କୋରାପୁଟ : ରୋଜଗାରକ୍ଷମ କରୁଛି ଗୁଣ୍ଡୁରି ପକ୍ଷୀ । ଏହି ଚାଷ ମହିଳା ଚାଷୀଙ୍କୁ ସ୍ୱାବଲମ୍ବୀ କରିବା ସହିତ ଅନେକ ରୋଜଗାର ମଧ୍ୟ ଯୋଗାଉଛି । ଲୋକେ ଗୁଣ୍ଡୁରି ପକ୍ଷୀଟିଏ ପାଇବା ପାଇଁ ବଣ ଜଙ୍ଗଲ ଓ ବିଲ ବାଡି ବୁଲିଥାନ୍ତି । ତଥାପି ଏହି ପକ୍ଷୀ ମିଳିବା ମୁସ୍କିଲ । ମିଳିଗଲେ ସେଦିନ ଆମିଷ ପ୍ରିୟ ଲୋକଙ୍କ ଭୋଜନରେ ସ୍ଵାଦ ଭରିଯାଏ । ଏହିପରି ଚାହିଦା ଥିବା ପକ୍ଷୀର ଚାଷ ବର୍ତ୍ତମାନ କୋରାପୁଟ ଜିଲ୍ଲାରେ ଆରମ୍ଭ ହୋଇଛି । କୋରାପୁଟ ଜିଲ୍ଲାର ନାରାୟାଣପାଟଣା, ସେମିଲିଗୁଡା ଓ କୋରାପୁଟ ବ୍ଲକର ପାଞ୍ଚଟି ଗ୍ରାମରେ ଏହି ଗୁଣ୍ଡୁରି ଚାଷ କାମ ଖୁବ ଜୋରସୋରରେ ଚାଲିଛି । ଚାଷ କରିବା ପାଇଁ ଗ୍ରାମରେ ସକ୍ରିୟ ଥିବା ମହିଳା ସ୍ଵୟଂସହାୟକ ଗୋଷ୍ଠୀକୁ ବିନା ମୂଲ୍ୟରେ ଗୁଣ୍ଡୁରି ଚିଆଁ ଦିଆଯାଇଛି । କିନ୍ତୁ ପରବର୍ତ୍ତୀ ପର୍ଯ୍ୟାୟରେ ସେମାନଙ୍କୁ ଏହି ଚିଆଁକୁ କିଣିବାକୁ ପଡିବ ବୋଲି ସୂଚନାରୁ ପ୍ରକାଶ। କୁକୁଡା ପାଳନ ଅପେକ୍ଷା ଗୁଣ୍ଡୁରି ପାଳନ ଅଧିକ ସହଜ ହୋଇଥିବା ଯୋଗୁଁ ମହିଳା ଚାଷୀଙ୍କ ମଧ୍ୟରେ ବି ଚାଷ ପ୍ରତି ବଢୁଛି ଆଗ୍ରହ । ମହିଳାମାନେ ନିଜର ଘର ପାଇଟି ମଧ୍ୟରେ ସମୟ ବାହାର କରି ଚଢେଇଙ୍କ ଲାଳନ ପାଳନ କରୁଛନ୍ତି । ଗାଁରେ ଉତ୍ପାଦିତ ମାଣ୍ଡିଆ, ସୁଆଁ ଭଳି ଶସ୍ୟକୁ ଏହି ଚଢେଇ ଖାଦ୍ୟ ଭାବେ ଗ୍ରହଣ କରୁଥିବାରୁ ସେମାନଙ୍କୁ ପାଳିବା ଆହୁରି ସହଜ ହୋଇଛି । ତେବେ ଏହି ଚାଷ ପାଇଁ ମହିଳାଙ୍କ ମଧ୍ୟରେ ଦେଖାଯାଇଥିବା ଅପୂର୍ବ ଆଗ୍ରହକୁ ଦେଖି କୋରାପୁଟରେ ଗୁଣ୍ଡୁରି ଚିଆଁ ଉତ୍ପାଦନ କେନ୍ଦ୍ର ପ୍ରତିଷ୍ଠା କରାଯିବା ନେଇ ଆଲୋଚନା ଚାଲିଛି ।
ଖାଲି ଚାଷ କ୍ଷେତ୍ରରେ ଏହି ଗୁଣ୍ଡୁରି ଚାଷ ପ୍ରଯ୍ୟୁଜ ତାହା ନୁହେଁ ବାତ, ମଧୁମେହ, ହୃଦରୋଗ ଭଳି ଅନେକ ରୋଗକୁ ଭଲ କରିବା ପାଇଁ ଗୁଣ୍ଡୁରୀ ଚଢେଇ ମାଂସ ଓ ଅଣ୍ଡା ମହୌଷଧୀ ବୋଲି ବିଶ୍ବାସ ରହିଛି । ଏଣୁ ଲୋକେ ଗୁଣ୍ଡୁରୀ ପକ୍ଷୀଟିଏ ପାଇଁ ବଣ ଜଙ୍ଗଲ ବୁଲୁଥିବା ବେଳେ ଗୁଣ୍ଡୁରୀ ଚାଷ ଅଞ୍ଚଳର ମହିଳାଙ୍କୁ ସ୍ବାବଲମ୍ବୀ କରିବା ସହ ଚାଷୀଙ୍କ ପାଇଁ ନୂଆ ସୁଯୋଗ ଆଣିବ ବୋଲି ଆଶା କରାଯାଉଛି । ଆମ ରାଜ୍ୟର ପୂର୍ବତଟ ପର୍ବତମାଳା କୁହାଯାଉଥିବା କୋରାପୁଟ ଜିଲ୍ଳାରେ ଅନେକ ଚାଷ କାମ ହୁଏ । ଉତ୍ତମ ଜଳବାୟୁ ଓ ଭଲ ଚାଷ କାମ ପାଇଁ ବେଶ ଉପଯୋଗୀ କୋରାପୁଟ ଜିଲ୍ଲା । କୃଷି ପ୍ରାଧାନ୍ୟ ଏହି ଜିଲ୍ଲାରେ ଚଳିତ ବର୍ଷ ଏଠାକାର ଚାଷ ଜମିରେ ଅନେକ ପ୍ରକାର ଚାଷ କାମ କରି ବହୁ ଚାଷୀ ଲାଭବାନ ହୋଇପାରିଛନ୍ତି । ଏପରିକି ଦେଶ ବିଦେଶରେ ମଧ୍ୟ ଭଲ ସଫଳତା ପାଇଛନ୍ତି । କେତେବେଳେ ଅଳେଇଚ ଚାଷ କରି ଲାଭବାନ ହୋଇଛନ୍ତି ତ ଆଉ କେଉଁଠି ମାଣ୍ଡିଆ ଚାଷ କରି ସଫଳତା ସାଉଁଣ୍ଟିଛନ୍ତି । ଆଉ ଏବେ ଏହି ଜିଲ୍ଲାର ଚାଷୀଙ୍କୁ ରୋଜଗାରକ୍ଷମ କରୁଛି ଗୁଣ୍ଡୁରି ପକ୍ଷୀ ଚାଷ । ଯାହା ଚାଷୀଙ୍କ ଜୀବନରେ ଆଣି ଦେଇଛି ଖୁସି ଓ ସୁଦୃଢ ହୋଇଛି ଆର୍ଥିକ ସ୍ଥିତି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |