ନୂଆଦିଲ୍ଲୀ : ଦେଶରେ ଚାଲୁଥିବା ଏଲପିଜି ସଙ୍କଟକୁ ଦୃଷ୍ଟିରେ ରଖି କେନ୍ଦ୍ର ସରକାର ରାଜ୍ୟଗୁଡ଼ିକୁ ଗ୍ୟାସ ଯୋଗାଣ ବଢ଼ାଇବା ପାଇଁ ନୂଆ ନିର୍ଦ୍ଦେଶ ଜାରି କରିଛନ୍ତି । ବାଣିଜ୍ୟିକ ଏଲପିଜି ସିଲିଣ୍ଡର ଆବଣ୍ଟନକୁ ପୂର୍ବରୁ ୫୦% ଥିବା ସ୍ଥିତିରୁ ବଢ଼ାଇ ୭୦% କରାଯାଇଛି। ଏହା ଦ୍ୱାରା ଏଲପିଜି ଉପରେ ନିର୍ଭରଶୀଳ ବିଭିନ୍ନ ଶିଳ୍ପକୁ ଆଶ୍ବସ୍ତି ମିଳିବ ବୋଲି ଆଶା କରାଯାଉଛି।
ବିଶେଷ କରି ଇସ୍ପାତ, ଅଟୋମୋବାଇଲ, ବୟନ, କେମିକାଲ ଓ ପ୍ଲାଷ୍ଟିକ ଭଳି ଶ୍ରମନିର୍ଭର କ୍ଷେତ୍ର ଗୁଡ଼ିକୁ ପ୍ରାଥମିକତା ଦେବାକୁ ସରକାର ସ୍ପଷ୍ଟ କରିଛନ୍ତି । ଏହି ସମସ୍ତ ଶିଳ୍ପ ଏଲପିଜି ଯୋଗାଣ ଉପରେ ଭରସା କରୁଥିବାରୁ କୋଟା ବୃଦ୍ଧି ତାଙ୍କ ପାଇଁ ଲାଭଦାୟକ ହେବ।
ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରାଳୟର ସଚିବ ଡ଼ଃ ନୀରଜ ମିତ୍ତଲ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଙ୍କ ମୁଖ୍ୟ ସଚିବମାନଙ୍କୁ ଚିଠି ଲେଖି ଏହି ନିଷ୍ପତ୍ତି ବିଷୟରେ ଜଣାଇଛନ୍ତି । ଏହାସହ ବାଣିଜ୍ୟିକ ଓ ଶିଳ୍ପ ଉପଯୋଗ ପାଇଁ ଗ୍ୟାସ ଯୋଗାଣ ବୃଦ୍ଧି କରିବାକୁ ଦିଗନିର୍ଦ୍ଦେଶ ଦିଆଯାଇଛି।
ତଥାପି, ବୃଦ୍ଧିତ କୋଟାର ସୁବିଧା ଉଠାଇବା ପାଇଁ କିଛି ନିୟମ ମଧ୍ୟ ରଖାଯାଇଛି। କମର୍ସିଆଲ୍ ଓ ଇଣ୍ଡଷ୍ଟ୍ରିଆଲ୍ ଗ୍ରାହକ ମାନେ ତେଲ କମ୍ପାନି ସହିତ ନିବନ୍ଧନ କରିବାକୁ ପଡ଼ିବ। ସେହିପରି ସହର ଭିତ୍ତିକ ଗ୍ୟାସ ବିତରଣ କମ୍ପାନିଙ୍କ ପାଖରେ ପିଏନଜି (PNG) ସଂଯୋଗ ପାଇଁ ଆବେଦନ କରିବା ଆବଶ୍ୟକ ହେବ। ଶିଳ୍ପକୁ ଧୀରେ ଧୀରେ ଏଲପିଜିରୁ ପିଏନଜି ଦିଗକୁ ଆଣିବା ଉଦ୍ଦେଶ୍ୟ ନେଇ ସରକାର ଏହି ପଦକ୍ଷେପ ନେଇଛନ୍ତି।
ଅନ୍ୟପଟେ, ଯେଉଁ ଶିଳ୍ପଗୁଡ଼ିକ ପିଏନଜି ଦ୍ୱାରା ତାଙ୍କର ଆବଶ୍ୟକତା ପୂରଣ କରି ପାରୁନାହଁନ୍ତି ସେମାନଙ୍କୁ ବିଶେଷ ସୁବିଧା ଦିଆଯାଇଛି । ସେମାନେ ସରଳ ପ୍ରକ୍ରିୟାରେ ବୃଦ୍ଧିତ ଏଲପିଜି କୋଟା ଉପଭୋଗ କରିପାରିବେ।
ସରକାରୀ ତଥ୍ୟ ଅନୁଯାୟୀ, ଦେଶରେ ମୋଟ ଏଲପିଜି ଚାହିଦା ପ୍ରାୟ ୩୩ ମିଲିୟନ ଟନ ଅଟେ ଓ ଏହାର ଗ୍ରାହକ ସଂଖ୍ୟା ୩୩ କୋଟିରୁ ଅଧିକ। ଏହି ଚାହିଦାର ବଡ଼ ଅଂଶ ଆମଦାନି ଉପରେ ନିର୍ଭର କରୁଛି, ଯାହାର ମୁଖ୍ୟ ଅଂଶ ମଧ୍ୟପ୍ରାଚ୍ୟରୁ ଆସୁଛି।
କେନ୍ଦ୍ର ସରକାର ରାଜ୍ୟଗୁଡ଼ିକୁ ଆହ୍ୱାନ କରିଛନ୍ତି ଯେ, ରିଫର୍ମ ଭିତ୍ତିକ ଆବଣ୍ଟନର ସୁବିଧାକୁ ଶୀଘ୍ର ଲାଗୁ କରାଯାଉ। ଏପର୍ଯ୍ୟନ୍ତ ୨୭ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଅଣଘରୋଇ ଏଲ୍ପିଜି ବିତରଣ ପାଇଁ ନିଷ୍ପତ୍ତି ନେଇସାରିଛନ୍ତି । ଯେଉଁଠି ଏହା ଲାଗୁ ହୋଇନାହିଁ, ସେଠାରେ ତୈଳ ବିପଣନ କମ୍ପାନିମାନେ ସିଧାସଳଖ ସିଲିଣ୍ଡର ଯୋଗାଣ କରିପାରିବେ ।
ଏହାପୂର୍ବରୁ, ମାର୍ଚ୍ଚ ୨୧ରେ ସରକାର ୨୦% ଅତିରିକ୍ତ ଏଲପିଜି ଯୋଗାଣକୁ ଅନୁମୋଦନ ଦେଇଥିଲେ, ଯାହା ଏବେ ବୃଦ୍ଧି ପାଇ ଆଉ ବଡ଼ ପରିମାଣରେ ଲାଗୁ ହେଉଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |