ଭବାନୀପାଟଣା: ଦିନେ ଚାଷୀଙ୍କ ପାଖରେ ଦୁଇଓଳି ଖାଇବାକୁ ବି ଅର୍ଥ ନଥିଲା। ହେଲେ ଆଜି ସେହି ଦାଦନଗଡ଼ର ଚାଷୀ ହୋଇପାରିଛନ୍ତି ଲକ୍ଷପତି । ଖାଲି ସେତିକି ନୁହେଁ ନିଜେ ଭଲ ରୋଜଗାର କରିବା ସହ ଆହୁରି ୨ ଶହ ଚାଷୀଙ୍କୁ ସ୍ୱାବଲମ୍ବୀ କରିପାରିଛନ୍ତି । ଦାଦନଗଡ ଭାବେ ପରିଚିତ ଥିବା କଳାହାଣ୍ଡି ଜିଲ୍ଲାର ଗୋଲାମୁଣ୍ଡା ଅଞ୍ଚଳ ଏବେ ପରିବା ଚାଷର ହବ ପାଲଟିଛି । କଠିନ ପରିଶ୍ରମ ଓ ଇଛା ଶକ୍ତିବଳରେ ଆଜି ସାରା ଦେଶ ଆଗରେ ଏହି ଜିଲ୍ଲାର ଚାଷୀମାନେ ନିଜର ସ୍ଵତନ୍ତ୍ର ପରିଚୟ ତିଆରି କରିପାରିଛନ୍ତି । କେବଳ ଯେ ନିଜ ଜିଲ୍ଲାରେ ନୁହେଁ ବରଂ ରାଜ୍ଯ ତଥା ରାଜ୍ଯ ବାହାରକୁ ମଧ୍ଯ କୋଟି କୋଟି ଟଙ୍କାର ପରିବା ରପ୍ତାନି କରୁଛନ୍ତି ଏହି ଦାଦନଗଡର ଚାଷୀମାନେ ।
ଆଜିର ସମୟରେ ଯୁବଗୋଷ୍ଠୀ ଚାଷକାମ ପ୍ରତି ବିମୁଖ ହେଉଥିବା ବେଳେ ଗୋଲାମୁଣ୍ଡା ବ୍ଲକ ସାନଚେର ଗାଁର ଯୁବଚାଷୀ କୃଷ୍ଣଚନ୍ଦ୍ର ନାଗ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି । କୃଷ୍ଣଚନ୍ଦ୍ର ନିଜେ ଚାଷ କରି ସ୍ବାବଲମ୍ବୀ ହେବା ସହିତ ତାଙ୍କ ଦ୍ବାରା ଗଠିତ ‘ଆଗ୍ରହୀ ଚାଷୀ କୃଷି ଉତ୍ପାଦକ ସଙ୍ଗଠନ’ ସ୍ଥାନୀୟ ଅଞ୍ଚଳରେ ୨ ଶହରୁ ଅଧିକ ଲୋକଙ୍କୁ କାମ ଯୋଗାଇ ସ୍ବାବଲମ୍ବୀ ହେବାର ବାଟ ଦେଖାଇଛନ୍ତି । ଏହାସହ ବାର୍ଷିକ ଲକ୍ଷଲକ୍ଷ ଟଙ୍କା ରୋଜଗାର କରୁଛନ୍ତି । କୃଷ୍ଣଚନ୍ଦ୍ରଙ୍କର ଏହି ପ୍ରୟାସକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ୧୧୭ତମ ‘ମନ୍ କି ବାତ୍’ କାର୍ଯ୍ୟକ୍ରମରେ ଉଲ୍ଲେଖ କରି ଭୂୟସୀ ପ୍ରଶଂସା କରିଛନ୍ତି ।
କୃଷ୍ଣଚନ୍ଦ୍ର ନାଗ ୨୦୦୮ ମସିହାରେ ୨୦ରୁ ୨୫ ଡିସମିଲ ଜାଗାରେ ଟମାଟୋ ଚାଷ କରିବା ଆରମ୍ଭ କରିଥିଲେ । ମାତ୍ର ୧୦ ଜଣଙ୍କୁ ନେଇ ସେ ପ୍ରଥମେ ଚାଷ କାମ ଆରମ୍ଭ କରିଥିଲେ । ପ୍ରଥମ ଅମଳରେ ୭୨ କ୍ବିଣ୍ଟାଲ୍ ଟମାଟୋ ପାଇଥିଲେ । ଏବେ ସେ ଓ ତାଙ୍କ କୃଷି ଉତ୍ପାଦକ ସଙ୍ଗଠନର ୨ ଶହ ସଦସ୍ୟ ରହିଛନ୍ତି । ଏମାନେ ୨ ଶହ ଏକରରୁ ଅଧିକ ଜମିରେ ଆଧୁନିକ ପ୍ରଣାଳୀରେ ଟମାଟୋ ଚାଷ କରୁଛନ୍ତି । ଜୈବିକ ପଦ୍ଧତିରେ ଚାଷ କରୁଥିବାରୁ ତାଙ୍କ ଟମାଟୋ ଓ କଲରାର ଚାହିଦା ପଶ୍ଚିମ ଓଡ଼ିଶା, ପୂର୍ବ ଓଡ଼ିଶା ସମେତ ପଡ଼ୋଶୀ ରାଜ୍ୟ ଛତିଶଗଡ଼ ଓ ଆନ୍ଧ୍ରପ୍ରଦେଶରେ ରହିଛି । ଏପରିକି ବହୁ ବ୍ୟବସାୟୀମାନେ ମଧ୍ୟ ତାଙ୍କ ବଗିଚାକୁ ଆସି ଟମାଟୋ ଓ କଲରା ନେଇଥାନ୍ତି ।
‘ମନ୍ କି ବାତ୍’ରେ ପ୍ରଧାନମନ୍ତ୍ରୀଙ୍କ ପ୍ରଶଂସା :
କୃଷ୍ଣଚନ୍ଦ୍ରଙ୍କ ଚାଷ ପ୍ରଣାଳୀ ଦେଖିବାକୁ ବିଭିନ୍ନ କୃଷି ମହାବିଦ୍ୟାଳୟର ଛାତ୍ରଛାତ୍ରୀ କ୍ଷେତ୍ର ପରିଦର୍ଶନରେ ଆସୁଛନ୍ତି । ୨୦୨୨ ମସିହାରେ ତାଙ୍କ ଅମଳ ପ୍ରଣାଳୀକୁ ନିଜ ଦେଶରେ ଅନୁକରଣ ପାଇଁ ଜର୍ମାନୀ, କେନିୟା, ଆମେରିକା, ସାଉଦି ଆରବ ଓ ଓ୍ବେଷ୍ଟେଣ୍ଡିଜ ଆଦି ଦେଶରୁ ପ୍ରଫେସର ଆସି କ୍ଷେତ୍ର ପରିଦର୍ଶନ କରିଥିଲେ । ତେବେଗୋଲାମୁଣ୍ଡା ବ୍ଲକ୍ ରେ ଲୋକେ ବାହାର ରାଜ୍ୟକୁ ଦାଦନ ଖଟି ଯାଉଥିବା ବେଳେ ସାନଚେର ଗାଁ ଭଳି ଏକ ମଫସଲ ଗାଁର ଜଣେ ଉଚ୍ଚଶିକ୍ଷିତ ଯୁବକ ଚାଷକୁ ଜୀବିକା କରିବା ସହିତ ୨୦୦ରୁ ଅଧିକ ପରିବାରକୁ ପ୍ରତିପୋଷଣ କରି ପାରିଥିବାରୁ ‘ମନ୍ କି ବାତ୍’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୃଷ୍ଣଚନ୍ଦ୍ରଙ୍କୁ ଉଚ୍ଚ ପ୍ରସଂଶା କରିଛନ୍ତି । କୃଷ୍ଣଚନ୍ଦ୍ର ନାଗ କରିଥିବା କୃଷି ଉତ୍ପାଦକ ସଙ୍ଗଠନ ପ୍ରତିଷ୍ଠା ସମୟରେ ମୋଟ ଅଂଶଧନ ପୁଞ୍ଜି ମାତ୍ର ୧.୭୮ ଲକ୍ଷ ଟଙ୍କା ଥିଲା । ବର୍ତ୍ତମାନ ସଙ୍ଗଠନରେ ଅଂଶଧନଧାରୀଙ୍କ ସଂଖ୍ୟା ୨୧୨ ରେ ପହଞ୍ଚିଛି । ଚଳିତ ଆର୍ଥିକ ବର୍ଷ ଶେଷସୁଦ୍ଧା ୨ କୋଟି ଟଙ୍କା ଅତିକ୍ରମ କରିବ ବୋଲି ଆଶା ରଖିଛନ୍ତି କୃଷ୍ଣଚନ୍ଦ୍ର ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |