ବାଲେଶ୍ୱର : ପିଲାଟି ଦିନରୁ ତବଲା ପ୍ରତି ତାଙ୍କ ଆଗ୍ରହ ପରିପ୍ରକାଶ ପାଇଥିଲା । ଯେଉଁଠି ତବଲା ଦେଖନ୍ତି ସେଠି ସେ ବସି ପଡନ୍ତି । ସମୟ ଅପଚୟ କରିବା ସେ ଶିଖି ନାହାଁନ୍ତି । କେବେ ତାଙ୍କୁ ଖାଲି ବସିବା ଦେଖିବାକୁ ମିଳିବନି । ଯେଉଁଠି ଯେତେବେଳେ ତବଲାର ଶବ୍ଦ ଶୁଭେ ସେଠୁ ଆଉ ଉଠନ୍ତି ନାହିଁ । ବୟସ ବେଶୀ ବି ନୁହେଁ । ହେଲେ ଯେଉଁ ବୟସରେ ପିଲା ବ୍ୟାଟ ଧରି ପଡିଆରେ କ୍ରିକେଟ ଖେଳନ୍ତି ସେ ବୟସରେ ସେ ହାତରେ ତବଲା ଧରି ବଜାନ୍ତି । ତେବେ ପୁଅର ଏହି ଇଛାକୁ ବି ସମ୍ମାନ ଦେଇଛନ୍ତି ଉଭୟ ବାପା ମା’ । ତେବେ ଖାଲି ତବଲା ନୁହେଁ ଚିତ୍ରାଙ୍କନ କରି ବିଭିନ୍ନସ୍ତରରେ ପୁରସ୍କୃତ ହୋଇ ପରିବାର ପାଇଁ ଗୌରବ ଆଣିଛନ୍ତି ।
ବାଲେଶ୍ବର କୁରୁଡ଼ା ଅଞ୍ଚଳର ଗୌରୀଶଙ୍କର ନାୟକ ଓ ରେଖାରାଣୀ ନାୟକଙ୍କ ପୁଅ ଅନ୍ବେଷଣ ନାୟକ । ମଡର୍ଣ୍ଣ ପବ୍ଲିକ ସ୍କୁଲ୍ରେ ଅଷ୍ଟମ ଶ୍ରେଣୀରେ ପାଠ ପଢ଼ନ୍ତି ଅନ୍ବେଷଣ । ଶିଶୁ ଦିବସରେ ସ୍କୁଲରେ ତବଲା ବଜାଇବା ପରେ ତାଙ୍କ ପ୍ରତିଭା ପଦାକୁ ଆସିଥିଲା । ଏଥିପାଇଁ ଶିକ୍ଷକ ଓ ଶିକ୍ଷୟିତ୍ରୀଙ୍କ ନିକଟରେ ପ୍ରଶଂସାର ପାତ୍ର ହୋଇପାରିଥିଲେ ଅନ୍ବେଷଣ ।ଏହାପରେ ଧୀରେଧୀରେ ତବଲା ବାଦନ ପ୍ରତି ତାଙ୍କ ଆଗ୍ରହ ବଢ଼ିବାରେ ଲାଗିଥିଲା । ଅନ୍ବେଷଣଙ୍କ ଏହି ଆଗ୍ରହକୁ ଦେଖି ପରିବାର ଲୋକେ ତାଙ୍କୁ ତବଲା ପ୍ରଶିକ୍ଷଣ କେନ୍ଦ୍ରରେ ଭର୍ତ୍ତି କରାଇଥିଲେ । ନିଜ ଭିତରେ ଥିବା କଳାକୁ ଆହୁରି ନିଖୁଣ କରିବା ପାଇଁ ସବୁବେଳେ ଅଭ୍ୟାସରେ ନିମଗ୍ନ ରହୁଛନ୍ତି ଅନ୍ବେଷଣ ।
୬ ବର୍ଷ ହେବ ଫକୀରମୋହନ ଆର୍ଟିଷ୍ଟିକ କ୍ରାଫ୍ଟ୍ ଆଣ୍ଡ ମ୍ୟୁଜିକ ସ୍କୁଲରେ ଚିତ୍ର ଓ ତବଲା ବାଦନ ପ୍ରଶିକ୍ଷଣ ନେଉଛନ୍ତି ଅନ୍ବେଷଣ । ଉଭୟ ତବଲା ବାଦନ ଓ ଚିତ୍ରକଳା ପାଇଁ ବିଭିନ୍ନ ଅନୁଷ୍ଠାନ ପକ୍ଷରୁ ତାଙ୍କୁ ପୁରସ୍କୃତ କରାଯାଇଛି । ସେହିପରି ପେନ୍ସିଲ୍ ଆର୍ଟ ସହ ତୂଳୀ ବ୍ୟବହାର କରି ଖୁବ୍ ସମୟ ମଧ୍ୟରେ ସୁନ୍ଦରସୁନ୍ଦର ଚିତ୍ର ଆଙ୍କି ପାରନ୍ତି ଅନ୍ବେଷଣ । ତବଲା ବାଦନ ଓ ଚିତ୍ରାଙ୍କନ ଛଡ଼ା ଅନ୍ବେଷଣ ଜଣେ ଭଲ ଛାତ୍ର । ସେ ସ୍କୁଲ୍ରେ ଭଲ ମାର୍କ ରଖି ଶିକ୍ଷକ ଶିକ୍ଷୟିତ୍ରୀଙ୍କ ପ୍ରିୟ ଛାତ୍ର ହୋଇପାରିଛନ୍ତି । ଭବିଷ୍ୟତରେ ପ୍ରଶାସନିକ କ୍ଷେତ୍ରରେ କାର୍ଯ୍ୟ କରିବାକୁ ଲକ୍ଷ୍ୟ ରଖିଛନ୍ତି ଅନ୍ବେଷଣ ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |