କୋରାପୁଟ : ହଳଦୀ ଏକ ଗୁଳ୍ମ ଜାତୀୟ ଉଦ୍ଭିଦ । ହଳଦୀ ଏହାର ଆଣ୍ଟି ଅକ୍ସିଡେଣ୍ଟ ଗୁଣବତ୍ତା ପାଇଁ ପ୍ରସିଦ୍ଧ । କେବଳ ସେତିକି ନୁହେଁ ଏହା ଭାରତୀୟ କୃଷି ଏବଂ ସଂସ୍କୃତିର ଏକ ମୁଖ୍ୟ ସ୍ରୋତ। ଏହି ପରିପ୍ରେକ୍ଷୀରେ କୋରାପୁଟ ଜିଲ୍ଲାର ଲକ୍ଷ୍ମୀପୁର ଅଞ୍ଚଳ, ହଳଦୀ ଉତ୍ପାଦନ ପାଇଁ ସାରା ଦେଶରେ ପାଇଛି ଭିନ୍ନ ପରିଚୟ । କାରଣ ଏହି ଅଞ୍ଚଳର ହଳଦୀରେ ରହିଛି ଅପେକ୍ଷାକୃତ ଅଧିକ ଆଣ୍ଟି ଅକ୍ସିଡେଣ୍ଟ ଅଂଶ । ଏହି ହଳଦୀକୁ ନେଇ ଲକ୍ଷ୍ମୀପୁର ଅଞ୍ଚଳର ମହିଳାମାନେ ଏକ ନୂତନ ଧାରା ସହ ଆଗକୁ ବଢିଛନ୍ତି । ଆଉ ପ୍ରସ୍ତୁତ କରିଛନ୍ତି ହଳଦୀ ପତ୍ରରୁ ତେଲ। ସ୍ବତନ୍ତ୍ର ମେସିନରେ ଉତ୍ପାଦନ କରିଛନ୍ତି ହଳଦୀ ପତ୍ରର ତେଲ । ଏକ ସମାଜିକ ସଂଗଠନ ‘ୱାର୍ଡ’ ଏବଂ ମାର୍କେଟିଂ ସଂସ୍ଥା ‘ORMAS’ର ମାର୍ଗଦର୍ଶନରେ ଏହି ମହିଳାମାନେ ହଳଦୀ ପତ୍ରରେ ତେଲ ପ୍ରସ୍ତୁତ କରିବା ଆରମ୍ଭ କରିଛନ୍ତି । ଏକର ଏକର ହଳଦୀ ଅମଳ ପରବର୍ତ୍ତୀ ସମୟରେ ପତ୍ରକୁ ମାଟିରେ ମିଶିଯିବା ପାଇଁ କ୍ଷେତରେ ଛାଡି ଦିଆଯାଏ, ଅଥବା ସେଠାରେ ହିଁ ପୋଡି ଦିଆଯାଏ । କିନ୍ତୁ ଏହି ମହିଳାମାନେ ପତ୍ର ଗୁଡିକୁ ପୁନଃବ୍ୟବହାର ଯୋଗ୍ୟ କରିଛନ୍ତି । ଯାହା ସେମାନଙ୍କ ଆର୍ଥିକ ଅଭିବୃଦ୍ଧି ସହ ହଳଦୀ ପତ୍ରରୁ ତେଲ ଉତ୍ପାଦନର ଏକ ନୂତନ କୃଷିଭିତ୍ତିକ ଦିଗ ମଧ୍ୟ ସୃଷ୍ଟି କରିଛି ।
ସୂଚନାଅନୁସାରେ, ସବୁଜ ବା କଞ୍ଚା ହଳଦୀ ପତ୍ରରୁ ତେଲ ଉତ୍ପାଦନ କ୍ଷମତା ଆବଶ୍ୟକତା ଠାରୁ କମ ରହୁଥିବା ବେଳେ ଶୁଖିଲା ପତ୍ରରୁ ଅଧିକ ତେଲ ଉତ୍ପାଦନ କରିପାରିବାର କ୍ଷମତା ରହିଛି । ଏହି ତେଲ ଉଭୟ ସ୍ଥାନୀୟ ତଥା ସର୍ବଭାରତୀୟସ୍ତରରେ ଔଷଧ ଏବଂ ଅନ୍ୟାନ୍ୟ ଦ୍ରବ୍ୟରେ ବ୍ୟବହାର ହୋଇଥାଏ । ଏହା ଔଷଧୀୟ ଗୁଣବତ୍ତା ବହନ କରୁଥିବାର ଏହାର ଅଧିକ ଚାହିଦା ରହିଛି ବୋଲି ପଟ୍ଟାଙ୍ଗୀ ସ୍ଥିତ ଆଞ୍ଚଳିକ ଅନୁସନ୍ଧାନ କେନ୍ଦ୍ରର ମୁଖ୍ୟ ବୈଜ୍ଞାନିକ ମତ ଦେଇଛନ୍ତି । ଲକ୍ଷ୍ମୀପୁର ବ୍ଲକର ହଳଦୀ ଏହାର ଉଚ୍ଚ ଗୁଣବତ୍ତା ପାଇଁ ଖ୍ୟାତି ଅର୍ଜନ କରି ସାରିଛି । ଏଥିରୁ ପ୍ରସ୍ତୁତ ତେଲ ପ୍ରିମିୟମ ବଜାରରେ ଏକ ଉନ୍ନତମାନର ଉତ୍ପାଦରେ ପରିଣତ କରିଛି । ଏହି ସୁଯୋଗକୁ ଚିହ୍ନି ‘ଓରମାସ’ ଏବଂ ‘ୱାର୍ଡ’ ଦ୍ୱାରା ସମର୍ଥିତ ଉତ୍ପାଦକ ସଂଗଠନ ‘FPO’ର ୨୦ରୁ ଅଧିକ ମହିଳା ନିଜ ଗାଁରେ ହଳଦୀ ପତ୍ରରୁ ତେଲ ଉତ୍ପାଦନ ଯନ୍ତ୍ର ପ୍ରତିଷ୍ଠା କରିଛନ୍ତି । ପ୍ରାରମ୍ଭିକ ପରୀକ୍ଷଣରେ ମହିଳାମାନେ ୩ କ୍ୱିଣ୍ଟାଲ ପତ୍ର ପ୍ରକ୍ରିୟାକରଣ କରି ସେଥିରୁ ୭୦୦ ମିଲିଲିଟର ହଳଦୀ ତେଲ ଉତ୍ପାଦନ କରିଛନ୍ତି । ଆଗରୁ ଲକ୍ଷ୍ମୀପୁରର କୃଷକମାନେ ପୀଢ଼ିଗତ ଭାବେ ହଳଦୀ ଚାଷ କରୁଥିଲେ ସୁଦ୍ଧା, ଏହାର ଉନ୍ନତ ଗୁଣବତ୍ତା ବିଷୟରେ ସଚେତନ ନଥିଲେ । ଏହାର ବଜାର ଉପଯୋଗିତା ସମ୍ପର୍କରେ ନ ଜାଣିପାରି ଶାଗ-ମାଛ ଦରରେ ବେପାରୀଙ୍କ ହାତରେ ହଳଦୀ ପତ୍ରକୁ ବିକ୍ରି କରି ଦେଉଥିଲେ । ଏହାକୁ ସ୍ଥାନୀୟ ବିକ୍ରେତାମାନଙ୍କୁ କମ୍ ମୂଲ୍ୟରେ ବିକ୍ରି କରିବା ସହ ଏହାର ବ୍ୟବହାରକୁ କେବଳ ରାନ୍ଧିବାରେ ସୀମିତ କରିଥିଲେ । ପରେ କୃଷକମାନଙ୍କୁ ଏକ ‘FPO’ ଗଠନ କରିବାରେ ଏବଂ ସେମାନଙ୍କୁ ମୂଲ୍ୟଯୁକ୍ତ ପ୍ରକ୍ରିୟାକରଣରେ ମାର୍ଗଦର୍ଶନ କରି ଏହି କାହାଣୀକୁ ପରିବର୍ତ୍ତନ କରିବାରେ ‘ORMAS’ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ମହିଳାମାନେ କଞ୍ଚା ହଳଦୀ ବିକ୍ରୟ କରିବା ଠାରୁ ହଳଦୀଯୁକ୍ତ ସାବୁନ ପରି ବିଭିନ୍ନ ଉତ୍ପାଦ ଉତ୍ପାଦନ କରିବାରେ ସକ୍ଷମ ହୋଇପାରିଛନ୍ତି । ଜ୍ଞାନ ଏବଂ ସଠିକ୍ ତାଲିମ ସହ ସହଯୋଗ ମିଳିବାରୁ ଏମାନେ ଏବେ ନୂଆ ସମ୍ଭାବନା ଖୋଜିବାରେ ଲାଗିଛନ୍ତି ।
Author: vandeutkal
ଆପଣଙ୍କୁ ସ୍ଵାଗତ ! ଆମେ ଏକ ଅଗ୍ରଣୀ ତଥା ବିଶ୍ୱସ୍ତ ସମ୍ବାଦ ପ୍ରକାଶକ, ଆପଣଙ୍କୁ ସର୍ବଶେଷ ଖବର, କ୍ରୀଡା, ବିଜ୍ଞାନ, ପ୍ରଯୁକ୍ତିବିଦ୍ୟା, ମନୋରଞ୍ଜନ, ସ୍ୱାସ୍ଥ୍ୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଘଟଣାଗୁଡ଼ିକ ଉପରେ ଅଦ୍ୟତନ ପ୍ରଦାନ କରୁ | ଆମର ଉଦ୍ଦେଶ୍ୟ ହେଉଛି ତୁମକୁ ସଠିକ୍ ଏବଂ ନିର୍ଭରଯୋଗ୍ୟ ଖବର ଯୋଗାଇବା, ତେଣୁ ତୁମେ ଦୁନିଆରେ କ’ଣ ଘଟୁଛି ସେ ବିଷୟରେ ଅବଗତ ରହିପାରିବ |