ଲକ୍ଷ୍ମୀପୁର : ବୟସ ୬୦ ଛୁଇଁଲାଣି । ଦିନେ ସ୍କୁଲର ପିଣ୍ଡା ମାଡି ନାହାଁନ୍ତି । ପାଠପଢାରେ ପୁରା ନିରକ୍ଷର । ନା ଓଡିଆରେ ଦୁଇ ପଦ କଥା ଠିକ୍ ସେ କହିପାରନ୍ତି ନା ହିନ୍ଦୀ ଭାଷା ବୁଝିପାରନ୍ତି । ଏପରିକି ନିଜ ନାମ ବି ଦିନେ ଲେଖି ଆସୁନଥିଲା । ହେଲେ ଆଜି ସେହି ମହିଳା ନିଜ ରାଜ୍ୟ ସହ ଦେଶରେ ବି ଚମକୁଛନ୍ତି । ଏପରିକି ସ୍ୱଂୟସହାୟିକା ଦଳର ନେତୃତ୍ୱ ନେଇଛନ୍ତି । ଖାଲି ସେତିକି ନୁହେଁ ଅଶିକ୍ଷିତ ହୋଇ ମଧ୍ୟ ଅନେକ ମହିଳାଙ୍କୁ ସ୍ୱାବଲମ୍ବୀ କରିଛନ୍ତି । ଆଉ ନିଜେ ଏକ ସଂସ୍ଥାର ନିର୍ଦ୍ଦେଶିକା ଭାବେ ଦାୟିତ୍ୱ ତୁଲାଉଛନ୍ତି । କଥାରେ ଅଛି ନିଜର ମନୋବଳ ଦୃଢ ହେଲେ ମଣିଷ ସବୁ କିଛି କରିପାରିବ । ପାହାଡ ଚଢିବା ଠୁ ନେଇ ରୋଜଗାର ପାଇଁ କ୍ଷମତା ସବୁ କିଛି ତା ପାଖରେ ସମ୍ଭବ ହୋଇପାରିବ । ଯାହା କରି ଦେଖାଇଛନ୍ତି ଜଣେ ଅପାଠୁଆ ମହିଳା । ଆଉ ଏହି ନିରକ୍ଷର ମହିଳା ଏବେ ବହୁ ମହିଳାଙ୍କ ପାଇଁ ପ୍ରେରଣା ସାଜିଛନ୍ତି । ମାତ୍ର ହଳଦୀ ଓ ସାବୁନ ତିଆରି କରି କେବଳ ନିଜ ଜିଲ୍ଲା ନୁହେଁ ଦିଲ୍ଲୀରେ ବି ସମ୍ବର୍ଦ୍ଧିତ ହୋଛନ୍ତି ।
କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକ ତୋୟାପୁଟ ପଞ୍ଚାୟତସଦର ମହକୁମାର ନାଡ ହିକକା । ବୟସ ୬୦ ବର୍ଷ । ଜୀବନରେ ଥରେ ବି ସ୍କୁଲ ବାରଣ୍ଡା ମାଡି ନାହାଁନ୍ତି । ଅନେକ ମହିଳାଙ୍କୁ ସେ ସ୍ୱାବଲମ୍ବୀ କରି ଦେଖାଇଛନ୍ତି ରୋଜଗାରର ବାଟ । ଗାଁରେ ସ୍ୱଂୟସହାୟିକା ଗୋଷ୍ଠୀର ସଭାପିତ ଭାବେ ଦାୟିତ୍ୱ ବି ତୁଲାଉଛନ୍ତି । ଏଥିରୁ ଯାହା ରୋଜଗାର ହେଉଛି ସେହି ଅର୍ଥରେ ସେ ଖୁବ୍ ଭଲ ଭାବରେ ଚଳୁଛନ୍ତି । ବୟସର ଅପରାହ୍ନରେ ବି ସେ ହାର ମାନି ନାହାଁନ୍ତି କି କାହାପାଖରେ ପଇସା ପାଇଁ ହାତ ପୋତି ନାହାଁନ୍ତି । ଏହାସହ ବ୍ୟାଙ୍କରୁ ଋଣ ଆଣି ଅନ୍ୟ ମହିଳାଙ୍କୁ ବିଭିନ୍ନ ବ୍ୟବସାୟୀ ମାଧ୍ୟମରେ ସ୍ୱାବଲମ୍ବୀ କରିଛନ୍ତି । ଆଉ ତାଙ୍କର ଚିନ୍ତାଧାରା ସହ କାମ କରିବାର ଇଚ୍ଛା ଓ ଦକ୍ଷତାକୁ ଦେଖି ଲକ୍ଷ୍ମୀପୁର ଲାପକୋର ନିର୍ଦ୍ଦେଶିକା ଭାବେ ଦାୟିତ୍ୱ ଦିଆଯାଇଛି ।
ଏହି ଲାପକୋ ଅଧୀନରେ ପ୍ରାୟ ୧୫ରୁ ଊର୍ଦ୍ଧ୍ୱ ଉତ୍ପାଦକ ଦଳ ରହିଥିବା ବେଳେ ନାଡ ହିକକା ୨ ସ୍ୱଂୟସହାୟିକା ଦଳର ନେତୃତ୍ୱ ନେଇଛନ୍ତି । ଏହାସହ କନାପାଡି ଗାଁରେ ଥିବା ହଳଦୀ ଓ ଝାଡୁ ଉତ୍ପାଦକ ଦଳର ନେତୃତ୍ୱ ନେଇ ୨୫ ଜଣ ମହିଳାଙ୍କୁ ସ୍ୱାବଲମ୍ବୀ କରିଛନ୍ତି । ତେବେ ଏହି କନାପାଡି ଗାଁର ମହିଳା ହଳଦୀ ଚାଷ କରୁଥିବାରୁ ସେମାନଙ୍କ ହଳଦୀ କେବଳ ଖାଦ୍ୟ ପାଇଁ ନୁହେଁ ଏକ ଔଷଧୀୟ ଭାବେ ମଧ୍ୟ କାମ କରେ । ଚାଷ ହୋଇଥିବା ଏହି ହଳଦୀ ସ୍ୱଂୟସହାୟିକା ଗୋଷ୍ଠୀ ଦ୍ୱାରା କିଣାଯାଇଥାଏ । ସେହି ହଳଦୀକୁ ବଜାରରେ ବିକ୍ରି କରିବା ସହ ହଳଦୀ ଗୁଣ୍ଡ ମଧ୍ୟ କରିଥାନ୍ତି ସଦସ୍ୟା । କେବଳ ହଳଦୀ ନୁହେଁ ମହୁ, ଘି କୁଆଁରୀ ଓ କଫି ଭଳି ସାମଗ୍ରୀ ସଂଗ୍ରହ କରି ଗାଁରେ ସାବୁନ ପ୍ରସ୍ତୁତ କରିଥାନ୍ତି । ତେବେ ହାତ ତିଆରି ସାବୁନ ଗୁଡିକ ଅର୍ଗାନିକ ହୋଇଥିବାରୁ ଏହାର ଚାହିଦା ସବୁ ଯାଗାରେ ଅଧିକ ରହିଛି । ବର୍ତ୍ତମାନ ସୁଦ୍ଧା ପାଖାପାଖି ୩୦ ହଜାରରୁ ଊର୍ଦ୍ଧ୍ୱ ସାବୁନ ବଜାରରେ ବିକ୍ରି ହୋଇ ସାରିଛି । ପାହାଡ ପର୍ବତ ଇଲାକା ମଝିରେ ଥିବା ଏହି ଗାଁ ଉପରେ ଏବେ ପଡିଛି ଦେଶର ବଡ କମ୍ପାନୀର ନଜର । କାରଣ ଏଠିକାର ସାବୁନ ତିଆରି ଏକ ଅର୍ଗାନିକ ହୋଇଥିବା ବେଳେ ଏବେ ଏହି ସାବୁନକୁ ଆମାଜନ କମ୍ପାନୀ ନିଜ କମ୍ପାନୀରେ ବିକ୍ରି କରିବା ପାଇଁ ମଧ୍ୟ ଚୁକ୍ତି କରିସାରିଛିି । ୨୦୨୪ରୁ ସ୍ୱଂୟସହାୟିକା ଗୋଷ୍ଠୀ ସଦସ୍ୟା ଉତ୍ପାଦିତ ହଳଦୀ ପତ୍ରରୁ ନିଜେ ପରିଶ୍ରମ କରି ତେଲ ବାହାର କରୁଛନ୍ତି । ତେବେ ଏହି ତେଲ ବାହାର କରିବା ପାଇଁ ମେସିନର କୌଣସି ସୁବିଧା ନଥିବାରୁ ନିଜେ ପରିଶ୍ରମ କରି ହଳଦୀ ପତ୍ରରୁ ତେଲ ବାହାର କରି ତାକୁ ସ୍ଥାନୀୟ ବଜାରରେ ବିକ୍ରି କରୁଛନ୍ତି । ଏହି ତେଲ ମଧ୍ୟ ଖୁବ ଲାଭକାରୀ । ତେବେ ଏନେଇ ଲକ୍ଷ୍ମୀପୁର ଆଗ୍ରୋ ପ୍ରଡକ୍ଟ ପ୍ରଡ୍ୟୁସର କମ୍ପାନୀ ସମସ୍ତ ପ୍ରକାରର ସାହାଯ୍ୟ କରୁଛି ।
ଅନ୍ୟପକ୍ଷରେ ନାଡ ହିକକାଙ୍କ କାମ ଦେଖି ଭୁବନେଶ୍ୱରରୁ ଆରମ୍ଭ କରି ଦିଲ୍ଲୀ ପର୍ଯ୍ୟନ୍ତ ସବୁଠି ହେଉଛି ଚର୍ଚ୍ଚା । ହଳଦୀରେ ତିଆରି ସାବୁନ ପାଇଁ ନାଡଙ୍କୁ କେବଳ ଓଡିଶା ନୁହେଁ ଦିଲ୍ଲୀରେ ମଧ୍ୟ ପୁରସ୍କୃତ କରାଯାଇଛି । ଗତ କିଛିଦିନ ତଳେ ନାଡଙ୍କ ଅଧୀନରେ ମିଶନ ଶକ୍ତି ବଜାରକୁ ୭ ହଜାର ସାବୁନ ପ୍ରଦାନ କରାଯାଇଛି । ବିଭିନ୍ନ ଜିଲ୍ଲାରେ ଆୟୋଜିତ କାର୍ଯ୍ୟକ୍ରମରେ ଏହି ଉତ୍ପାଦକ ଦଳର ସାବୁନ, ହଳଦୀ ଗୁଣ୍ଡ, ଝାଡୁର ବହୁତ ଚାହିଦା ରହିଛି । ଆଉ ଯାହାକୁ ନେଇ ନାଡ ହିକକା ଆଜି କେବଳ ତାଙ୍କ ଜିଲ୍ଲା କି ଗାଁରେ ନୁହେଁ ବରଂ ସବୁଠି ସେ ତାଙ୍କ କାମକୁ ନେଇ ବେଶ ପ୍ରଶଂସା ସାଉଁଟିବା ସହ ଅନେକ ସ୍ଥାନରେ ପୁରସ୍କୃତ ହୋଇଛନ୍ତି । କେଳ ସେତିକି ନହେଁ ତାଙ୍କର ଏହି କାମକୁ ନେଇ ରାଜ୍ୟଠୁ ନେଇ ଦେଶରେ ପ୍ରସାର କରିବାକୁ ଲକ୍ଷ୍ୟ ରଖିଛନ୍ତି ନାଡ ହିକକା । ଭଲରେ ଦୁଇ ପଦ ଓଡିଆ କଥା କହିପାରୁନଥିବା ନାଡ ପାଠପଢାରେ ପୁରା ନିରକ୍ଷର । ହେଲେ ତାଙ୍କର ଇଚ୍ଛା ଶକ୍ତି ଓ ରୋଜଗାର କରିବାର ଦକ୍ଷତା ଆଜି ପ୍ରତି ମହିଳାଙ୍କୁ ପ୍ରେରଣା ଯୋଗାଇଛି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |