲିଭରୀ ପାଇନାହାଁନ୍ତି ।
ଗ୍ୟାସ ଅଭାବରେ ଅନେକ ପରିବାର ଘରେ ରୋଷେଇ କରିବାରେ ଅସୁବିଧା ଭୋଗୁଛନ୍ତି। କେତେକ ଲୋକ ବିକଳ୍ପ ଭାବେ କାଠ ଚୁଲି ବ୍ୟବହାର କରି ଖାଦ୍ୟ ପକାଉଥିବା ବେଳେ ଅନ୍ୟମାନେ ବ୍ଲାକ ମାର୍କେଟରୁ ଅଧିକ ଦାମରେ ଗ୍ୟାସ କିଣିବାକୁ ବାଧ୍ୟ ହେଉଛନ୍ତି। ସୂଚନା ଅନୁସାରେ, କେତେକ ସ୍ଥାନରେ ଖୁଚୁରା ଗ୍ୟାସ ପ୍ରତି ଲିଟର ପାଇଁ ପ୍ରାୟ ୧୧୦ ଟଙ୍କା ଦେଇ କିଣିବାକୁ ପଡ଼ୁଛି।
ଏହାସହ କିଛି ଗ୍ରାହକଙ୍କୁ ଏଜେନ୍ସି ପକ୍ଷରୁ ଗୋଦାମକୁ ଯାଇ ସିଲିଣ୍ଡର ନେବାକୁ କୁହାଯାଉଥିବା ବେଳେ ଅନ୍ୟମାନଙ୍କୁ ସକାଳ ସକାଳେ ଲମ୍ବା ଲାଇନରେ ଠିଆ ହେବାକୁ ପଡ଼ୁଛି। ଏହାକୁ ନେଇ ଗ୍ରାହକମାନେ ଅସନ୍ତୋଷ ପ୍ରକାଶ କରିଛନ୍ତି।
ଏହି ସମୟରେ ରୋଷେଇ ଗ୍ୟାସ ମୂଲ୍ୟ ବୃଦ୍ଧି ମଧ୍ୟ ଗ୍ରାହକଙ୍କ ଉପରେ ଅଧିକ ଭାର ପକାଇଛି । ସମ୍ପ୍ରତି ୧୪.୨ କିଲୋଗ୍ରାମ ଘରୋଇ LPG ସିଲିଣ୍ଡର ଦାମ ସାରା ଦେଶରେ ପ୍ରାୟ ୬୦ ଟଙ୍କା ବଢ଼ିଥିବା ବେଳେ ୧୯ କିଲୋଗ୍ରାମ ବାଣିଜ୍ୟିକ ସିଲିଣ୍ଡର ମୂଲ୍ୟ ମଧ୍ୟ ପ୍ରାୟ ୧୧୫ ଟଙ୍କା ବୃଦ୍ଧି ପାଇଛି।
ମଧ୍ୟପ୍ରାଚ୍ୟରେ ଚାଲୁଥିବା ସଂଘର୍ଷ ଓ ଆନ୍ତର୍ଜାତୀୟ ବଜାରର ପରିସ୍ଥିତି ଦୃଷ୍ଟିରେ ଦେଶରେ LPG ଯୋଗାଣ ନେଇ ଚିନ୍ତା ବଢ଼ିଛି । ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ତୈଳ କମ୍ପାନୀଗୁଡ଼ିକୁ ଉତ୍ପାଦନ ବଢ଼ାଇବା ସହ ଯୋଗାଣ ବ୍ୟବସ୍ଥା ସୁଦୃଢ଼ କରିବାକୁ ନିର୍ଦ୍ଦେଶ ଦେଇଥିବା ସୂଚନା ମିଳିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |