ମଧ୍ୟପ୍ରାଚ୍ୟ ଅଞ୍ଚଳରେ ଦିନକୁ ଦିନ ତୀବ୍ର ହେଉଥିବା ଯୁଦ୍ଧ ଏବେ ବିଶ୍ୱ ଅର୍ଥନୀତିକୁ ଅସ୍ଥିର କରିବାକୁ ଆରମ୍ଭ କରିଛି। ଇରାନ, ଇସ୍ରାଏଲ ଓ ଆମେରିକା ମଧ୍ୟରେ ଚାଲିଥିବା ଦ୍ବନ୍ଦ୍ୱ ନୂତନ ମୁହାଁ ନେଇଛି, ଯେଉଁଠାରେ ସାମରିକ ଘାଟି ସହ ଏବେ ଶକ୍ତି ଉତ୍ପାଦନ କେନ୍ଦ୍ରମାନେ ମଧ୍ୟ ଲକ୍ଷ୍ୟବସ୍ତୁ ହେଉଛନ୍ତି।
ସମ୍ପ୍ରତି କତାରର ରାସ ଲାଫାନ ଶିଳ୍ପ କ୍ଷେତ୍ରରେ ଥିବା ଗୁରୁତ୍ୱପୂର୍ଣ୍ଣ ଗ୍ୟାସ ପ୍ଲାଣ୍ଟ ଉପରେ ମିସାଇଲ ଆକ୍ରମଣ ହୋଇଥିବା ଖବର ଆସିଛି। ଏହି ଆକ୍ରମଣରେ ଗୁରୁତର ଅଗ୍ନିକାଣ୍ଡ ସୃଷ୍ଟି ହୋଇ ଗ୍ୟାସ ଉତ୍ପାଦନ ବନ୍ଦ ହୋଇଯାଇଛି। ଏହା ପୂର୍ବରୁ ଇସ୍ରାଏଲ ଦ୍ୱାରା ଇରାନର ଦକ୍ଷିଣ ପାର୍ସ ଗ୍ୟାସ କ୍ଷେତ୍ର ଉପରେ ଆକ୍ରମଣ ହେବା ପରେ ଏହି ପରିସ୍ଥିତି ଅଧିକ ଗୁରୁତର ହୋଇଯାଇଛି। ପରବର୍ତ୍ତୀ ସମୟରେ ଇରାନ କତାର, ସାଉଦି ଆରବ ଓ ସଂଯୁକ୍ତ ଆରବ ଏମିରେଟ୍ସକୁ ସତର୍କ କରିଛି ଯେ, ଶକ୍ତି ସଂପର୍କିତ ସଂଠନ ଗୁଡ଼ିକ ମଧ୍ୟ ଟାର୍ଗେଟ ହୋଇପାରେ।
କତାର ବିଶ୍ୱର ଏକ ପ୍ରମୁଖ ତରଳ ପ୍ରାକୃତିକ ଗ୍ୟାସ (LNG) ଯୋଗାଣକାରୀ ଦେଶ। ଏଠାରେ ଉତ୍ପାଦନ ବାଧାପ୍ରାପ୍ତ ହେବାର ଅର୍ଥ ହେଉଛି ବିଶ୍ୱ ବଜାରରେ ଗ୍ୟାସ ମୂଲ୍ୟ ଉଦ୍ଧମ ହେବାର ସମ୍ଭାବନା। ଭାରତ ପାଇଁ ଏହା ଅଧିକ ଚିନ୍ତାଜନକ, କାରଣ ଦେଶ ତାହାର ମୋଟ ଗ୍ୟାସ ଆବଶ୍ୟକତାର ଲକ୍ଷଣୀୟ ଅଂଶ କତାର ଉପରେ ନିର୍ଭର କରେ।
ସୂଚନା ଅନୁସାରେ, ଭାରତ ପ୍ରତିବର୍ଷ ବହୁ ପରିମାଣରେ LNG ଆମଦାନୀ କରୁଛି, ଯାହାର ବଡ଼ ଅଂଶ କତାରରୁ ଆସୁଛି। ଏହା ସହିତ ସଂଯୁକ୍ତ ଆରବ ଏମିରେଟ୍ସ ଓ ଆମେରିକା ମଧ୍ୟ ଭାରତର ମୁଖ୍ୟ ଯୋଗାଣକାରୀ ଦେଶ। ଏହି ପରିସ୍ଥିତିରେ ଯଦି ମଧ୍ୟପ୍ରାଚ୍ୟରେ ଅସ୍ଥିରତା ଚାଲିଥାଏ, ତେବେ ଭାରତକୁ ବିକଳ୍ପ ବଜାରରୁ ଅଧିକ ମୂଲ୍ୟରେ ଗ୍ୟାସ କ୍ରୟ କରିବାକୁ ପଡ଼ିପାରେ।
ଏହାର ପ୍ରଭାବ ସିଧାସଳଖ ଭାବରେ ସାଧାରଣ ଲୋକଙ୍କ ଉପରେ ପଡ଼ିବା ସମ୍ଭାବନା ରହିଛି। ଘରୋଇ ରନ୍ଧନ ଗ୍ୟାସ (LPG) ଦର ବୃଦ୍ଧି ପାଇପାରେ, ଯାହା ଗୃହସ୍ଥ ଖର୍ଚ୍ଚକୁ ବଢ଼ାଇ ଦେବ।
ଏହା ସହିତ ହର୍ମୁଜ ସମୁଦ୍ରପଥରେ ଯୁଦ୍ଧ ବଢ଼ିବାରୁ ଅନେକ ଭାରତୀୟ ଗ୍ୟାସବାହୀ ଜାହାଜ ଅଟକି ରହିଥିବା ସୂଚନା ମିଳିଛି। ଏହା ଯୋଗାଣ ବ୍ୟବସ୍ଥାକୁ ଅଧିକ ଚାପରେ ପକାଇଛି । ଯଦିଓ ସରକାର ଏପର୍ଯ୍ୟନ୍ତ କହିଛନ୍ତି ଯେ ଦେଶରେ ଗ୍ୟାସ ଅଭାବ ନାହିଁ, କିନ୍ତୁ ଦୀର୍ଘମିୟାଦୀ ପରିସ୍ଥିତି ନେଇ ଚିନ୍ତା ବଢ଼ୁଛି।
ମଧ୍ୟପ୍ରାଚ୍ୟରେ ବଢ଼ୁଥିବା ଏହି ସଂଘର୍ଷ କେବଳ ସେନା ମାନଙ୍କ ମଧ୍ୟରେ ସୀମିତ ରହୁନାହିଁ; ଏହା ବିଶ୍ୱ ଶକ୍ତି ବଜାରକୁ ମଧ୍ୟ ଅସ୍ଥିର କରୁଛି। ଏହାର ପ୍ରଭାବ ଭାରତ ସମେତ ଅନେକ ଦେଶର ଅର୍ଥନୀତି ଓ ସାଧାରଣ ଜୀବନ ଉପରେ ପଡ଼ିବା ନିଶ୍ଚିତ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |