ଅମିନପୁର (ତେଲେଙ୍ଗାନା): ପିମ୍ପୁଡି ଭୟରେ ଜୀବନ ହାରିଲେ ମହିଳା । ଘଟଣାଟି ଯେତିକି ଦୁଃଖଦାୟକ ସେତିକି ଆଶ୍ଚର୍ଯ୍ୟଜନକ ମଧ୍ୟ । ଏଭଳି ଘଟଣା ଘଟିଛି ତେଲେଙ୍ଗାନା ରାଜ୍ୟର ସଙ୍ଗାରେଡ୍ଡୀ ଜିଲ୍ଲା ଅମିନପୁର ଅଞ୍ଚଳରେ । ପିମ୍ପୁଡି ଭୟରେ ଜଣେ ମହିଳା ଜୀବନ ହାରିଥିବା ନେଇ ମୃତ ମହିଳାଙ୍କ ବାପା କହିଛନ୍ତି ।
ଜୀବନ ହାରିଥିବା ମହିଳାଙ୍କ ବାପା ସିଆଇ ନରେଶଙ୍କ କହିବାନୁଯାୟୀ, 2022ରେ ମଞ୍ଚେରିଅଲ ନିବାସୀ ସଫ୍ଟଓ୍ବେୟାର କମ୍ପାନୀରେ କାର୍ଯ୍ୟ କରୁଥିବା ଦୟାବନପଲ୍ଲୀ ଶ୍ରୀକାନ୍ତଙ୍କ ସହ ତାଙ୍କ ଝିଅ ମନୀଷା (25)ଙ୍କର ବିବାହ ହୋଇଥିଲା । ତାଙ୍କର ଗୋଟିଏ 3 ବର୍ଷର ଝିଅ ମଧ୍ୟ ଅଛି । କିଛି ଦିନ ପୂର୍ବେ ସେ ପାଟନଚେରୁ ଅନ୍ତର୍ଗତ ଅମିନପୁର ଅଞ୍ଚଳରେ ରହୁଥିଲେ । ମନୀଷା ପିଲାଦିନରୁ ମାଇର୍ମାଇକୋଫୋବିଆ (ପିମ୍ପୁଡି ଭୟ) ରୋଗରେ ପୀଡିତ । ଏହାକୁ ନେଇ ମନୀଷା ଜଣେ ମନୋବୈଜ୍ଞାନିକଙ୍କର ପରାମର୍ଶ ମଧ୍ୟ ନେଇଥିଲେ । ନଭେମ୍ବର 4 ତାରିଖ ଦିନ ଶ୍ରୀକାନ୍ତ ଅଫିସ ଯାଇଥିଲେ । ସନ୍ଧ୍ୟାରେ ଅଫିସରୁ ଘରକୁ ଫେରି କବାଟ ବନ୍ଦ ଥିବା ଦେଖିବାକୁ ପାଇଥିଲେ । କବାଟ ଭାଙ୍ଗି ଘର ଭିତରକୁ ପଶିବା ପରେ ତାଙ୍କ ସ୍ତ୍ରୀଙ୍କ ମୃତଦେହ ଦେଖିବାକୁ ପାଇଥିଲେ ।
ଜୀବନ ହାରିବା ପୂର୍ବରୁ ସେ ଘର ସଫା କରିବେ ବୋଲି କହିଥିଲେ ଏବଂ ତାଙ୍କ 3 ବର୍ଷର ଝିଅକୁ ନିକଟସ୍ଥ ସମ୍ପର୍କୀୟଙ୍କ ଘରେ ଛାଡିଥିଲେ । ବୋଧହୁଏ ଘର ସଫା କରିବା ସମୟରେ ସେ ପିମ୍ପୁଡି ଦେଖି ନେଇଥିବେ ଯେଉଁଥିପାଇଁ ସେ ଭୟଭୀତ ହୋଇ ନିଜ ଜୀବନ ହାରିଛନ୍ତି । ପିମ୍ପୁଡି ଯାହାକୁ ଦେଖିଲେ ଛୋଟ ଛୁଆ ବି ଡରେ ନାହିଁ । ଯଦି ଏହା କାମୁଡେ ତାହାଲେ ଛୁଞ୍ଚି ଲାଗିଲା ଭଳି ଲାଗେ । କିନ୍ତୁ ଏହି ପିମ୍ପୁଡି ପାଇଁ ଜଣଙ୍କ ଜୀବନ ଯିବ ତାହାକୁ ସାଧାରଣରେ କେହି ବି ବିଶ୍ୱାସ କରି ପାରୁନାହାନ୍ତି । ସେପଟେ ମୃତ ମହିଳାଙ୍କ ବାପାଙ୍କ ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |