କୋରାପୁଟ: ବଦଳିବ ଦେଓମାଳିର ଚିତ୍ର । ଆଉ କିଛିଦିନ ପରେ ଆରମ୍ଭ ହେବ କୋରାପୁଟ ଦେଓମାଳିରେ ‘ଇକୋ ରିଟ୍ରିଟ-୨୦୨୫-୨୬’ । ପୁଣିଥରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବ କୋଟିଆ ପଞ୍ଚାୟତର ଦେଓମାଳି ପର୍ବତମାଳା । ଏବେ ଠୁ ଦିନ ରାତି ଦେଓମାଳିରେ ପ୍ରକୃତିର ବୈଚିତ୍ରକୁ ଅନୁଭବ କରିବେ ପର୍ଯ୍ୟଟକ । କାରଣ ଆଉ କିଛିଦିନ ପରେ ଆରମ୍ଭ ହେବାକୁ ଯାଉଛି ଦେଓମାଳିରେ ‘ଇକୋ ରିଟ୍ରିଟ’ । ଆଉ ଏହାକୁ ନେଇ ଜିଲ୍ଲାବାସୀଙ୍କ ସହ ପର୍ଯ୍ୟଟକ ବେଶ ଉତ୍ସାହିତ ଅଛନ୍ତି । ପ୍ରକୃତିର ବିସ୍ମୟ ତଥା କୋରାପୁଟ ଜିଲ୍ଲାର ସ୍ୱତନ୍ତ୍ର ପରିଚୟ ଦେଓମାଳି । ଓଡିଶାର ଉଚ୍ଚତମ ପର୍ବତମାଳା ଦେଓମାଳି । ଆଉ ଦିନ କେଇଟା ପରେ ପୁରା ସଜେଇ ହୋଇଯିବ ଏହି ଦେଓମାଳି । ପାହାଡ ଦେହରେ ଘଷି ହୋଇଯାଉଛି ହାଲୁକା ମେଘ । କୁହୁଡିର ଧଳା ଚାଦରରେ ଘୋଡେଇ ହୋଇ ରହିଥିବା ଦେଓମାଳିର ସୌନ୍ଦର୍ଯ୍ୟ ଖରା ଆସିଲେ ପୁରା ଉଜ୍ଜଳ ଦେଖାଯାଉଛି । ପ୍ରତିଦିନ ୬ଟି ଋତୁର ଅନୁଭବ ଦିଏ ଦେଓମାଳି । ବଦଳୁଥିବା ସମୟ ଓ ପରିସ୍ଥିତିକୁ ଉପଭୋଗ କରିବା ପାଇଁ ଏଠାକୁ ପ୍ରତିବର୍ଷ ଇକୋ ରିଟ୍ରିଟ ହେଲେ ଛୁଟି ଆସନ୍ତି ଶହଶହ ପର୍ଯ୍ୟଟକ । ଏଠିକାର ସବୁଜ ବନାନୀଭରା ସୌନ୍ଦର୍ଯ୍ୟ ପରିବେଶକୁ ଦେଖି ମୁଗ୍ଧ ହୋଇଯାଆନ୍ତି ପର୍ଯ୍ୟଟକ । ଦେଓମାଳିର ଶୀଖରରେ ପହଞ୍ଚିବା ପରେ ମନ ପ୍ରାଣ ଶରୀର ହୋଇଥାଏ ଆନନ୍ଦିତ । ଏଇଥିପାଇଁ ବାରମ୍ବାର ଦେଓମାଳିକୁ ଦେଖିବା ପାଇଁ ମନ କରିଥାନ୍ତି ପର୍ଯ୍ୟଟକ । ସବୁଜ ଉପତ୍ୟାକାର ପୃଷ୍ଠ ଭୂମିରେ ରହିଛି କୋରାପୁଟ ଜିଲ୍ଲା । ଏଠାରେ ରହିଛି ଛୋଟବଡ ପାହାଡ । କୋରାପୁଟରେ ରାଜ୍ୟର ଉଚ୍ଚତମ ଗିରି ଶୃଙ୍ଗ ଦେଓମାଳି ରହିଛି । କହିବାକୁ ଗଲେ କୋରାପୁଟକୁ ସ୍ୱତନ୍ତ୍ର ପରିଚୟ ଦେଇଛି ପ୍ରାକୃତି ପରିବେଶ ଭରା ଜଙ୍ଗଲ, ପାହାଡ ଓ ପାହାଡ ମଧ୍ୟରୁ କୁଳୁକୁଳୁ ଝରୁଥିବା ଝରଣା । ପ୍ରାକୃତିକ ବରଦାନ କୋରାପୁଟ ନିଜର ପ୍ରାକୃତିକ ସୌନ୍ଦର୍ଯ୍ୟ ପାଇଁ ରାଜ୍ୟ ତଥା ଦେଶରେ ଖୁବ ପ୍ରସିଦ୍ଧ । ପ୍ରତି ଋତୁରେ ଏଠାରେ ହଜାର ହଜାର ପର୍ଯ୍ୟଟକଙ୍କ ଭିଡ ଜମେ । କୋରାପୁଟର ଦେଓମାଳି ସୁଉଚ୍ଚ ପର୍ବତ ଉପରେ ଇକୋ ରିଟ୍ରିଟ ହେବାକୁ ମିଳିସାରିଛି ଅନୁମତି । ଏହି ମନୋରମ ସ୍ଥାନରେ ରାତ୍ରିଯାପନ ପାଇଁ ଉନ୍ନତିମାନର ଟେଣ୍ଟର ରହଣୀର ବ୍ୟବସ୍ଥା ସହ ଦେଓମାଳି ପର୍ବତ ସହ ଆଖପାଖ ସ୍ଥାନକୁ ବୁଲି ଦେଖିବାର ସୁଯୋଗ ପାଇବେ ପର୍ଯ୍ୟଟକ । ଯାହାକୁ ନେଇ ପର୍ଯ୍ୟଟକଙ୍କ ମନରେ ବେଶ ଆଗ୍ରହ ଦେଖା ଦେଇଛି । ଦେଓମାଳିରେ ଇକୋ ରିଟ୍ରିଟ ହେଲେ କୋରପୁଟରେ ପର୍ଯ୍ୟଟନର ବିକାଶ ଏବଂ ସ୍ଥାନୀୟ ଲୋକଙ୍କୁ ରୋଜଗାରର ସୁଯୋଗ ଦେବ । ଏଥିସହ ପର୍ଯ୍ୟଟକଙ୍କ ପାଇଁ ସୁବିଧା ସୁଯୋଗ ସୃଷ୍ଟି କରିବ । ଏହାଦ୍ୱାରା କୋରାପୁଟ ଓ ପାହାଡ ମଝିରେ ରହୁଥିବା ଆଦିବାସୀଙ୍କ ଜୀବନଶୈଳୀ ଉପରେ ଅଧିକ ଜାଣିପାରବେ ପର୍ଯ୍ୟଟକ । ତେଣୁ ରାଜ୍ୟ ସରକାରଙ୍କ ଏହି ନିଷ୍ପତ୍ତିକୁ ସାଧାରଣରେ ପ୍ରଶଂସା କରାଯାଇଛି । ଦେଓମାଳିରେ ଇକୋ ରିଟ୍ରିଟ ହେଲେ କୋଟିଆ ପଞ୍ଚାୟତ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିବ । ଏଥିପାଇଁ ଜଙ୍ଗଲ ଓ ପରିବେଶ ବିଭାଗ ଓ ଜିଲ୍ଲା ପ୍ରଶାସନ ପକ୍ଷରୁ ଆରମ୍ଭ ହେଲାଣି କାର୍ଯ୍ୟକ୍ରମ । ପର୍ଯ୍ୟଟକ କିଭଳି ଏଠାରେ ଭଲରେ ରହିବେ ସୁରକ୍ଷିତ ଭାବେ ରହିବେ ସେଥିପାଇଁ ଏବେ ଠୁ ହେଲାଣି ସବୁ ପ୍ରସ୍ତୁତି । ଏହି ଅବସରରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ ରହିଛି । ସମସ୍ତ କାର୍ଯ୍ୟକୁ ଶୃଙ୍ଖଳିତ ଭାବେ ପରିଚାଳନା କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେବା ସହ ଆସୁଥିବା ପର୍ଯ୍ୟଟକମାନେ ଯେପରି ଏକ ସୁଖଦ ଅନୁଭବ ନେଇ ଫେରିବେ ସେଥିପ୍ରତି ଯତ୍ନବାନ ହେବାକୁ ପରାମର୍ଶ ଦେଇଛନ୍ତି । ‘ଇକୋ ରିଟ୍ରିଟ୍’ ହେଉଛି ଓଡ଼ିଶା ସରକାରଙ୍କ ଦ୍ୱାରା ପରିଚାଳିତ ଏକ ବିଳାସପୂର୍ଣ୍ଣ ମନୋରଞ୍ଜନ ସ୍ଥଳ । ଏହା ସରକାରୀ ପରିଚାଳିତ ଦେଓମାଳି ପ୍ରକୃତି ଶିବିର । ଯାହା ମୌଳିକ ରହଣି ପ୍ରଦାନ କରେ। ଅତିଥିମାନଙ୍କୁ ଟ୍ରେକିଂ, ସାଇକେଲିଂ ଏବଂ ପ୍ରକୃତି ଉପଭୋଗ କରିବା ଭଳି କାର୍ଯ୍ୟକଳାପ ମାଧ୍ୟମରେ ପୂର୍ବଘାଟର ପ୍ରାକୃତିକ ସୌନ୍ଦର୍ଯ୍ୟ ମଧ୍ୟରେ ରହିବାର ସୁଯୋଗ ପ୍ରଦାନ କରେ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |