ଭୁବନେଶ୍ୱର: ମାସ ସାରା ଆମିଷ ନଖାଇ କାର୍ତ୍ତିକ ବ୍ରତ ପାଳନ୍ତି ଲୋକେ । କେହି କେହି ମାସକ ପାଳି ନପାରିଲେ ପଞ୍ଚୁକ ୫ ଦିନ ଆମିଷ ଛାଡି ନିରାମିଷ ଖାଇଥାନ୍ତି। ଏ ମାସରେ ଦାନ ଧର୍ମ କରି ବର୍ଷକର ପୁର୍ଣ୍ୟ ଅର୍ଜନ କରାଯାଏ ବୋଲି କୁହାଯାଏ । ଆଜି ଛାଡ଼ ଖାଇ ସତ୍ତ୍ବେ ମାଣବସା ଗୁରୁବର ହୋଇଥିବାରୁ ଫିକା ପଡ଼ିଯାଇଛି ଆମିଷ ବଜାର। ତେବେ ଆସନ୍ତାକାଲି ଶୁକ୍ରବାର ଥିବାରୁ ଅସଲି ଛାଡ଼ଖାଇ ପାଳିବେ ଓଡ଼ିଆ । ଏହି କ୍ରମରେ ଆମିଷ ବଜାରରେ ଲାଗିଛି ଆମିଷ ଦରରେ ନିଆଁ। ଭାକୁର ମାଛ କେଜି ୨୨୦ ଟଙ୍କା ରହିଛି । ନଦୀ ଭାକୁର କେଜି ୩ ଶହ ଟଙ୍କା, ପାମ୍ପଲେଟ୍ ଓ ଇଲିସି ହଜାର ଟଙ୍କା ରହିଛି । ସେହିପରି ବଡ଼ ଇଲିସି ୧୬ ଶହ ଟଙ୍କା ଥିବା ବେଳେ ଚିଙ୍ଗୁଡ଼ି ୬ ଶହ ଓ ନଦୀ ମାଛ ୨୬୦ରୁ ୩ଶହ ଟଙ୍କା ରହିଛି । ସେହିପରି ଚିକେନ ପୂର୍ବରୁ ୧୫୦ ଟଙ୍କା ଥିବା ବେଳେ ୧୮୦ରୁ ୨୦୦ ଟଙ୍କା ରହିବ ଓ ମଟନ ପୂର୍ବରୁ ୫୦୦ ଟଙ୍କା ରହିଥିବା ବେଳେ ୬୦୦ ଟଙ୍କା ଛୁଇଁବା ଅନୁମାନ କରାଯାଉଛି ।
ତେବେ କାହିଁକି ପାଳନ ହୁଏ ଛାଡ ଖାଇ ଜାଣିଛନ୍ତି କି ? କଣ ରହିଛି ଏହା ପଛର କାରଣ ? କୁହାଯାଏ, କାର୍ତ୍ତିକ ବ୍ରତ କରୁଥିବା ବ୍ରତଧାରୀ ପୂଣ୍ୟ କାର୍ତ୍ତିକରେ ଦିନକୁ ମାତ୍ର ଥରେ ଖାଇ ବ୍ରତ କରନ୍ତି । ଏହି ମାସରେ ବ୍ରତଧାରୀମାନଙ୍କର ଖାଇବାରେ ଅନେକ କଟକଣା ଥାଏ । ଅନେକ ପରିବା ସହ କିଛି ଶସ୍ୟ ନଖାଇବାର ବାରଣ ରହିଥାଏ । ଖାଲି ସେତିକି ନୁହେଁ ବ୍ରତଧାରୀ ଖାଇବା ସମୟରେ ଯଦି କେହି ପାଟି କରନ୍ତି ସେଇଠି ତାଙ୍କ ଖାବା ବନ୍ଦ ହୁଏ । କାର୍ତ୍ତିକ ପୂର୍ଣ୍ଣିମା ଯାଏଁ ଏଭଳି ସଦାଚାରରେ ରହିଥାନ୍ତି ବ୍ରତଧାରୀ । କିନ୍ତୁ ପୂର୍ଣ୍ଣିମା ପରଦିନ ସେମାନେ ସମ୍ପୂର୍ଣ୍ଣ ଉପବାସ ରହି ବ୍ରତ ସମାପନ କରିଥାନ୍ତି । ଏହି ଦିନ ଖାଦ୍ୟ ଛାଡ଼ୁଥିବାରୁ ଏହାକୁ ଛାଡ଼ଖାଇ ବୋଲି କୁହାଯାଏ । ଆଉ କେହି କେହି କୁହନ୍ତି , ମାସକ ସାରା ଯେଉଁ ସବୁ ଖାଦ୍ୟକୁ ବାରଣ ଥାଏ ବା ଛାଡ଼ିଥାନ୍ତି ତାକୁ ପୁଣି ଗ୍ରହଣ କରୁଥିବାରୁ ମଧ୍ୟ ଏହି ଦିନକୁ ଛାଡ଼ଖାଇ ବୋଲି କୁହାଯାଏ । ମାସକ ସାରା ଆମିଷ ନଖାଉଥିବାରୁ ଏଦିନ ଆମିଷ ଖାଇବାକୁ ଗୁରୁତ୍ବ ଦେଇଥାନ୍ତି । ତେଣୁ ଆସନ୍ତାକାଲି ଆମିଷ ମାର୍କେଟରେ ଜମିବ ଲୋକଙ୍କ ଭିଡ଼ । ହେଲେ ଏଥର ଛାଡ଼ଖାଇଟା ମାଡ଼ ଖାଇଯାଇଛି । ଗୁରୁବାର ଛାଡ଼ଖାଇ ପଡ଼ୁଥିବାରୁ ଆମିଷ ବଜାରରେ ପୂର୍ବ ଭଳି ଭିଡ଼ ନାହିଁ । ଇଚ୍ଛା ଥିଲେ ବି ଆଇଁଷ ଟିକେ ଖାଇପାରିନାହାଁନ୍ତି । ହେଲେ କାଲି ଶୁକ୍ରବାର ଛାଡ଼ଖାଇ ପାଳିବାକୁ ଚାହିଁରହିଛନ୍ତି ଅନେକ । କାଲି କେତେ ଯେ ନୀରିହ ପ୍ରାଣୀ ବଳିପଡ଼ିବେ, ମଣିଷ ପେଟକୁ ଯିବେ ଠିକଠିକଣା ନାହିଁ ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |