ନୂଆଦିଲ୍ଲୀ : ଭାରତୀୟ ସଂସଦୀୟ ଇତିହାସରେ ନୂଆ ଅଧ୍ୟାୟ । ଦେଶର ପ୍ରଥମ ତୃତୀୟ ଲିଙ୍ଗୀ ସାଂସଦ ଭାବେ ଶପଥ ନେଲେ ମେନକା ଗୁରୁସ୍ୱାମୀ । ତୃଣମୂଳ କଂଗ୍ରେସ (ଟିଏମସି) ପକ୍ଷରୁ ରାଜ୍ୟସଭାରେ ତାଙ୍କ ପ୍ରବେଶ ଭାରତୀୟ ଲୋକତନ୍ତ୍ର ପାଇଁ ଏକ ଐତିହାସିକ ପଦକ୍ଷେପ ଭାବେ ଦେଖାଯାଉଛି ।
୫୧ ବର୍ଷୀୟା ବରିଷ୍ଠ ଆଇନଜୀବୀ ଡ. ଗୁରୁସ୍ୱାମୀ ଖୋଲାମେଳା ଭାବେ ନିଜକୁ LGBTQ+ ସମ୍ପ୍ରଦାୟର ସଦସ୍ୟ ବୋଲି ପରିଚୟ କରାଇଛନ୍ତି। ସେ କହିଛନ୍ତି ଯେ, ସମ୍ବିଧାନର ମୂଲ୍ୟବୋଧ ସମାନତା, ନ୍ୟାୟ ଏବଂ ଭେଦଭାବମୁକ୍ତ ସମାଜକୁ ସୁଦୃଢ଼ କରିବା ହେଉଛି ତାଙ୍କର ପ୍ରଧାନ ଲକ୍ଷ୍ୟ। ତାଙ୍କର ଏହି ଉଦୟ ଅନେକ ଲୋକଙ୍କ ପାଇଁ ଆଶାର ପ୍ରତୀକ, ଯେଉଁମାନେ ସମାନ ଅଧିକାର ପାଇଁ ଏପର୍ଯ୍ୟନ୍ତ ସଂଘର୍ଷ କରୁଛନ୍ତି।
ଡ. ମେନକା ଗୁରୁସ୍ୱାମୀଙ୍କ ଜୀବନ ଯାତ୍ରା ଅତ୍ୟନ୍ତ ପ୍ରେରଣାଦାୟକ। ଅକ୍ସଫୋର୍ଡ ଓ ହାର୍ଭାର୍ଡ ଭଳି ବିଶ୍ୱବିଖ୍ୟାତ ସଂସ୍ଥାରୁ ଶିକ୍ଷା ଗ୍ରହଣ କରି ସେ ଆଇନ କ୍ଷେତ୍ରରେ ନିଜକୁ ସ୍ଥାପିତ କରିଥିଲେ । ବିଶେଷ କରି ୨୦୧୮ ମସିହାରେ ସୁପ୍ରିମକୋର୍ଟରେ ଧାରା ୩୭୭ ବିରୋଧରେ ହୋଇଥିବା ଐତିହାସିକ ଆଇନଗତ ଲଢେଇରେ ସେ ମୁଖ୍ୟ ଭୂମିକା ନେଇଥିଲେ । ଯାହା ଫଳରେ ସମଲିଙ୍ଗୀ ସମ୍ପର୍କକୁ ଅପରାଧ ଶ୍ରେଣୀରୁ ବାହାର କରାଯାଇଥିଲା।
ତାଙ୍କର କ୍ଷମତା ଓ ଦୃଢ଼ ନେତୃତ୍ୱ ଯୋଗୁଁ ୨୦୧୯ ମସିହାରେ ସେ ‘ଟାଇମ୍’ ମ୍ୟାଗାଜିନର ୧୦୦ ଜଣ ପ୍ରଭାବଶାଳୀ ବ୍ୟକ୍ତିତ୍ୱ ତାଲିକାରେ ସ୍ଥାନ ପାଇଥିଲେ। ସେଥିପାଇଁ ‘ଫରେନ ପଲିସି’ ମ୍ୟାଗାଜିନର ‘ଗ୍ଲୋବାଲ ଥିଙ୍କର୍ସ’ ତାଲିକାରେ ମଧ୍ୟ ତାଙ୍କୁ ସମ୍ମିଳିତ କରାଯାଇଥିଲା।
୧୯୯୭ ମସିହାରେ ପୂର୍ବତନ ଆଟର୍ଣ୍ଣି ଜେନେରାଲ ଅଶୋକ ଦେଶାଇଙ୍କ ମାର୍ଗଦର୍ଶନରେ ତାଙ୍କ ଆଇନ ଜୀବନ ଆରମ୍ଭ ହୋଇଥିଲା। ସେ ଅନେକ ଜଟିଳ ସାମ୍ବିଧାନିକ ମାମଲାରେ ତାଙ୍କ ସହ କାମ କରି ଦୃଢ଼ ଅନୁଭବ ସଂଗ୍ରହ କରିଥିଲେ। ପରେ ସେ ତୃଣମୂଳ କଂଗ୍ରେସ ସହ ଜଡିତ ହୋଇ ଦଳର ପକ୍ଷରେ କୋର୍ଟରେ ଯୁକ୍ତି ରଖିଥିଲେ ଏବଂ ବିଭିନ୍ନ ଆଇନଗତ ପ୍ରସଙ୍ଗରେ ରଣନୀତିମୂଳକ ସହଯୋଗ ଦେଇଥିଲେ।
ଏବେ ସଂସଦରେ ପ୍ରବେଶ ପରେ, ଡ. ଗୁରୁସ୍ୱାମୀ କେବଳ ଦଳୀୟ ମୁଦ୍ଦା ନୁହେଁ, ବରଂ ସାମାଜିକ ନ୍ୟାୟ, ସମାନ ଅଧିକାର ଏବଂ ଅନ୍ତର୍ଭୁକ୍ତିମୂଳକ ସମାଜ ଗଠନ ନେଇ ନିଜ ସ୍ୱର ଉତ୍ତୋଳନ କରିବେ ବୋଲି ଆଶା କରାଯାଉଛି।
ଡ. ମେନକା ଗୁରୁସ୍ୱାମୀଙ୍କ ଏହି ସଫଳତାକୁ LGBTQ+ ସମ୍ପ୍ରଦାୟ ପାଇଁ ବୃଦ୍ଧିଶୀଳ ସାମାଜିକ ସ୍ୱୀକୃତି ଏବଂ ରାଜନୈତିକ ସଶକ୍ତିକରଣର ଏକ ମଜବୁତ ପ୍ରତୀକ ଭାବେ ଦେଖାଯାଉଛି।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |