କଳାହାଣ୍ଡି : ଆପଣ କୁଆଡେ ବୁଲିବାକୁ ମନ କରିଛନ୍ତି କି । ଶୀତ ଋତୁରେ କେଉଁଠାକୁ ଯିବେ ପର୍ଯ୍ୟଟନସ୍ଥଳୀ ଖୋଜୁଛନ୍ତି କି ତାହାଲେ ଓଡ଼ିଶାର ଥରେ ଏହି ସ୍ଥାନକୁ ଯାଆନ୍ତୁ । ସାଧାରଣତଃ ଶୀତ ଋତୁ ଆସିଲେ ଆମ ସମସ୍ତଙ୍କର ମନ ହୁଏ କୌଣସି ଏକ ପ୍ରାକୃତିକ ପରିବେଶ ବୁଲି ଆସିବାକୁ । କାରଣ ଏହି ସମୟରେ ପ୍ରକୃତିର ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଆହୁରି ଆକର୍ଷିତ କରେ ଓ ମନକୁ ଶାନ୍ତି ଦିଏ । ଏହି ଅନୁସାରେ ଯଦି ଶୀତ ଋତୁରେ କୌଣସି ଏକ ବଣ ପାହାଡ ଘେରା ପରିବେଶ ବୁଲିବାକୁ ମିଳେ ତାହାଲେ ଆନମନା ହୋଇଯାଏ ମନ । ତେଣୁ ପ୍ରତି ବର୍ଷ ଶୀତ ଋତୁ ଆସିଲେ ପର୍ଯ୍ୟଟକଙ୍କୁ ହାତ ଠାରି ଡାକିଥାଏ ଗୁଡହାଣ୍ଡି ଡୋକରୀଚଞ୍ଚରା ପର୍ଯ୍ୟଟନସ୍ଥଳୀ ।
ଚାରିଆଡେ ବଣ ପାହାଡ ଘେରା ପରିବେଶ । ଏହା ମଝିରେ ରହିଛି ପ୍ରାକୃତିକ ଝରଣା । ଝରଝର ହୋଇ ପାହାଡ ଉପରୁ ଝରି ଆସୁଛି ପାଣିର ସୁଅ । ଘଞ୍ଚ ଜଙ୍ଗଲ ଭିତରେ ଏହି ଝରଣାର ଦୃଶ୍ୟ କୌଣସି ଲୋକକୁ ବି ଆନମାନା କରିଦେବ ଗୁଡହାଣ୍ଡି ଡୋକରୀଚଞ୍ଚରା । କଳାହାଣ୍ଡିର ଅନେକ ପର୍ଯ୍ୟଟନସ୍ଥଳୀ ମାନଙ୍କ ଠାରୁ ଅନନ୍ୟ ଓ ସମ୍ପୂର୍ଣ୍ଣ ଭିନ୍ନ ଗୁଡହାଣ୍ଡି ଡୋକରୀଚଞ୍ଚରା ପର୍ଯ୍ୟଟନ ସ୍ଥଳୀ । କଳାହାଣ୍ଡି ଜିଲ୍ଲାର କୋକସରା ବ୍ଲକ ଓ ନବରଙ୍ଗପୁର ଜିଲ୍ଲାର ସୀମାନ୍ତବର୍ତ୍ତୀ ଅଞ୍ଚଳରେ ଏହା ଅବସ୍ଥିତ । କୋକସରା ବ୍ଲକ ସଦର ମହକୁମା ଠାରୁ ୨୨ କି.ମି ରାସ୍ତା ଅତିକ୍ରମ କଲାପରେ ଆଖି ଆଗରେ ଝଲସି ଉଠେ ଗୁଡହାଣ୍ଡି ଡୋକରୀ ଚଞ୍ଚରାର ଦୁଇ ଜଳପ୍ରପାତ । ଶୀତ ଦିନ ଆସିଲେ ଜମିଯାଏ ପର୍ଯ୍ୟଟକଙ୍କ ଭିଡ । କିଏ ଭଗବାନଙ୍କ ଦର୍ଶନରେ ବ୍ୟସ୍ତ ତ ଆଉ କିଏ ପ୍ରକୃତିର ସୌନ୍ଦର୍ଯ୍ୟକୁ ମନଭରି ଉପଭୋଗ କରୁଥାଏ ।
ଡୋକରୀଚଞ୍ଚରାରେ ଥିବା ଦୁଇଟି ପ୍ରମୁଖ ଜଳପ୍ରପାତ ପାଇଁ ଏହା ସାରା ଜିଲ୍ଲାରେ ପ୍ରସିଦ୍ଧ । ଗୋଟିଏ ହେଲା ଡୋକରୀଦର ଓ ଅନ୍ୟଟି ଭଏଁର ଘୁମର । ଏତଦ୍ ବ୍ୟତୀତ ଏହା ପାଖରେ ଥିବା ପ୍ରାକ ଐତିହାସିକ ଯୁଗର ଗୁଡାହାଣ୍ଡି ଗୁମ୍ଫା ଏହି ପର୍ଯ୍ୟଟନସ୍ଥଳୀକୁ ଏକ ସ୍ଵତନ୍ତ୍ର ପରିଚୟ ପ୍ରଦାନ କରିଛି । ଗୁଡରେ ପରିପୂର୍ଣ୍ଣ ହାଣ୍ଡିପରି ଦେଖାଯାଉଥିବାରୁ ଏହି ଗୁମ୍ଫାର ନାମକରଣ ଏହି ପରି ହୋଇଛି ବୋଲି କିମ୍ବଦନ୍ତୀ କୁହେ ।
ଏହି ଗୁଡହାଣ୍ଡି ଗୁମ୍ଫାର ବିଶେଷତ୍ଵ ହେଉଛି ଏଥିରେ ଆବିଷ୍କୃତ ହୋଇଥିବା ପ୍ରାକ ଐତିହାସିକ ଯୁଗର ବିଭିନ୍ନ ଚିତ୍ର, ଶିଳାଲେଖ ତଥା ଗୁମ୍ଫାର କାନ୍ଥ ଗୁଡିକରେ ଖୋଦିତ ହୋଇଥିବା ବିଭିନ୍ନ ଚିତ୍ର । ଡୋକରୀଚଞ୍ଚରା ପରିବେଶ ମଧ୍ୟରେ ଥିବା ଏକ ପୁରାତନ ତଥା ପ୍ରାଚୀନ ଶ୍ରୀରାମ ମହାପ୍ରଭୁଙ୍କ ମନ୍ଦିର ଏହି ସ୍ଥଳୀକୁ ଅଧ୍ୟାତ୍ମିକତାର ଏକ ବିଶେଷ ମାନ୍ୟତା ପ୍ରଦାନ କରିଛି । ପ୍ରତି ବର୍ଷ ଏହି ରାମ ମନ୍ଦିର ପରିସରରେ ଶ୍ରୀରାମ ନବମୀ ମହୋତ୍ସବ ନଅ ଦିନ ଧରି ଆନନ୍ଦ ଉଲ୍ଲାସର ସହିତ ପାଳନ କରାଯାଇଥାଏ ।
ଏଠାରେ ଥିବା ଡୋକରୀଦର ଜଳପ୍ରପାତ ୨ ଶହ ଫୁଟ ଉଚ୍ଚତା ବିଶିଷ୍ଟ ଏବଂ ଏହି ଜଳ ଧାରା ନିକଟରେ ପଡେ ପ୍ରସିଦ୍ଧ ଭାନ୍ୟରଘୁମର (ଭୈରବ ଧର) ଜଳ ପ୍ରପାତ । ଯାହା କି ୧୫୦ ଫୁଟ ଉଚ୍ଚ ଉପରୁ ପତିତ ହୋଇଥାଏ । କେଉଁ ଆବାହମାନ କାଳରୁ ଏହି ଅଞ୍ଚଳର ଆରାଧ୍ୟ ଦେବୀ ମା’ ଡୋକରୀ ଦେବୀଙ୍କୁ ଏହି ସ୍ଥଳୀରେ ପୂଜାର୍ଚ୍ଚନା କରାଯାଇଥାଏ । ଏହି ପର୍ଯ୍ୟଟନ ସ୍ଥଳୀର ବିଶେଷତ୍ଵ ହେଲା ପାଖରେ ଦଣ୍ଡାୟମାନ ହୋଇଥିବା ଯୋଗୀ ପାହାଡ଼ ଓ ରାଣୀ ପାହାଡ଼ ଯାହାକି ପ୍ରାକୃତିକ ସବୁଜିମାରେ ଭରପୁର ରହିଛି । ଶୀତ ଋତୁ ଆସିଲେ ଏଠି ଜମେ ପର୍ଯ୍ୟଟକଙ୍କ ଭିଡ । ଏହି ଜଳପ୍ରପାତ ଦେଖିବାକୁ ଯେତିକି ସୁନ୍ଦର ପରିବେଶ ମଧ୍ୟ ସେତିକି ରୋମାଞ୍ଚକର । ସେ ଖରା ଛୁଟି ହେଉ କି ଶୀତ ଋତୁ ସବୁ ବେଳେ ଏଠି ଲାଗିଥାଏ ଶହ ଶହ ପର୍ଯ୍ୟଟକଙ୍କ ଭିଡ ।
ଉତ୍ତର ଓ ଦକ୍ଷିଣ ପର୍ବତ ମାଳା ପୂର୍ବରେ ମିଶିଛି ଓ ପଶ୍ଚିମ ଦିଗରେ ଖୋଲା ସ୍ଥାନ ରହିଛି । ପୂର୍ବକୁ ତିଖ ପଥର ସବୁ ଅଛି । ଏହାର ପାଦଦେଶରେ ପର୍ବତ ମାଳାକୁ ସାମନା କରି ଗୁମ୍ଫା ଗୁଡିକ ଧାଡି କରି ରହିଅଛି । ଉତ୍ତର ପଟର ଗୋଟିଏ ଗୁମ୍ଫାକୁ ଛାଡି ଦେଲେ ଅନ୍ୟ ସମସ୍ତ ଗୁମ୍ଫା ଗୁଡିକ ଛୋଟ ଛୋଟ ଅଟେ । ଏହି ଜାଗା ଲାଲ ସିଲଟ ପଥର ଦ୍ଵାରା ଆଚ୍ଛାରିତ । ଦକ୍ଷିଣ ଧାଡିରେ ଥିବା କିଛି ଗୁମ୍ଫାର ପ୍ରବେଶ ଦ୍ଵାରରେ ଲାଲ ଓ କଳା ରଙ୍ଗର ପ୍ରସ୍ତର ଚିତ୍ର ସବୁ ଦେଖିବାକୁ ମିଳିଥାଏ ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |