ଭୁବନେଶ୍ୱର : ଆଜି ଏପ୍ରିଲ ୧୧ ଓଡ଼ିଆ ପାରମ୍ପରିକ ମିଠାର ଗର୍ବ ‘ଛେନାପୋଡ଼’ ପାଇଁ ଏକ ବିଶେଷ ଦିନ । ସମଗ୍ର ଓଡ଼ିଶାରେ ଆଜି ‘ବିଶ୍ୱ ଛେନାପୋଡ଼ ଦିବସ’ ଉତ୍ସାହ ଓ ଆନନ୍ଦର ସହ ପାଳନ କରାଯାଉଛି । ବିଭିନ୍ନ ସଂଗଠନ, ମିଠା ଦୋକାନ ଓ ଖାଦ୍ୟ ପ୍ରେମୀମାନେ ଏହି ଦିନକୁ ବିଶେଷ ଭାବେ ଉଦ୍ଯାପନ କରୁଛନ୍ତି।
ଛେନା ପୋଡ଼ କେବଳ ଏକ ମିଠା ନୁହେଁ, ଏହା ଓଡ଼ିଆ ସଂସ୍କୃତି ଓ ରୁଚିର ଏକ ପରିଚୟ । ଏହି ଦିନ ପାଳନର ମୂଳ ଉଦ୍ଦେଶ୍ୟ ହେଉଛି ଏହି ପାରମ୍ପରିକ ଖାଦ୍ୟକୁ ଦେଶ-ବିଦେଶରେ ଅଧିକ ପ୍ରଚାର କରିବା ଓ ତାହାର ଐତିହ୍ୟକୁ ସ୍ମରଣ କରିବା।
କୁହାଯାଏ, ଛେନାପୋଡ଼ର ଉଦ୍ଭବ ନୟାଗଡ଼ ଅଞ୍ଚଳରେ ହୋଇଥିଲା। ଏକ ମିଠାକାର ଅନୁମାନରେ ଛେନା, ଚିନି ଓ ଅନ୍ୟାନ୍ୟ ସାମଗ୍ରୀକୁ ଅଗିରେ ପୋଡ଼ି ଯେଉଁ ସ୍ୱାଦିଷ୍ଟ ମିଠା ତିଆରି କରିଥିଲେ, ସେହିଠାରୁ ଏହାର ଜନ୍ମ । ପରେ ଏହି ଖାଦ୍ୟ ଓଡ଼ିଶାର ଘରେ ଘରେ ପ୍ରସିଦ୍ଧ ହୋଇଗଲା।
ଆଜିର ଦିନକୁ ‘ଛେନାପୋଡ଼ ଦିବସ’ ଭାବେ ପାଳନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି ଏହି ଅନନ୍ୟ ମିଠାର ପରିଚୟକୁ ଆହୁରି ମଜବୁତ କରିବା ଓ ଏହାର ସ୍ୱାଦକୁ ସମସ୍ତଙ୍କ ପାଖକୁ ପହଞ୍ଚାଇବା। ଏହା ଓଡ଼ିଶାର ଖାଦ୍ୟ ପରମ୍ପରାକୁ ବିଶ୍ୱମଞ୍ଚରେ ଉଜାଗର କରିବାର ଏକ ସୁନ୍ଦର ପ୍ରୟାସ ବୋଲି କୁହାଯାଉଛି।
ଛେନାପୋଡ଼ ନାଁଟି କାନରେ ପଡ଼ିଲେ ମାତ୍ରେ ମୁହଁରେ ପାଣି ଆସିଯାଏ । ଓଡ଼ିଶାର ପ୍ରାୟ ପ୍ରତ୍ୟେକ ଲୋକଙ୍କ ପାଖରେ ଏହି ପାରମ୍ପରିକ ମିଠାର ଅଲଗା ଆକର୍ଷଣ ରହିଛି । ସ୍ୱାଦ, ସୁଗନ୍ଧ ଓ ନିଜସ୍ୱ ଶୈଳୀରେ ପକାଯାଇଥିବା ଛେନାପୋଡ଼ ଲୋକମନଙ୍କ ମନକୁ ସହଜରେ ଜିତିନେଇଥାଏ।
ଏହା କେବଳ ଏକ ସାଧାରଣ ମିଠା ନୁହେଁ, ଓଡ଼ିଆ ପାରମ୍ପରିକ ରନ୍ଧନଶୈଳୀର ଏକ ଅବିଚ୍ଛିନ୍ନ ଅଂଶ। ପର୍ବପର୍ବାଣୀ, ଘରୋଇ ଉତ୍ସବ ଠାରୁ ଆରମ୍ଭ କରି ଦୈନିକ ଜୀବନରେ ମଧ୍ୟ ଏହାର ବିଶେଷ ସ୍ଥାନ ରହିଛି। ବିଶେଷ କରି ମନ୍ଦିରମାନଙ୍କରେ ଛେନାପୋଡ଼କୁ ଭଗବାନଙ୍କ ପାଖରେ ଭୋଗ ଭାବେ ଅର୍ପଣ କରାଯାଏ, ଯାହା ଏହାର ଧାର୍ମିକ ଓ ସାଂସ୍କୃତିକ ମହତ୍ତ୍ୱକୁ ଅଧିକ ଉଜାଗର କରେ ।
ଅନ୍ୟପକ୍ଷରେ ଛେନା ପୋଡ଼ର ଜନକ ବୋଲି କୁହାଯାଉଥିବା ସୁଦର୍ଶନ ସାହୁଙ୍କର ଆଜି ହେଉଛି ଜନ୍ମ ବାର୍ଷିକ। ସେଥିପାଇଁ ତାଙ୍କର ଜନ୍ମ ବାର୍ଷିକକୁ ଛେନା ପୋଡ ଦିବସ ଭାବେ ପାଳନ କରାଯାଇଥାଏ।
ଇତିହାସ କୁହେ ଯେ, ନୟାଗଡ଼ ଜିଲ୍ଲାର ଦଶପଲ୍ଲା ଅଞ୍ଚଳରେ ବସବାସ କରୁଥିବା ସୁଦର୍ଶନ ସାହୁ ନାମକ ଜଣେ ସାଧାରଣ ମିଠା ବ୍ୟବସାୟୀ ସ୍ୱାଧୀନତା ପୂର୍ବରୁ ଛେନାପୋଡ଼ ତିଆରି କରୁଥିଲେ ବୋଲି ତଥ୍ୟ ମିଳେ। ତାଙ୍କ ନୂତନ ପ୍ରୟୋଗ ଓ ରନ୍ଧନ କଳାରୁ ଏହି ପ୍ରସିଦ୍ଧ ମିଠାର ଆରମ୍ଭ ହୋଇଥିବା କୁହାଯାଏ।
ତାଙ୍କର ସ୍ମୃତିକୁ ସମ୍ମାନ ଜଣାଇବା ପାଇଁ ପ୍ରତିବର୍ଷ ଏପ୍ରିଲ ୧୧ ତାରିଖରେ ‘ବିଶ୍ୱ ଛେନାପୋଡ଼ ଦିବସ’ ପାଳନ କରାଯାଉଛି। ଏହି ଦିନଟି କେବଳ ଓଡ଼ିଶାରେ ନୁହେଁ, ଦେଶର ବିଭିନ୍ନ ସ୍ଥାନରେ ମଧ୍ୟ ଉତ୍ସାହର ସହ ଉଦ୍ଯାପିତ ହେଉଛି, ଯାହା ଓଡ଼ିଆ ଖାଦ୍ୟ ପରମ୍ପରାକୁ ଆଉ ଏକ ନୂଆ ପରିଚୟ ଦେଇଛି।
ସ୍ୱାଦ ଓ ପରମ୍ପରାର ଏହି ଅନନ୍ୟ ସମନ୍ୱୟ ହିଁ ଛେନାପୋଡ଼କୁ ଅନ୍ୟ ମିଠା ଠାରୁ ବିଶେଷ କରିଥାଏ, ଯାହା ଆଜି ମଧ୍ୟ ପ୍ରତ୍ୟେକ ଓଡ଼ିଆଙ୍କ ହୃଦୟରେ ନିଜ ସ୍ଥାନ ଅତୁଟ ରଖିଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |