କେନ୍ଦ୍ରାପଡା : ସାମାନ୍ୟ ଶୁଖିଲା ପତ୍ର ଭରିଛି ଜୀବନରେ ରଙ୍ଗ। ମହିଳାଙ୍କୁ ସ୍ୱାବଲମ୍ବୀ କରିବା ସହ ମୁହଁରେ ଫୁଟାଇଛି ହସ । ଆଉ ସାଉଁଟାଇଛି ଭବିଷ୍ୟତ ପାଇଁ ଅନେକ ସ୍ୱପ୍ନ । ଏ ଶୁଖିଲା ପତ୍ରରେ ଶୋଭାପାଉଛନ୍ତି କେତେ ଦେବାଦେବୀ ଆଉ ପୁଣି ସାରା ପୃଥିବୀକୁ ସବୁଜ ସତେଜ ବାର୍ତ୍ତା ଦେଉଛି ଏଇ ପ୍ରକୃତି । ଯାହା ଆଖିରେ ନଦେଖିଲେ ବିଶ୍ୱାସ ହେବନି । ତେବେ ଶୁଖି ଯାଇଥିବା ତାଳପତ୍ରରେ ଜୀବନ ଭରିଥିବା ଏହି ସୌନ୍ଦର୍ଯ୍ୟର ରୂପକାର ହେଉଛନ୍ତି କେନ୍ଦ୍ରାପଡାର ସୁଚିତ୍ରା ଜେନାଙ୍କ ସମେତ ବହୁ ମହିଳା କାରିଗରୀ । ଏହି ମହିଳା କାରିଗରୀଙ୍କ ଉଦ୍ୟମରେ ଆଜି ଏକ କ୍ଷୁଦ୍ର ଶିଳ୍ପରେ ପରଣତ ହୋଇଛି ତାଳପତ୍ର କାମ । ଖାଲି ସେତିକି ନୁହେଁ ଏହି ଉଦ୍ୟୋଗ ଅନେକ ମହିଳାଙ୍କୁ ସ୍ୱାବଲମ୍ବୀ ମଧ୍ୟ କରିଛି । ଆଉ ତାଙ୍କରି ହାତରେ ଓଡିଆ ସଂସ୍କୃତି, କାରୁକାର୍ଯ୍ୟ ନୂଆ ରୂପ ନେଇଛି ।
ପିଲାଟିଏ ଜନ୍ମ ହେଲେ ଜାତକ ତିଆରି ପାଇଁ ତାଳପତ୍ର ଖୋଜା ପଡେ । ଆମ ସଭ୍ୟତା, ସଂସ୍କୃତିର ବହୁ ରହସ୍ୟ ଓ କଥା ଏହି ତାଳପତ୍ରରେ ସାଇତା ହୋଇ ରହିଛି । ଆଧୁନିକ ଯୁଗରେ କମ୍ପ୍ୟୁଟର ପାଖରେ ଅବଶ୍ୟ ଏହି ତାଳପତ୍ରର ଚାହିଦା ହ୍ରାସ ପାଇଛି, କିନ୍ତୁ ଆଜି ବି ତା ସ୍ଥିତି ହରାଇନି । କେନ୍ଦ୍ରାପଡା ଜିଲ୍ଲା ମାର୍ଶାଘାଇ ବ୍ଲକ କରିଲୋପାଟଣା ପଞ୍ଚାୟତ ନରଣପୁର ଗାଁରେ ଏହାର ମହତ୍ୱ ଆଜିବି ବଜାୟ ରହିଛି । କାରଣ ଏଠି ତାଳପତ୍ରରେ ଭଳିକି ଭଳି ମନଲୋଭା ଜିନିଷ ତିଆରି ହୋଇଛି ଯାହାକୁ ଦେଖିଲେ ମନ ପୁରିଯିବ । ଆଉ ଏହି ତାଳପତ୍ର ଦେଉଛି ଅନେକ ରୋଜଗାର। ଯେଉଁଥିପାଇଁ ନରଣପୁର ଗାଁର ମହିଳାମାନେ ଆଜି ନିଜର ପରିଚୟ ସୃଷ୍ଟି କରିପାରିଛନ୍ତି ।
ଏଠି ଏକାଧିକ ମହିଳା କାରିଗରୀ ଶୁଖିଲା ତାଳପତ୍ରରେ ରଙ୍ଗ ଭରିବାରେ ହଜି ଯାଇଛନ୍ତି । ଏମାନଙ୍କୁ ସହଯୋଗ କରୁଛନ୍ତି ସୁଚିତ୍ରା ନାମକ ଜଣେ ମହିଳା । ଯୁକ୍ତଦୁଇ ପଢା ଶେଷ କରିବା ପରେ ସୁଚିତ୍ରା ଭୁବନେଶ୍ୱର ଗଣ୍ଡମୁଣ୍ଡାରେ ୨୦୧୨ ମସିହାରେ ଏହି ତାଳପତ୍ର ଖୋଦେଇ ତାଲିମ ନେଇଥିଲେ । ଏବେ ସେ ଜଣେ ଗୃହିଣୀ, ନିପୁଣ କାରିଗର, ତାଲିମଦାତା ଆଉ ମାର୍ଗଦର୍ଶକ । ବର୍ତ୍ତମାନ ସୁଦ୍ଧା ସୁଚିତ୍ରା ପାଖାପାଖି ୪୫ଜଣ ମହିଳାଙ୍କୁ ଏହି କାମ ପାଇଁ ତାଲିମ ଦେଇ ଆତ୍ମନିର୍ଭରଶୀଳ କରାଇ ସାରିଲେଣି । ଏହି ତାଳପତ୍ର ଖୋଦେଇ କାମ ଜଗନ୍ନାଥ ସଂସ୍କୃତି ସହ ଜଡିତ। ଏହି ତାଳପତ୍ରରେ ମହାପ୍ରଭୁ ଜଗନ୍ନାଥ, ବଳଭଦ୍ର, ସୁଭଦ୍ରାଙ୍କ ଚିତ୍ର ସହ ଶ୍ରୀକୃଷ୍ଣଙ୍କ ରାସ, ଗଣେଶ, ଦୁର୍ଗା ମା’ଙ୍କ ଚିତ୍ର, କାଞ୍ଚି ଅଭିଯାନ, ବୋଇତ ବନ୍ଦାଣ ଇତ୍ୟାଦିର ଚିତ୍ର ଅଙ୍କା ଯାଏ । ତେବେ ଗୋଟିଏ କାମ ପାଇଁ ପାଖାପାଖି ୫-୬ ଦିନ ସମୟ ଲାଗେ । ଗୋଟିଏ ତାଳପତ୍ରରେ ୫୦୦-୬୦୦ ଟଙ୍କା ଖର୍ଚ୍ଚ କରାଯାଇଥାଏ । ହେଲେ କାମ ହିସାବରେ ୭ରୁ ୮ ହଜାର ଟଙ୍କାରେ ବିକ୍ରି ହୋଇଥାଏ । ବଜାରରେ ଏହାର ଖୁବ ବଢିଆ ବିକ୍ରି ହୁଏ ବୋଲି ମହିଳା କାରିଗରମାନେ କହିଛନ୍ତି ।
ତାଳପତ୍ରର ଏହି କାମ ପଟ୍ଟଚିତ୍ର ପରି ଦେଖିବାକୁ । ତେଣୁ ଏହାର ଆଦର ରହିଛି। ଏହି କାମକୁ ରଘୁରାଜପୁର, ଭୁବନେଶ୍ୱର, ଓଲଡ ଟାଉନ ଆଦିରେ ବିକ୍ରି କରାଯାଇଥାଏ । ଆଖପାଖର ଲୋକମାନେ ମଧ୍ୟ ବିବାହ, ଜନ୍ମଦିନ ଓ ବ୍ରତଘରରେ ଏହି ତାଳପତ୍ରକୁ ଉପହାର ଦେବା ପାଇଁ ଅର୍ଡର କରି ଅନେକ ଜିନିଷ ନେଇଥାନ୍ତି । ତାଳପତ୍ର ଶିଖାଇଛି ସ୍ୱାଭିମାନର ସହ ବଞ୍ଚିବାର କଳା । ବର୍ତ୍ତମାନ ସୁଦ୍ଧା ୪୫ ଜଣ ନିପୁଣ ମହିଳା ଓ ଯୁବତୀ ଏହି ତାଳପତ୍ର ଖୋଦେଇ କାମରେ ଲାଗିଛନ୍ତି । ଏହା ଯେହେତୁ ଜଗନ୍ନାଥ ସଂସ୍କୃତିର କାମ, ଜଗନ୍ନାଥ ସଂସ୍କୃତିକୁ ଓଡ଼ିଶାବାସୀ ସମସ୍ତେ ଭଲ ପାଆନ୍ତି । ତେଣୁ ଏହି କାମ କରିବାକୁ ଆଗ୍ରହ ପ୍ରକଶ କରିଛନ୍ତି ଏହି ୪୫ ଜଣ ମହିଳା ।
ଏହି ତାଳପତ୍ର କାମ ବିଭିନ୍ନ ପ୍ରଦର୍ଶନୀରେ ଭଲ ବିକ୍ରି ହୁଏ । ତାଳପତ୍ରରେ ଗଣେଶ, ଜଗନ୍ନାଥ, ବିଭିନ୍ନ ପ୍ରକାର ଦେବାଦେବୀ ସହ ଏବେ ଅନେକ ସିନେରୀ କାମ ତିଆରି କରାଗଲାଣି। ଭଲ କାରୁକାର୍ଯ୍ୟ ଦେଖି ଲୋକେ ମଧ୍ୟ ଏହାକୁ ନେବାକୁ ଅର୍ଡର ଦେଉଛନ୍ତି । ଏହାଛଡା ଜିଲ୍ଲା, ରାଜ୍ୟ ଓ ଜାତୀୟ ସ୍ତରରେ ହେଉଥିବା ପ୍ରଦର୍ଶନୀରେ ମଧ୍ୟ ଏହି ତାଳପତ୍ର ର କାମ ଭଲ ମାର୍କେଟିଂ ହେଉଛି। ଏହାକୁ ବିକ୍ରି କରିବାକୁ ନେଇ ଯାଉଥିବା ମହିଳାମାନଙ୍କ ପାଇଁ ବିଭାଗ ପକ୍ଷରୁ ଷ୍ଟଲ ଦିଆଯାଉଛି । TA ଏବଂ DA ଦିଆଯାଉଛି । ଫଳରେ ସେମାନେ ଜିନିଷ ଗୁଡିକୁ ବିକ୍ରି କରି ପାରୁଛନ୍ତି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |